Npfong 21

Bulut a̱ nat Urushalima

1Zi ba̱ byyek sak ji, i nwa jirgi ba̱shekwot a i ta̱twang tyyi ma̱nyyi Kot ka, ka̱ntson a̱ wo tat zi nwa Rodusa i seyak nat Batara. 2Njit ba si shya jirgi na cong ka̱byen Finikiya ni zi brak kpo nwa i seyak. 3Zi ba ka̱rek ka zi nin dyi Kubrut ni zi hyok a̱za̱gbang bvuk myin i ya ka̱son si nat Siriya, i si tat Sur i kyrek, rot jirgi na ku nin tun ncot a ka̱ yemi. 4Njit ba bu shya ba̱nyet tssup ba, zi swrang ba̱ mba nom a̱tiyring. Tswa Ka̱za ji ba̱ zzek ba tyyei Bulut di na̱ ryok nat Urushalima ba. 5Ma ka̱ram swat njit ka ba̱ mba a̱ bu yya zi drok pyyem ryen, ba za tyyi ryen sa̱rei bu ba̱nyring ba bu na̱mawon na zi wruk ka̱nkrang ka. Zi si tat a̱mbeyang kei ka, ka̱ yemi zin ta̱gbok ba̱sa̱rei njit i yya a̱duwa, 6i ya byei sak. Zi nwa jirgi na, mba ba ma̱n brek a̱ nat ka̱ryi.

7Zi drok nyyai Sur jirgi ba̱shekwot ba Talamayat i bu byyek ba̱wumbeyang ba̱yaan i tsswa a̱ngbrak a̱yring ka̱ yemi. 8Ka̱ntson a̱ wo tat zi seyak ba Kaisariya, i bu nwa gbang Filibut, a̱ yin yet a̱ntyok wa'azi a̱ yet a̱yring i ba̱nyet a̱tiyring ba ba yin tssa Urushalima ka ni. 9A̱ yin byyi na̱won na̱neyang ba̱na na̱naai a̱ yin tyyei ba̱ryat Ka̱za ni. 10To, njit ba bu bvwa nom ka̱ yemi a̱yanyet a̱ ba ba ku yei Agabut. A̱ yin nyyai Yahudiya a̱ ma̱n yet a̱ntyok tyyei ba̱ryat Ka̱za. 11Na̱ nyyai a̱ ba da̱ njit a̱ bu sook a̱rop-a̱hwa Bulut nu a̱n ya rop mbvak ba̱ a̱tak. A̱ hywa, “Kyang a Tswa Ka̱za zi hywa ni ku naani: A̱yin nu a̱ byyi a̱rop-a̱hwa nani ni, a̱mi ba̱nyet Yahuda na shyi Urushalima ni ba naat a̱ si ku rop a̱ ku tyyi an bvak nwap zaan na wi yet ba̱nyet Yahuda ni.”

12Ka̱ram ka zin hok a̱mi ni i njit bu ba̱yanyet ba yin shyi ka̱bvwa ka ni i naai Bulut na̱ ryok seyak a̱ nat Urushalima ba. 13Na̱ hywa da̱ njit, “A̱nzan a̱ ya ba yin kun n nin byyan rya? Bu rop a, ko ba ni n hywat a̱mi rot A̱gwam Yesu, n dam ba.”

14Zi tyuk ba̱ nu na̱ rak, zi ku ryok i hywa, “To, se kyang a A̱gwam Ka̱za na̱ yya ni.”

15Njit ba bu bvwa ka̱ram ka̱ yemi i tung nkyang njit a i pyyem ryen Urushalima. 16Ba̱nyet tssup ba̱yaan nyyai Kaisariya a̱ za tyyi ryen a̱ si nat ba̱ njit ka̱ryi ka zi nin nwa ni, gbang Minasa, a̱ntyok Kubrut, a̱ yin yet a̱ntyok tssup nyyai bu ka̱tsitsrang tssup ka.

Bulut a̱ nat byyek Yakubu

17Njit ba si nwa Urushalima, ba̱nyet tssup ba ka̱ yemi a̱ za san di rya sai. 18Ka̱ntson a̱ wo tat Bulut a̱ nat ba̱ njit zi si byyek Yakubu. Zi si shya ba̱nekwo Coc ba sa̱rei ba tung ka̱ yemi. 19Bulut a̱ ba̱ byyek a̱ si ba̱ kok i sa̱rei kyang a Ka̱za ka yya bu nwap a ni i ka̱cyet nu ka ba̱ wa'azi nu nu. 20Na̱ bu kok a̱ tyak, sa̱rei mba ba dyep Ka̱za a̱ hywa di Bulut, “A̱wumba, a ryi ka̱sak ka kun dyi ni ba̱nyet Yahuda ba̱brika̱tei a̱ nwa tssup naani, a̱ si bo wrak a̱ccu mba a Truwang Musa na. 21Ba ka̱n hok ka̱sak ka a nwai zzek sa̱rei ba̱nyet Yahuda na shyi i na̱byen na̱yaan ni, da a ba̱ tyyei ba wwon truwang Musa na a̱ ryok tyei na̱won mba na ncen ba, ko tssup tada njit ji. 22La̱llei ba ni hok brek nwan na. To, zi ni yya ni. 23Ku myim a tssup kyang a zi ni na̱ tyyei ni. Ba̱nyet ba̱naai a̱ shyi kyi a̱ ka̱n dop a̱ ya jrang. 24Se a nat si ya jrang ba̱ mba i ba̱ tan ka̱tan ya jrang ka ba ga ba̱ kot a̱ccu mba na. Ka yya a̱mi, koyan a̱ ni bvwo kyang a ba ba̱ kok i ni ka̱ryong a̱n shyi ba, a̱ bo ryi nwan ma a tssup truwang Musa ji. 25Ma ba̱ryat nwap nzaan ba san tssup a ni, zi ka̱ ba̱ jem i i ba̱ tyyei ba ryok ya dinam kyang ti ba hwaat ka̱za ka̱yaan ni ni ba, a̱ ryok ya kyang a ba cyik a̱ hywat i ba, a̱ ryok ya ba̱sok ba, a̱ ryok kan-a̱naan nu.”

