Kolosi 4
4
1Ba̱ntyok na̱sa, yi breng ba̱kwwa nyin ba ansham, rot yi bvwo nyin meyang yi ma̱n byyi A̱ntyok Ka̱ryi nu yi ku yya dikwwa Tazwa ni.
Bulut a̱ ba̱ zzek
2Yin tyyi ka̱ssi ba̱ a̱duwa bu byin cam, i gwai Ka̱za mi. 3Yi bu za yya a̱duwa Ka̱za a̱ ga za ryi diwat tyyei Ka̱sham Ba̱ryat Kristi ka a̱ yin shyi i ka̱nrang ni. Nka a̱mi a̱ yin byyi n nin shyi a jaru nu ba̱nyying. 4Yi yya a̱duwa n ga maai tyyei Ba̱ryat ba ba̱zizrak, da̱ni n nin cat i.
5Yi ta̱rwam bu kyang a yi yya a a̱ssi ba̱nyet a a̱ yet ba̱nyet witssup ba ni. Yi yya amfani di kozan diwat ti yi shya ni. 6Ba̱ryat nyin ba kozan ka̱ram a̱ byyi sham hok a̱ swat di ntwak ni; ki a̱yin a̱ ma̱ ya zzim kyang, yi bvwo ka̱sak ka yi nin ku shim mi ni.
A̱ngbom byet
7Tikikut a̱wumba njit, a̱kpondang mpfong ka̱ryong njit u, a̱tuba nu zi yya dikwwa A̱gwam Yesu ti ndung ba̱ nu ni, a̱ ni ya tyyei kozan kyang tazwa nzuk. 8Nkpa n nin ku tom na̱ bu ya tyyei kyang a zin shyi ni, a̱ ga ya ta̱gbak, ndya nyin na i gi myyi. 9A̱ shyi bu Onisimut a̱wumba ka̱ryong a̱yring njit u zi cat i, a̱tuba nu a̱ yet a̱neyring nyin ni. Ba ni ya tyyei sa̱rei kyang a ba ryi kyi ni.
10Aristakut, a̱tuba nu a̱ shyi ba̱ nzuk a jaru nu ni, a̱ ya byei. Markut u a̱ yet ka̱won a̱nap Barnabat ni, a̱tuba nu ba ka̱n ya tyyei di ki a̱ ba yi ku san ansham ni, a̱ ma̱ ya byei. 11Jeshua, a̱tuba nu ba bon yei Justut u ni a̱ ma̱ ya byei. Bu ba̱nyet ba̱tat bani a̱mi a̱ yet ba̱nyet Yahuda na yet ba̱nyet tssup ba a̱ yya pfong a ba̱ nzuk rot Dityok Ka̱za ti ni. Ba ka̱ n brang ba̱t.
12Abafarat, a̱kwwa Yesu Kristi a̱yaan, a̱ ma̱n shyi ka̱yat nyin ka, a̱ ya byei. A̱ yya a̱duwa ba̱cincrim a̱zi hywak nyin a̱ naai Ka̱za ka ya brang yi gi maai sseng di cet di ba̱nyet ba a̱ yet ba̱jyem ni, ba̱nyet ba a̱ tssup kyang a myim Ka̱za di ndya mba ba̱sa̱rei ni. 13Nzuk ma n yet shaida a̱gba̱dang pfong u na̱ ya yya mi ni, nta̱mak bu ba̱nyet Lawudikiya ba bu ba̱nyet Hirafolit. 14Luka, a̱ntyok dikan nu zin sak rya ni, bu Dimat a̱ ya byei.
15Yi si tyyei ba̱wumbeyang ba a̱ shyi Lawudikiya bu a̱mbyring a̱ywu ban yei Nimfa ni nta̱mak bu ba̱nyet tssup ba a̱ na tung gbang nu ka ni di zi ba̱ byei. 16Ki yi bu twang wasika a̱ni, yi tom mi ba bo si twang ba̱nyet tssup Lawudikiya ba mi, i bu twang a̱nying nu ba̱nyet Lawudikiya ba ba ni ya tom mi ni. 17I tyyei Arkibut na̱n tyyi ka̱ssi a̱ tyak pfong a A̱gwam Kristi na̱n ku sak ni.
18Nzuk Bulut a̱mi n jem byet ani di bvak nzuk. Yi ryok bring zzop a n nin shyi ni ba.
A̱liheri Ka̱za a̱ swrang ba̱ nyin.
Currently Selected:
Kolosi 4: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
