Npfong 24

Ba̱nyet Yahuda na a̱ yya kara Bulut a̱ta̱ssi Felix

1Nom mpfon bu seyak A̱gba̱dang Gado Ka̱za nu, Hananiya, a̱ ba Kaisariya bu ba̱nekwo ba̱yaan a̱nta̱mak bu lauya yaan, ba yin kpo yei Tartulut. A̱ ba bu kara Bulut a̱ta̱ssi gwamna Felix ka. 2Ba bu yei Bulut, Tartulut a̱ bu nwa ku kyyat a̱ hywa,

“Felix, a̱gba̱dang a̱gwam njit, zi da̱de i ka̱byen kani zi swat lafiya zi hywak bvwo breng ba̱nyet nwan. Nkyang bu n shyi ba̱gingang a yya n za brang. 3Kozan ka̱bvwa i ka̱byen kani ba̱nyet ba pfong ansham zi bu dyep bu nkyang a a yya ni kozan ka̱ram. 4Ma, n cat na̱ byyan ka̱ram n da̱u ba. Zi na̱ naai a hok kyang a zin ba ni ba̱cincong. 5Zi shya a̱tuba a̱ni bu tyei a̱suswak a̱ kwak ba̱nyet a̱ka̱tuk swat. A̱ nwai a̱ zun ba̱nyet Yahuda na koke i ka̱sa ka. Nu a̱mi a̱ bo yet a̱kwak ka̱son nsot u ban yei Nazarawa ni. 6Hat ma a̱ shyi i cat za shyik bat Ka̱za na, ma zi ku pyyem. [Cat njit a zi ku yya taka̱i shirya njit a. 7Ma komanda Lisiyat a̱ ba a̱ bu ku san a̱ wwon di cet. 8Lisiyat a̱ hywa di ki zi byyi ba̱ryat ba̱ nu zi ba da̱ nwan.] Nwan ma, ka ku zzim a ni hok hywak a zin ku breng ni.” 9Ba̱nyet Yahuda na sa̱rei mba a̱ shim di kyang a ban ku breng ni yet ka̱ryong.

Bulut a̱ kok kyang a na̱ bvwo ni

10Gwamna nu a̱ tyyi Bulut na̱ ryat, Bulut a̱ hywa,

“N bvwo a ka̱n da̱de a yya ba̱nyet bani shirya. Rot a̱mi n pfong ansham na̱ kok kyang a n bvwo ba̱zizrak ni a̱ta̱ssi nwan. 11Nwan ma, ka a zzim, a ni bvwo ku ka̱n da̱u nom swak bu hwa ba, n ni seyak nat Urushalima n si naai Ka̱za. 12Mba ba ka̱ n shya n sseng ba̱ a̱yin n za a̱cecet i bat Ka̱za na ba; di ba n shya n hwwut ba̱nyet ba, ko i bat a̱duwa, ko ka̱bvwa ka̱yaan ka̱yat ka̱nkrang. 13Di ba byyi shaida ka̱ryong ji ba nin na̱ ryi zi maai kyang a ba shyi nin n breng a ni ba. 14Kyang yring a̱mi n shim, n tssup Ka̱za ba̱tyyi njit ka i Ryen na ba hywa di ku yet i ba. Ma sa̱rei nkyang a shyi i truwang Musa ji ni n na̱ tssup bu sa̱rei nkyang a nshyi akpa na ba̱nyet tyyei ba̱ryat Ka̱za ba ba yin jem ni. 15Nzuk, n nin tyyi rya Ka̱za ba̱cicrak ba̱ mba ka̱sak ka ban tyyi ndya mba na, sa̱rei ba̱nyet di ba̱tsatsak di ba̱ka̱tuk ba ni kwi a̱ bo shyek. 16Rot a̱mi kozan ka̱ram n kwan n dyi n byyi hywak assi Ka̱za bu ba̱nyet ba.

17“N yya a̱rya ba̱gingang n shyi Urushalima ba, n bu brek bu krum ba bu wrak ba̱nyet dizot nzuk ba, n bo n yya ba̱hyum. 18-19Nkyang ani a̱mi n ni shyi, ba nyyai a̱ bu n shya i bat Ka̱za na. Ka̱ram iya n ka̱n tyak ya jrang a. Ba̱nyet a̱ shyi ba̱ nzuk ba, da̱ a̱suswak na̱n shyi ba. Ma ba̱nyet Yahuda yaan nyyai Asiya yin shyi Urushalima ka. Ku myim se ba shyi kyi a̱ hywa kyang a ba nin kyyat i. 20Ko ba̱nyet bani a̱ ma̱ na̱ tyyei hywak a ba bu n shya mi ni, ka̱ram ka n ni sseng i Ka̱tung mba ka ni. 21Se kyang yring n bvwo n ka̱n hywa a̱ta̱ssi mba, ‘Yi n yya shirya jini ka̱pfun ho n hywa di ba̱nyet ba a̱ ka̱n kwi ni a̱ ni ta̱za.’ ”

22To, nu Felix na̱ bvwo ba̱ryat Ryen iya ba̱zizrak a̱ tyet shirya ji, a̱ hywa, “To ki Komanda Lisiyat a̱ ba, n ni ya tyak ba̱ryat ba.” 23A̱ tyyei kaptin nu na̱ brek di Bulut a̱ si hweyak, ma a̱ ku nang diwat a̱ ryok n ku bvwo ka̱cyet ba, a̱ wwon ba̱kpondang nu a̱ nwai a̱ ku byei a̱ ku cong bu nkyang a na̱ cat i.

Felix a̱ yei Bulut a̱ bo ku hok

24Ba bvwa nom, Felix a̱ bo nyyai a̱ ba ba̱ a̱mbyring nu, ba ku yei Durusila, a̱ yin yet a̱nap ba̱nyet Yahuda. Na̱ tom ba si ba bu Bulut, Bulut a̱ bu ba̱ tyyei ka̱sak ka a̱yin na̱ nin wrak Yesu Kristi rya nu na ni, ba hok. 25Bulut a̱ bu nwa ku kok ka̱sak ka a̱yin na̱ nin cong a̱zizrak ka̱cyet a̱ bo cam diccu nu ni, bu shirya ji bai nom yaan ni, Felix a̱ hok ka̱wun a̱ hywa di Bulut, “Da̱ ye nat! Ki n bu shya diwat, n bo ni na̱ yei.” 26A̱ bo yin hwa di Bulut a̱ ni ku ryi krum; rot a̱mi na̱ swat a̱ ku yei kozan ka̱ram a̱ ryat ba̱ nu.

27A̱rya a̱hwa a̱ bu yya, Burkiyat Fastat a̱ ba ka̱shei Felix. Nu Felix a̱ cat ba̱nyet Yahuda i gi hok ansham nu, na̱ wwon Bulut a jaru nu.

Currently Selected:

Npfong 24: kaj

Highlight

Copy