Npfong 16

Timoti a̱ nwa i ka̱cyet Bulut ka bu Sila

1Bulut a̱ cong a̱ si tat Darba bu Listira, a̱ mon ba̱ a̱ntyok tssup a̱yaan ka̱ yemi ban yei Timoti, a̱naa nu nu a̱ ma̱ yin shyi i ba̱nyet tssup ba a̱ yet a̱nap ba̱nyet Yahuda ma a̱tyyi nu nu a̱ yet a̱ntyok Helenawa. 2Sa̱rei ba̱nyet tssup ba Listira bu Ikoniya a̱ yin pfong ansham Timoti ba̱t. 3Bulut a̱ cat nat bu Timoti. Rot a̱mi na̱ tyyi ba ku tyyi ncen, rot sa̱rei ba̱nyet Yahuda na yin shyi ka̱ yemi ni yin bvwo ka̱sak ka a̱tyyi Timoti na̱n yet a̱ntyok Helenawa ni. 4Ba cong a̱ nwai na̱nkrang a a̱ tyyei ba̱nyet tssup ba kyang a ba̱pfong Yesu ba bu ba̱nekwo ba ba ryat a̱ sak Urushalima ka ni, ba bo tyyei ba̱nyet tssup ba nkyang a ba ni tssup i. 5Ba̱nyet tssup ba a̱ ta̱gbak ba̱t a̱n tyyi ka̱ssi a̱ rai, a̱ shai ba̱nyet ba nwai tssup a kozan ka̱tuk.

Kyang a Bulut na̱ ryi Taruwasa ni

6Ba yin cong a̱ krang ka̱byen Firijiya bu Galatiya, rot Tswa Ka̱za yin ba̱ bvwo tyyei ba̱ryat Ka̱za ba i ka̱byen Asiya ka. 7Ba cong a̱ bu tat a̱ngbom ka̱byen Misiya nu a̱ cat seyak a̱ nat i ka̱byen Bitiniya, ma Tswa Yesu i ba̱ shim i ba. 8Ba tyet i ka̱byen Misiya a̱ kyrek a̱ nwa ka̱nkrang Taruwasa. 9A̱ta̱tuk iya Bulut a̱ ryi kyang di ba̱zzak i. Na̱ ryi a̱ntyok Makidoniya na̱ sseng a̱ ku naai a̱ yya, “Byyek ba i ka̱byen Makidoniya bu za brang.” 10Na̱ bu hok yei a, zi bu byyan ka̱ram ba zi yya shiri pyyem ryen Makidoniya rot zi yin bvwo Ka̱za a̱ za yei zi nat si yya ba̱nyet iya wa'azi Ka̱sham Ba̱ryat ka ka̱ yemi.

Lidiya a̱ brak a̱ nwa tssup

11To, zi drok ka̱ yemi n nwa jirgi ba̱shekwot nyyai Taruwasa i si tat ka̱ma̱nyyi Samutaraki, ka̱ntson a̱ wo tat zi seyak nat Niyabolit, 12i bo seyak ka̱ yemi cong ka̱byen nat Filibi, i ka̱byen Makidoniya, nka a̱ yet a̱kpok ka̱nkrang u a̱za̱gbang a̱ywu, Rom ba yin nok a̱n swat i. Zi bvwa nom ba̱t ka̱ yemi. 13Ka̱tuk A̱sa̱ba̱t a̱ wo krang zi wwon ka̱nkrang ka i wruk nat a̱mbeyang ncen. Zi nye zi ni shya ka̱bvwa ka ba̱nyet Yahuda ba nan yya a̱duwa ni. Zi si swrang ryat bu ba̱nyring ba a̱ tung ka̱ yemi ni. 14A̱tuba a̱yring i ba̱nyet ba a̱ yin za hok ni ba yin ku yei Lidiya, a̱ nyyai Tayatira, a̱ yin zzap na̱sham ba̱tro. A̱ yin tssup Ka̱za di rya yring, Ka̱za a̱ ma̱ ku yrang pfwa na na̱ hok ba̱ryat ba Bulut na̱ ryat ni. 15Da̱ nu di sa̱rei ba̱nyet ka̱ryi nu ba ba ba̱ yya baptisma. Na̱ za yei zi nat a̱gbang nu a̱ hywa, “Ki yi bvwo n yet a̱ntyok tssup A̱gwam Yesu di ka̱ryong, yi ba bu swrang a̱gbang nzuk.” A̱ za faan zi nat.

