Npfong 23

1Bulut a̱ cyang ba̱nyet Ka̱tung ba a̱ hywa da̱ mba, “Ba̱wumbeyang nzuk Isreila, rya nzuk a ryi ba̱zizrak ka̱sak ka n nin swat ka̱sa nzuk ka sa̱rei a̱ta̱ssi Ka̱za hat bu tat nom ka̱pfun ni.” 2A̱gba̱dang Gado Ka̱za nu ba yin yei Hananiya ni a̱ kam ba̱nyet ba a̱ sseng shishrek ba̱ nu ni a̱ zzu Bulut ka̱nu. 3Bulut a̱ hywa da̱ nu, “Ka̱za a̱ ma̱ ni na̱ zzu, a sai tswa bat da̱ nwan ni. Nwan swrang i yya shirya tazwa Truwang ka, nwan a̱mi bu shei shirya ji i tyei ba n zzu!”

4Ba̱nyet ba a̱ sseng shishrek bu Bulut ni a̱ hywa, “Ka̱t, A̱gba̱dang Gado Ka̱za Ka̱za nu a̱mi a pfwei o?”

5Bulut a̱ hywa, “A̱yaa! Ba̱wumbeyang nzuk Isreila, n bvwo da̱ nu a̱ yet A̱gba̱dang Gado Ka̱za nu ba. Ba̱ryat Ka̱za a̱ hywa, ‘Ryok byyan a̱yin nu a̱ yet a̱kwak ka̱son ba̱nyet nyin ni ba̱ryat ba.’ ”

6Bulut na̱ bu cyang ba̱nyet ba a̱ tung ni ansham a̱ ryi ba̱yanyet mba ba yet ba̱nyet Sadusi ba̱yanyet a̱ yet ba̱nyet Farisa, na̱ hywa da̱ mba ba̱ ntazwa, “Ba̱wumbeyang nzuk, n yet a̱ntyok ba̱nyet Farisa; ba̱tyyi nzuk ba a̱ bo yet ba̱nyet Farisa. Ba n breng kyi rot n nin byyi rya di ba̱nyet ba a̱ ka̱n kwi ni a̱ ni ta̱za.”

7Na̱ bu hywa a̱mi, ba̱nyet Sadusi na bu ba̱nyet Farisa na i ya kpa di zok, ka̱tung ka a̱ tra. 8(Rot ba̱nyet Sadusi nan zzek di ka̱ a̱yin a̱ kwu, a̱ngbom a̱ bo byyi sso zaan ba. A̱ bo zzek di ba̱pfong Ka̱za a̱n shyi ba di tswa zin shyi ba, ma ba̱nyet Farisa na i zzek di nkyang ntat iya n shyi.) 9A̱cwrya mba nu na̱ bu ra̱u, hat ba̱malam Truwang ba̱yaan ba a̱ yin shyi ka̱yat ba̱nyet Farisa ka ni a̱ ba̱ ton ni di cet a̱ hywa, “Zi ryi hywak a a̱yin a̱ni na̱ byyi ni ba. Shim tswa Ka̱za ko a̱pfong Ka̱za a̱mi a̱ ryat ba̱ nu.”

10A̱cecet a na bu ra̱u, komanda nu a̱ hok ka̱wun di ba ni sam Bulut. Rot a̱mi na̱ tyyi nsoja nu na ba nat a̱ si tun Bulut ka̱yat mba ka, a̱ nat i bariki mba na.

11A̱ta̱tuk ka̱tuk iya, A̱gwam Yesu a̱ sseng a̱mbeyang Bulut a̱ hywa da̱ nu, “Ryok hok ka̱wun ba. Da̱ni a ka̱n shaida kyi ni, dolet a̱mi a bu sin shaida Rom.”

Ba rop a̱ ni hywat Bulut

12Ka̱ntson a̱ wo tat ba̱nyet Yahuda yaan i mon i rop ka̱nu. Ba shyi di ba ni tyyi tswa yak ko ba̱shekwot ka̱nu mba ba se ba hywat Bulut. 13Ba yin da̱u nswak naai i shyi mba na. 14Ba nat di A̱gba̱dang Gado Ka̱za nu bu ba̱nekwo ba a̱ si hywa, “Zi ka̱n shyi di zi ni tyyi tswa yak ko ba̱shekwot ka̱nu ba se zi hywat Bulut. 15Kyang a nwan bu ba̱nyet Ka̱tung nwan ba ba ni yya ni, yi tom di komanda nsoja Rom nu i ku raai di yi cat na̱ ya tom di Bulut yi gi bu ku zzim ansham i gi shya ka̱ryong nu ka. Njit zi ma̱ ka̱n ya rop i ku hywat na̱ ka̱n bu tat da̱ nyin ba ma.”

