Npfong 26

Bulut a̱ nwa kok Agaribat ba̱ryat nu ba

1Agaribat a̱ hywa di Bulut, “To, da̱ kok ka̱sak nwan ka zi hok.” Bulut a̱ yrek bvak nu na, a̱ nwa kok kyang a ku shyi ni.

2A̱ hywa, “A̱gwam Agaribat, n yya a̱ziki ka̱pfun n sseng a̱ta̱ssi nwan n kok kyang a n shyi an nkyang a ba̱nyet Yahuda na ba ni n breng ni. 3I ba̱ryat ka̱ryong a bvwo tada ba̱nyet Yahuda ji sa̱rei bu ba̱ryat mba ba. Rot a̱mi n na̱ naai a rot a̱pfo hok kyang a n ni ryat i.

4“Sa̱rei ba̱nyet Yahuda na a̱ bvwo swat a n swat nyyai n yet hwung ni, wato, ba bvwo swat nzuk a ka̱nkrang nzuk ka bu swat nzuk a Urushalima. 5Ki ba cat hywa ka̱ryong, nyyai gba̱gbang ba bvwo ka̱sak swat nzuk ka, nyyai n yet hwwung ni i tssup ba̱nyet Yahuda na, n yet a̱nyring ka̱yat ba̱ngwak tssup ka ban yei ba̱nyet Farisa na ni. 6Naani n shyi sseng a̱ta̱ssi shirya, rot n tyyi rya na tazwa nkyang ka Ka̱za ka yin dyat a̱wwon ba̱tyyi a̱kwop njit ba ni. 7Ka̱ta̱tuk bu ka̱ta̱nom ba̱nyet njit ba sot swak bu swa ba naai Ka̱za a̱n tyyi rya a̱ ni san nkyang ani sa̱rei. Rot bu ntyyi rya iya ban tyyi ni, A̱ntyok Ka̱ryi, ba̱nyet Yahuda na ba ni n kyyat ka̱pfun. 8A̱nzan a̱n byyi kun ya kaat yi shim di Ka̱za a̱ ni shyek ba̱nyet ba a̱ ka̱n kwi ni?

9“Nzuk ma, n yin tyyi ka̱ssi n sseng dinccok bu diyrek Yesu Nazarat ti. 10Kyang a n yin yya Urushalima ni ku yemi. Ba̱cecet ba̱gado Ka̱za ba a̱ n dyi cet n pyyem ba̱nyet tssup Ka̱za n tyei a jaru. Ki ba ni hywaai ba̱yanyet, n ri n shyi i ba̱nyet ba a̱ ni ta gyai ba̱ hywaai ni. 11Kozan ka̱ram n tyei ba tsot ba̱yanyet mba abat a̱duwa ba̱nyet Yahuda na, ba̱yanyet n ba̱ sseng ba rak tssup mba na. Ku yin si kpang ka̱bvwa ka n ni n ba̱ rak ni hat n nwai na̱byen na̱yaan n yya di ba̱nyet tssup ba.”

Bulut a̱ tyyei ka̱sak ka na̱ san tssup a ni

(Npfong 9:1-19; 22:6-16)

12“To, nkpa a̱mi yin tun nat i Damaskut, ba̱cecet ba̱gado Ka̱za ba a̱ shim a̱ n dyi cet n si pyyem ba̱nyet tssup ba. 13Ka̱za a̱ wwon sucet, A̱gwam! A̱zi ryen ka a̱mi a̱janjai a̱ta̱nom n dyi kyang di ka̱krong za ni ku ra̱u nom ni nyyai tazwa a̱ bu sai a̱ za krang, nzuk bu ba̱nyet ka̱cyet nzuk ba. 14Sa̱rei njit zi kwei ka̱byen. N hok diwan ti hywa da̱ nzuk an nwap ba̱nyet Yahuda na, ‘Shawulu, Shawulu, a̱nzan a̱n byyi an yya da̱ nzuk? A bvei diccu nwan ta ka̱rek ya tsot, nii di ka̱sak ka ka̱janki ka nan not shan a̱ntyok ka̱ byyi ni.’ 15N zzim, ‘Nwan a̱nyan, A̱ntyok Ka̱ryi?’ Na̱ hywa, ‘Nzuk Yesu a̱tuba nu a yya mi ni. 16Ma ta̱za sseng! N ba da̱ nwan cat na̱ tyyi a yet a̱kwwa nzuk. A ni tyyei ba̱yanyet kyang a a ryi ka̱pfun ni bu kyang a n ni na̱ tyyei a̱zanson ni. 17N ni na̱ cam a mbvak ba̱nyet Yahuda bu kpikpit nwap a, ba̱nyet ba n ni na̱ tom da̱ mba ni. 18A ni ba̱ yrang a̱ssi na, i ba̱ brak an dyin ba mi i ka̱bvwa sai, i ba̱ tun ka̱yat cet Ka̱ta̱nyrang ba mi ka̱yat cet Ka̱za, ta ka̱rek n dyi ndya mba na ba kaai a̱ka̱tukyya mba nu a̱ wwon, ba shya ka̱bvwa swrang mba ka̱yat ba̱nyet ba Ka̱za ka tssa ba yet ba̱ nka ni.’ ”