Ba pyyem Bulut bu Sila a̱ tyyi a jaru

16Ka̱tuk ka̱yaan zi cong naat ka̱bvwa a̱duwa ka, ka̱neyang ka̱yaan ka a̱ yin yet a̱kwwa ni ka byyi a̱ka̱tuk tswa a̱ mon ba̱ njit, a̱ka̱tuk tswa nu ka yin byyi ni a̱ yin ka̱ brang ka tyyei kyang a ri bai a̱zanson ni. Ka shai ba̱nyet ka̱byyi ba krum ba̱gingang. 17Ka za tssup zi cong bu Bulut a̱ tssap a̱ yya, “Ba̱ntyok bani a̱ yet ba̱kwwa a̱gba̱dang A̱gwam Ka̱za. Ba ya tyyei ka̱sak ka Ka̱za ka ni ya san ni.” 18Ka yya a̱mi a̱ bvwa nom, rya Bulut a̱ byyan na̱ rwan a̱ brak a̱ hywa da̱ a̱ka̱tuk tswa nu a̱ shyi a nka ni, “I diyrek Yesu Kristi, n na̱ kam a wruk i ka̱ wwon.” Bu ka̱ram iya a̱ka̱tuk tswa nu a̱ wruk. 19Ba̱nyet ka̱byyi ba ba bu ryi ryen shai krum mba na ku tyak, ba pyyem Bulut bu Sila a̱ ba̱ kwak a̱ nat i a̱ta̱ssi ba̱cecet ka̱nkrang ba ba swat i ka̱zzu ka. 20Ba ba̱ sook a̱ nat di ba̱cecet Rom ba, a̱ si hywa, “Ba̱nyet bani a̱ yet ba̱nyet Yahuda, ba ba a̱ bu nwa za tyei jyi i ka̱nkrang ka. 21Ba shyi i zzek ba̱nyet njit ba nkyang a truwang njit ji zi hywa di zi ryok yya ni ba. Njit zi yet Rom, da̱ njit ba ni san kyang a ba zzek ni ba, da̱ njit ba ni kpo yya ba.” 22Ba̱nyet ba a̱ tung ka̱ yemi ni a̱n tyyi na̱nu mba a̱ cat yya da̱ mba.

Ba̱cecet Rom ba a̱ sam ba̱tro Bulut ba bu Sila, a̱ tyyi ba ba̱ tsot. 23Ba bu ba̱ tsot ba̱t a̱ nat ba̱ mba a̱ si tyyi a̱ jaru. Ba tyyei a̱ntyok cam a̱jaru nu na̱ ba̱ rop ansham ho ba bu tyong. 24A̱ntyok cam a̱jaru nu a̱ bu hok a̱mi a̱ ma̱ ba̱ pyyem a̱ si hweyak ka̱yayat, a̱ ba̱ tyyi nkon.

