Npfong 25

Bulut a̱ta̱ssi Fastat

1To, Fastat na̱ bu nwa i ka̱byen nu ka a̱ yya nom tat a̱ drok nyyai Kaisariya a̱ nat Urushalima. 2Ba̱cecet ba̱gado Ka̱za ba bu ba̱cecet ba̱nyet Yahuda ba a̱ nat a̱ si yya kara Bulut da̱ nu 3a̱ ku naai a̱ hywa, “Sa̱kut, tyyi ba ba bu Bulut Urushalima!” Ashe ba ka̱n dop bu ba̱yanyet ba myyi a̱zi ryen a̱ ku hywat na̱ ka̱n tat Urushalima ba. 4Fastat a̱ hywa da̱ mba, “Bulut a̱ shyi i hweyak ka̱yaani Kaisariya. Nzuk ma n ni brek n nat ka̱ yemi a̱zi nom ani. 5Kyang a yi ni yya ni, se yi tun ba̱yanyet ka̱yat ba̱cecet nyin ka ba nat ba̱ nzuk. Ki kyang shyi na̱ yya ku yet ba, ba si yya kara nu ka̱ yemi!”

6Na̱ yya di nom a̱ninai ko swak ni na̱ shyi Urushalima ka, a̱ si brek a̱ ba Kaisariya ka. Ka̱ntson a̱ wo tat na̱ swrang bat shirya na a̱ tyyi ba ba bu Bulut. 7Ba bu ba bu Bulut, ba̱nyet Yahuda na i ba nyyai Urushalima ka ni i tyong ku krang i nwa ku kyyat a̱ka̱tuk nkyang u ba hywa na̱ yya ni. Ma sa̱rei ka̱yat a̱kyyat mba ka ba shya kyang yring a̱ yet ka̱ryong ni ba. 8Bulut a̱ si ma̱n nwa ba̱ryat nu ba, a̱ hywa, “Nzuk n byyi hywak a nyya truwang ba̱nyet Yahuda na kun bvwo ni ba, ko bu bat Ka̱za ko bu A̱gwam Rom ba, ko ba̱cincong.”

9Ma Fastat a̱ cat ba̱nyet Yahuda na i ku gwai, a̱ zzim Bulut a̱ hywa, “A shim ba nat ba̱ nwan Urushalima a si sseng a̱ta̱ssi nzuk n na̱ yya shirya a̱za̱ nkyang ani ba na̱ kyyat ni ee?”

10Bulut a̱ hywa, “N sseng i bat shirya A̱gwam Rom na, ka̱bvwa ka a̱ myim ba ni n yya shirya ji ni. N yya ba̱nyet Yahuda a̱ka̱tuk kyang ba, nwan ma a bvwo a̱mi sa̱rei. 11Ki n byyi hywak a n yya hat ku maai ba ni n hywat i, to, n tyong dikwu ti ba. Ma ki ka̱ryong a̱n shyi i kara nzuk a ba yya ni ba, n dyi a̱yin nu a̱ ni n brak a̱ ba̱ ryi ni ba a̱ ga ba̱ hywwak bu rya. N cat ba seyak bu shirya nzuk ji a̱ nat i a̱ta̱ssi A̱gwam Rom.”

12Fastat na̱ bu ryat bu ba̱nyet mpfong nu ba, a̱ hywa di Bulut, “To, a hywa di ba nat bu shirya nwan ji di A̱gwam Rom, a̱ta̱ssi A̱gwam Rom a ma̱n naat!”

