Npfong 22

1a̱ hywa da̱ mba, “Ba̱tyyi bu ba̱wumbeyang! Yi tyyi nyong n ya tyyei kyang a n bvwo ni!” 2Ba bu hok Bulut na̱ ryat diryem ba̱nyet Yahuda ti ba brek a̱ tyyi ba̱ nyong ansham a̱ ku pfong, na̱ si ya ka̱son,

3“N yet a̱ntyok ba̱nyet Yahuda nyyai Tarsut i ka̱byen Kilikiya. Ma n shyi kyi Urushalima nyyai n yet ka̱bawon. Gamaliyal nu a̱ yin n zzek, rot a̱mi kyang n shyi n wi myyam ka̱yat truwang ba̱tyyi njit ka ba, n si bo n cat myim Ka̱za bu rya yring di koyan nyin nu a̱ shyi kyi ka̱pfun ni. 4Nzuk ma n ka̱n yya di ba̱nyet ba tssup Ryen nani ni hat ba kwi. N ka̱n pyyem ba̱ntyok bu ba̱nyring n tyei a jaru. 5A̱gba̱dang gado Ka̱za nu bu sa̱rei ba̱nyet Ka̱tung nu ba a̱ bvwo ka̱ryong a̱mi n dyat. Mba a̱ yin jyet ba̱wasika n nat si nwa di ba̱nyet Yahuda na yin shyi Damaskut ka ni n pyyem ba̱nyet tssup ba ni n ba mi ka̱yat sa̱rka̱ ba bu ba̱ tyyi ka̱bvung kyi Urushalima.”

Bulut a̱ tyyei ka̱sak ka na̱n brak a̱ nwa tssup ni

(Npfong 9:1-19; 26:12-18)

6“N bu cong si tat ba̱ shishrek bu Damaskut, a̱janjai a̱ta̱nom, kyang di ka̱krong za ni i tyyi teya a̱ta̱ssi nzuk ka. 7N kpa ka̱byen n hok diwan ti hywa da̱ nzuk, ‘Shawulu, Shawulu, a̱nzan a̱ na̱ ba an yya da̱ nzuk?’ 8N zzim n hywa, ‘Nwan a̱nyan a̱mi, A̱ntyok Ka̱ryi?’ Na̱ hywa da̱ nzuk, ‘Nzuk Yesu Nazarat, a̱tuba nu a yya mi ni.’ 9Ba̱nyet ba a̱ yin shyi ba̱ nzuk ni a̱ yin dyi tyyi teya na, ma a̱ hok diwan a̱tuba ti a̱ ryat ba̱ nzuk ni ba. 10N bo n zzim n hywa, ‘A̱nzan a cat n yya, A̱gwam nzuk?’ Na̱ hywa da̱ nzuk, ‘Ta̱za nwa Damaskut! Ka̱ yemi ba naat a̱ si na̱ tyyei kozan kyang a Ka̱za ka cat a yya ni.’ 11N kpa a̱tutwan ka̱bvwa iya, se ba̱nyet ka̱cyet nzuk ba a̱mi a̱ n kwak di bvak a̱ nwa mi Damaskut ka.

12“Ka̱ yemi a̱yanyet a̱ yin shyi ba ku yei Hananiya. A̱ yin yet a̱zizrak a̱ntyok tssup Ka̱za ba̱t a̱ tssup truwang njit ji. Hat sa̱rei ba̱nyet Yahuda na shyi Damaskut ni koyan a̱ pfong shok nu. 13Na̱ nyyai a̱ bu sseng gak nzuk a̱ hywa, ‘A̱wumba nzuk Shawulu, yrang a̱ssi nwan na.’ Bu hywa na a̱mi a̱ssi nzuk a a̱ yrang n ku cyang. 14Na̱ hywa da̱ nzuk, ‘Ka̱za ba̱tyyi njit ka a̱ na̱ tssa a bvwo kyang a ka cat i, i ryi i bu hok diwan A̱zizrak A̱kwwa nka ti. 15Rot a ni yet shaida nu i tyyei ba̱nyet koke kyang a a ryi i bu hok i. 16Ko naani a̱nzan a bo swat tot? Se a ta̱za i ku naai ba ga na̱ tssu a̱ka̱tukyya nwan nu a̱ na̱ yya baptisma.’ ”