25A̱katyyi a̱ta̱tuk Bulut bu Sila ba shyi i yya a̱duwa a̱ bvom a̱bvom a̱n dyep Ka̱za. Kpikpit ba̱nyet a shyi a jaru nu ni a̱ krok a̱pfo a̱n ba̱ pfong. 26Ba bu swat-swat a̱ hok ka̱byen ka ka trim a̱ka̱tuk trim. Sa̱rei dinok a̱jaru ti a̱ nwa zun. Sa̱rei nkofa a̱jaru na i yrang, nsa̱rka̱ na ban zzop ba̱nyet ba a̱ shyi a jaru nu ni i shrek kwei. 27A̱ntyok cam a̱jaru nu a̱ shyek a̱ ryi ka̱sak ka nkofa a̱jaru na nan yrang ni na̱ hwa di sa̱rei ba̱nyet ba a̱ shyi a jaru nu ni a̱ tyong, na̱ kwwat ka̱krong a̱ nin ya tuk. 28Ma Bulut a̱ kam ba̱ ntazwa a̱ hywa, “Ryok ya bvwa ba, sa̱rei njit zin shyi.”

29A̱ntyok cam a̱jaru nu a̱ tyyi ba ku ba bu rong, na̱ ta̱kwang a̱ nwa ka̱yat a̱ si ta̱gbok a̱ta̱ssi Bulut bu Sila, rwam a ku trim. 30A̱ wruk ba̱ mba a̱ nat a̱ta̱sa a̱ ba̱ zzim, “A̱nzan a̱mi n ni yya n nin kaat?”

31Ba hywa da̱ nu, “Seko a wrak A̱gwam Yesu rya nwan na, da̱ nwan di ba̱nyet ka̱ryi nwan ba, yi ni kaat.” 32Ba si ku yya wa'azi ba̱ryat A̱gwam Yesu bu sa̱rei kpikpit ba̱nyet ka̱ryi nu na. 33Bu ka̱ram iya a̱ta̱tuk ka a̱ntyok cam a̱jaru nu a̱ nat bu ba̱nyet Bulut a̱ si ba̱ tssu nhwot a. Nu bu sa̱rei ba̱nyet ka̱ryi nu ba ba ba̱ yya baptisma bu ka̱ram iya. 34Na̱ nat bu Bulut bu Sila ba si ya kyangya a gbang nu. Nu bu ba̱nyet ka̱ryi nu ba koyan a̱ shyi bu ba̱gwai rot a̱ wrak Ka̱za rya nu na.

35Ka̱ntson tat ba̱cecet Rom ba a̱ tom ba̱dogari mba ba ba si tun ba̱nyet Bulut ba nat.

36A̱ntyok cam a̱jaru nu a̱ bu tyyei Bulut bu Sila ka̱sak ka ba̱cecet Rom ba ban tom ba bu ba̱ tun ba nat i, a̱ hywa da̱ mba, “Ka̱za a̱ ya ryang ryen.”

37Bulut a̱ hywa di ba̱dogari ba, “Ba za shya bu hywak ba, ma ba za tsot ka̱yat ba̱nyet a̱ za pyyem a̱ bu tyyi a jaru, ba si cat za tun ba̱ ntsang. Njit zi wu ma̱n yet Rom na meyang. Zi shyei naat ka̱bvwa ba, ko ba̱cincong, se ba̱cecet Rom ba a̱ ma̱n ba a̱ bu za tun mbvak mba.”

38Ba̱dogari ba a̱ brek a̱ si tyyei ba̱cecet Rom ba. To, ba bu hok di Bulut bu Sila a̱ ma̱n yet Rom na ba hok ka̱wun. 39Rot a̱mi ba̱cecet Rom ba a̱ nat a̱ si ba̱ naai ba ba̱ cii, a̱ si wruk ba̱ mba a jaru nu a̱ ba̱ naai ba wwon ka̱nkrang ka. 40Bulut bu Sila a̱ wwon a̱jaru nu a̱ nat a gbang Lidiya. Ka̱ yemi ba sin shya kpikpit ba̱nyet tssup a a̱ ryat ba̱ mba ka̱sak ka ba nin sseng i tssup mba na di ka̱ryong ni; a̱ si wwon ka̱nkrang ka.

Currently Selected:

Npfong 16: kaj

Highlight

Copy