Fastat a̱ tyyei Agaribat ba̱ryat Bulut ba

13Ka̱ram a̱ bvwa a̱gwam Agaribat bu Barniki a̱ ba Kaisariya tyyi Fastat ‘Aba̱n’. 14Ba bu bvwa nom ka̱ yemi, Fastat a̱ kok Agaribat ba̱ryat Bulut ba, a̱ hywa, “A̱yanyet a̱n shyi kyi Felix na̱ wwon a jaru. 15Ka̱ram ka n ni nat Urushalima ni ba̱cecet ba̱gado Ka̱za ba̱nyet Yahuda ba bu ba̱nekwo mba ba a̱ ba bu yya kara nu a̱ naai n ku tyyi a̱bvun n ku rop ko n ku hywat. 16Ma n ba̱ tyyei ka̱sak ka njit Rom zi na wwon ba tyyi a̱yin an bvak ba̱nyet a a̱ yya kara nu na ni ba, se a̱yin nu a̱ shya diwat ti da̱ a̱ ni mon bu ba̱nyet ba a̱ yya kara nu na ni a̱ kok kyang a ban ku kyyat i. 17Njit ba bu ba, n byyan ka̱ram ba. Ka̱ntson a̱ wo tat n swrang bat shirya na n tyyi ba ba ba̱ nu. 18Ba̱nyet ba a̱ yya kara nu ni a̱ ta̱za a̱ ryat, ma hywak a n hwa di ban ku breng ni ban kpo tyyi ba. 19Seko ba̱ a̱cecet ban sseng ba̱ nu tazwa ryen tssup mba ka, ba̱ a̱yanyet ban yei Yesu; da̱ a̱ ka̱n kwu, ma nu Bulut a̱ hywa da̱ a̱n shyi a̱cet. 20Nzuk n shya diccu ba̱ryat ti n pyyem ba. Rot a̱mi n bvwo kyang yya ba n zzim Bulut ka̱ ni shim a̱ nat Urushalima ba si ku yya shirya ji ka̱ yemi an nkyang a ban ku kyyat i. 21Ma Bulut a̱ naai a̱ hywa di ba ku ryok an bvak nsoja na se ka̱ram ka A̱gwam Rom nu na̱ bun shirya ba̱ryat nu ba ni. Nzuk meyang n tyyi ba ku wwon a jaru nu n tot ka̱ram ka n bu n ku tom di A̱gwam Rom ni.”

22Agaribat a̱ hywa di Fastat, “N cat ku hok meyang.”

Fastat a̱ hywa, “A wu ku hok ka̱ntson.”

23Ka̱ntson a̱ wo tat, Agaribat bu Barniki a̱ ya rop a̱ wruk-wruk dityok, a̱ si nwa a̱ swrang a̱gba̱dang bat ka̱tung u, bu ba̱cecet nsoja nta̱mak ba̱cecet ka̱nkrang ba. Fastat a̱ tyyi ba ba bu Bulut. 24Fastat a̱ hywa, “A̱gwam Agaribat, bu kpikpit ba̱nyet a shyi kyi ni; a̱yin a̱ni a̱mi sa̱rei ba̱nyet Yahuda na ba yya kara nu ka̱yaani da̱ mba bu kyi, a̱ hywa di cet di ku myim ba ku wwon bu sso ba. 25Ma nzuk n dyi kyang a na̱ yya ku maai ba ku hywat i ba. Ma nu a̱ ka̱n shot ka̱nu da̱ a̱ cat ba nat bu ba̱ryat nu ba di A̱gwam Rom; nzuk n ma̱n ka̱n dyat n sak n ni ku tun na̱ nat da̱ nu. 26Ma n byyi kyang a n ni jem n tyyei A̱gwam nzuk uni tazwa nu ni ba. Nkpa n byyi n ni ku yei a̱ta̱ssi nwan A̱gwam Agaribat, bu sa̱rei nyin, shim ki zi bu hok kyang a na̱ ni ryat i n shya kyang a n ni jem ni. 27Rot n dyi diwat ti n ni n tom da̱ a̱yin a̱ta̱ssi nshirya da n jem kyang a na̱ yya ku maai ban ku kyyat i ba.”

Currently Selected:

Npfong 25: kaj

Highlight

Copy