Bulut a̱ tyyei ka̱sak ka na̱n nin yya nwap nzaan wa'azi ni

17“Nzuk Bulut n brek nat Urushalima, n bu shyi i yya a̱duwa bat Ka̱za, n dyi ba̱zzak 18A̱gwam Ka̱za a̱ hywa da̱ nzuk, ‘Gha wruk Urushalima, rot ba̱nyet ba kyi a̱ ni shim kyang a a ryat tazwa nzuk ka ni ba.’ 19N hywa, ‘A̱gwam, ba bvwo n yin nwai a̱bat a̱duwa n pyyem ba̱nyet ba a̱ na̱ tssup i n tsot. 20Ka̱ram ka ba yin hywat a̱kwwa nwan Istifanut ni, n yin shyi ka̱rek ka n hok ansham ku hywat a hat n breng ba̱tro ba̱nyet ba a̱ yin ku hywat i.’ 21A̱gwam Ka̱za a̱ hywa da̱ nzuk, ‘Ta̱za! N ni na̱ tom gba̱gbang di nwap nzaan.’ ”

22Ba̱nyet ba a̱ swat ba̱ nyong a̱ pfong Bulut se na̱ bun hywa diwan tini, ba bo sook nkun a̱ krok a̱ yya, “Ba nat ba̱ nu a̱ si hywat! Sso nu ji shyi a̱nzan?” 23Ba tyei nkun ba̱ ntazwa a̱ jim ba̱tro mba ba a̱ bvei dibvuk a̱ wop ntazwa. 24Komanda nu a̱ tyyi nsoja nu na ba nwa bu Bulut, a̱ hywa di ba ku tsot na̱ tyyei kyang a̱n byyi ba̱nyet Yahuda na ban kwot a̱gugong u a̱za̱ nu ni. 25Ba bu ku rop a̱ ni ku tsot, Bulut a̱ hywa di kaptin mba nu a̱ sseng ka̱ yemi ni, “Truwang ji wwon ba tsot a̱yin nu a̱ yet a̱ntyok Rom ni di ba ku yya shirya a̱ hok kyang a na̱ yya a̱ ywap ni baa?” 26Kaptin nu na̱ bu hok a̱mi a̱ nat di komanda nu a̱ si ku zzim a̱ hywa, “A̱nzan a cat yya na ni? A̱yin a̱ywu a̱ yet a̱ntyok Rom!”

27Komanda nu a̱ bu hok a̱mi a̱ drok a̱ nat di Bulut a̱ si ku zzim a̱ hywa, “N tyyei! A yet a̱ntyok Rom a?”

Bulut a̱ hywa, “Ee!”

28Komanda nu a̱ hywa, “Nzuk n yin tan krum ba̱gingang n san yet a̱ntyok Rom nu.”

Bulut a̱ hywa, “Ma nzuk, n yet byin Rom.”

29Bu i ka̱baram ba̱nyet ba a̱ yin sseng a̱ cat zzim Bulut a̱ ku tsot ni a̱ kwwat riryim. Ka̱wun a̱ pyyem komanda nu, ka̱ram ka na̱n hok di Bulut a̱ yet a̱ntyok Rom ni na̱ nu a̱ ka̱n tyyi ba ku rop di na̱sa̱rka̱.

Bulut i ka̱tung ba̱cecet ba̱nyet Yahuda

30Komanda nu a̱ yin cat a̱ bvwo hywak a Bulut na̱ yya ba̱nyet Yahuda na ba ku brum a̱mi ni. Ka̱ntson tat na̱ tyyi ba byyik Bulut, na̱ tyyi a̱gba̱dang gado Ka̱za nu bu sa̱rei ba̱nyet Ka̱tung nu ba a̱ tung, na̱ nat bu Bulut na̱ si sseng a̱ta̱ssi mba.

Currently Selected:

Npfong 22: kaj

Highlight

Copy