16Ma ka̱won a̱nap Bulut a̱ ta a̱pfo a̱n hok kyang a ba zzop ni, a̱ nat i kamfani nsoja na a̱ si nwa a̱ tyyei Bulut. 17Bulut a̱ ma̱n yei kaptin a̱yring a̱ ku mon bu ka̱seyang ka a̱ hywa da̱ nu, “Nat ba̱ nka! Ka byyi kyang a ka ni tyyei komanda nyin nu ni.” 18Kaptin nu a̱ nat bu ka̱seyang ka a̱ si tyyei komanda nu, a̱ hywa, “Bulut, a̱tuba nu ba tyyi ajaru nu ni, nu a̱ n tom da̱ nwan bu ka̱seyang kani di ka byyi kyang a̱ ni na̱ tyyei.”

19Komanda nu a̱ ka̱ pyyem n bvak ba nat a̱za̱gbang a̱yring na̱ si ka̱ zzim, “A̱nzan a cat n tyyei a?”

20Ka̱seyang ka a̱ hywa, “Ba̱cecet ba̱nyet Yahuda ba a̱ rop a̱ wo tom da̱ nwan ka̱ntson a̱ bu zzim a ba̱ tom di Bulut; di ba cat a̱ bo ku zzim a̱ hok ba̱ryat nu ba ansham brak. 21Ma ryok shim ba, rot ba̱yanyet ba ra̱u nswak naai a̱ ka̱n dop a̱ ni nrang a̱ hywat Bulut na̱ ka̱n tat di ba̱cecet ba̱nyet Yahuda ba ma. Ba ka̱n shyi di ba ni tyyi kyang ka̱nu ba se ba hywat Bulut. Nwan ba pfong naani a̱ hok kyang a a ni hywa ni.”

22Komanda nu a̱ hywa, “Da̱ ryok tyyei a̱yin da̱ a ka̱ bu n tyyei ba̱ryat ba ni ba.” A̱ tun ka̱seyang ka ka nat.

Ba yrik Bulut a̱ tyyi di Gwamna Felix

23Komanda nu a̱ yei ba̱kaptin nu ba̱hwa a̱ hywa da̱ mba, “Yi shirya cat nsoja ncyi swa ba nat Kaisariya, nta̱mak bu ba̱nyet ntsaap nswak a̱tiyring, bu ba̱nyet a̱kpukpan ncyi swa. Ba ni drok kyi tswam a̱kumbvuyring a̱ta̱tuk ka̱pfun. 24Shya tsaap wrak Bulut na̱ wrak yi nat ba̱ nu ba̱ kinkreng si wrak Gwamna Felix.” 25Komanda nu a̱ si bo jem wasika a̱ wrak a̱ hywa:

26“Wasika a̱ni a̱ nyyai mbvak nzuk, nzuk Kalaudiyat Lisiyat, naat da̱ A̱gba̱dang Gwamna Felix. N na̱ byei ba̱t. 27A̱yin a̱ni n na̱ tom i ni, ba̱nyet Yahuda ku pyyem i bvat ba̱cincong bu ku hywat, n hok da̱ yet a̱ntyok Rom n nat bu nsoja nzuk a n si ku san. 28N cat n bvwo kyang a ban ku breng ni; rot a̱mi n nat ba̱ nu i ka̱tung ba̱cecet mba ka. 29N si ryi n bvwong kyang a ban ku breng ni ku maai ba ku tyyi ajaru ko ba ku hywat ba. Kyang a ban ku kwak ni nyyai i truwang mba na. 30Ka̱ram ka n ni hok di ba̱yanyet mba a̱ zzop a̱ ni ku hywat ni, n dyi ku myim n ku tun na̱ tom i. N tyyei ba̱nyet ba a̱ ku breng ni ba ba bu ba̱ryat mba ba da̱ nwan. Se nom yaan.”

31Nsoja na i yya da̱ni di ban ba̱ tyyei ni, a̱ nat bu Bulut a̱ si kpang Antibatirit a̱ta̱tuk iya. 32Ka̱ntson tat ba brek a̱ ba i bariki mba na, nsoja ntsaap a i seyak ba̱ nu nat i. 33Nsoja ntsaap a ba si nwa Kaisariya, a̱ wrak gwamna nu wasika nu a̱ tyyi Bulut an bvak gwamna na. 34Na̱ bu twang wasika nu a̱ zzim Bulut ka̱rek ka na̱n nyyai ni. Na̱ bu hok di Bulut a̱ nyyai i ka̱byen Kilikiya, 35na̱ hywa da̱ nu, “Da̱ swrang! Ka̱ram ka ba̱nyet ba a̱ yya kara nwan na ban ba ni, n ni hok ba̱ryat nwan ba.” A̱ tyyi ba nat a̱ si hweyak Bulut a̱gbang Hirudut.

Currently Selected:

Npfong 23: kaj

Highlight

Copy