26To, ka̱ntson a̱ wo tat Bulut a̱ cong bu ba̱nyet ba̱naai iya ba nat a̱ si ya jrang. Na̱ si nwa bat Ka̱za na a̱ ba̱ tyyei nom a bvat ba sin tyak ya jrang a ni, ka̱ram ka ba nin wrak nkyang ya jrang a ni.

Rom a̱ pyyem Bulut

27Nom a̱tiyring a na bu bvat ba̱cincong bu tyak ba̱nyet Yahuda yaan nyyai i ka̱byen Asiya i ryi Bulut i bat Ka̱za na, ba hwwut sa̱rei ba̱nyet ba a̱ bo pyyem Bulut. 28Ba yin kam ba̱ ntazwa a̱ hywa, “Ba̱ntyok Isreila, yi za brang. A̱yin a̱ni a̱mi a̱ nwai koke a̱ zzek ba̱nyet ba ba rak ba̱nyet Isreila ba bu truwang Musa ji, nta̱mak bu bat Ka̱za na. Na̱ si bo ba bu ba̱nyet ba wi yet ba̱nyet Yahuda ni ba nwa bat Ka̱za na a̱ byyan a̱zizrak ka̱bvwa njit u.” 29(Ba yin dyat a̱mi rot ba yin dyi Bulut na̱ cong bu Tarufimat, a̱ntyok Afisa, ka̱yat ka̱nkrang, ba hwa di Bulut a̱ ba ba̱ nu i bat Ka̱za na.)

30Sa̱rei ka̱nkrang ka a̱ tyyi ba̱ yinyai, ba tyong ba ahwa nyyai kozan a̱za̱gbang a̱ si pyyem Bulut a̱ ku kwak a̱ wruk i a̱ hwam nkofa bat Ka̱za na ba ahwa. 31Ba shyi i kwan zwang ku hywat, nkhang a i si kpa di komanda nsoja Rom nu a̱ shyi Urushalima ka ni di sa̱rei Urushalima a̱ shyi kwan zwang. 32Bu i ka̱baram na̱ bvwa bu nsoja bu ba̱cecet mba ba a̱ nyyai a̱ ba. Ba̱nyet ba ba bu ku ryi bu nsoja na a̱ ryok tsot Bulut a. 33A̱kwak ka̱son nsoja nu a̱ shek a̱ nat di Bulut a̱ tyyi ba ku pyyem a̱ ku rop di nsa̱rka̱ nhwa. A̱ ba̱ zzim kyang a na̱ yet i bu kyang a na̱ yya ni. 34Ba̱nyet ba a̱ shyi ka̱ yemi ni a̱ zzop a̱ hwwut a̱ tyei nkun, koyan na̱ ryat kyang a ku myim ni. Na̱ bu ryi ba̱nyet ba ba tyyi ba̱ yinyai di na̱ shya diccu ba̱ryat ti ba, na̱ tyyi ba nat bu Bulut i kamfani nsoja na. 35Ba bu tat ka̱nu ngyeng ka a̱ ni nwa bu Bulut se ban ku sook a̱ cot ba̱nyet ba a̱ yin tyyi ba̱ yinyai. 36Ba̱nyet ba a̱ yin ba̱ tssup riryim ni a̱ tyei nkun a̱ ryat ba̱ mba a̱ yya, “Yi ryok zi ku hywat!”

Bulut a̱ tyyei kyang a na̱ yet i

37Nsoja na bu naat nwa bu Bulut i kamfani mba na, na̱ hywa da̱ komanda mba nu, “N cat ryat ba̱ nwan.”

Komanda nu a̱ hywa, “Ashe a bvwo Helenanci naa? 38Ashe nwan a̱mi yet a̱ntyok Masar u a̱ yin yrek jyi a̱ tung ba̱nyet a̱tsaai ncyi kop iya a̱ nwa ba̱ mba ka̱yit ka ni baa?”

39Bulut a̱ hywa, “Nzuk n yet a̱ntyok ba̱nyet Yahuda nyyai Tarsut i ka̱byen Kilikiya, a̱gba̱dang ka̱nkrang a̱mi. Ka shim a n dyok n hywa kyang di ba̱nyet ba ni.”

40Komanda nu a̱ ku wwon na̱ ryat. Bulut a̱ ta̱za a̱ sseng a̱ntwam u a̱ yrek ba̱nyet ba bvak. Ba bu tyyi nyong, Bulut a̱ nwa ryat ba̱ mba zi diryem ba̱nyet Yahuda,

Currently Selected:

Npfong 21: kaj

Highlight

Copy