Bulut a̱ tyyei pfong a na̱ yya Yesu mi ni

19“Rot a̱mi A̱gwam Agaribat, n dak yya kyang a ba n tom i nyyai Tazwa ni ba. 20Ka̱tsitsrang wa'azi nzuk ka n yya Damaskut, bu Urushalima, bu sa̱rei ka̱byen Yahudiya, bu kpikpit nwap a, n ba̱ tyyei sa̱rei ba wwon a̱ka̱tukyya mba nu a̱ brak a̱ tssup Ka̱za, a̱ si bo yya nkyang a tyyei brak mba na ni. 21Nkpa yet hywak a ba̱nyet Yahuda ban ni n pyyem ka̱yat bat Ka̱za ka ni a̱ kwan zwang n hywat. 22Ma hat bu tat nom ka̱pfun Ka̱za ka n brang, nkpa mbyyi n ni sseng n wwat shaida nzuk ji a̱ta̱ssi nyin ka, di ba̱cecet di na̱baan. Kyang a n ya tyyei ka̱pfun ni nkpa a̱mi Musa bu ba̱nyet tyyei ba̱ryat Ka̱za ba̱yaan ba yin hywa di ku bai. 23Ba yin tyyei ka̱sak ka dolet Kristi na̱ nin sswa ka̱bvung ni a̱ bo yet ka̱tsitsrang ba̱nyet ka a̱ ni ta̱za yabyen ni, a̱ tyyei ba̱nyet Yahuda na bu nwap nzaan na ba ni san sucet. A̱nu ni a̱ yet ka̱bvwa sai da̱ mba.”

24Bulut na̱ bu shyi i ba̱ryat ba, Fastat a̱ ku kam di cet a̱ hywa, “Bulut, a tyong jyik o? A̱gba̱dang myyam nwan nu a̱ na̱ brak diccu ti e?”

25Bulut a̱ hywa, “Sucet nwan da̱de! N tyong jyik ba. Kyang a n dyat i n dyat ka̱yat bvwo nzuk ku bu yet ka̱ryong. 26A̱gwam, n pfong ka̱wun i ryat ka ba̱ nwan ba; rot a bvwo nkyang ani sa̱rei kuma a hok nkyang a n dyat i; rot sa̱rei na, kyang n shyi ba yya nrang ba. 27A̱gwam Agaribat, a shim ba̱ryat Ba̱nyet tyyei ba̱ryat Ka̱za baa? N bvwo a shim.”

28Agaribat a̱ hywa di Bulut, “A hwa ka̱bacincong ka̱ram kani a ni n brak tyyi i tssup o?”

29Bulut a̱ hywa, “Ko a̱jinjing ka̱ram ko cincong nka, kyang a n naai Ka̱za ni nwan bu kpikpit ba̱nyet a n pfong ka̱pfun ni yi ryi da̱ nzuk ni, ma ban bu na̱sa̱rka̱ nani ba.”

30A̱gwam u bu gwamna bu Barniki bu sa̱rei kpikpit ba̱nyet a i ta̱za sseng. 31Ba bu wruk a̱ hywa di ba̱yaan, “A̱yin a̱ni a̱ yya kyang a maai ba ku tyyi a jaru ko ba ku hywat i ba.” 32A̱gwam Agaribat a̱ hywa di gwamna Fastat, “A̱ da wa ka̱n dyok hywa di ba nat da̱ A̱gwam Rom ba, se ba ku kaai a̱ wwon.”

Currently Selected:

Npfong 26: kaj

Highlight

Copy