Npfong 15

Ka̱tung ba̱nyet tssup Urushalima

1Ba̱yanyet a̱ nyyai Yahudiya a̱ ba Antakiya a̱ bu nwa zzek ba̱nyet tssup ba a̱ hywa, “Ka̱za a̱ ni ya san ba, seko ba ya tyyi ncen da̱ni di truwang Musa zin hywa ni.” 2Bulut bu Barnabat a̱ sseng a̱cecet ba̱ mba a̱ ya byyan ba̱ mba i ba̱ryat bani. To, ba bu ryi a̱mi ba ryat a̱ sak Bulut bu Barnabat bu ba̱yanyet Antakiya ka ba nat Urushalima a̱ si shya ba̱pfong Yesu ba bu ba̱nekwo ba a̱ ryat ba̱ryat ba ni ba̱ mba.

3Coc ji ba̱ tyyi ryen, ba hyok Finikiya a̱ si brak ka̱byen Samariya a̱ tyyei ka̱sak ka ba̱nyet ba̱gingang a nwap nzaan na ban san tssup a ni. Kpikpit ba̱nyet tssup a bu hok a̱mi hok ansham ba̱t. 4Ba si nwa Urushalima, ba̱nyet tssup ba a̱ tung, nta̱mak bu ba̱pfong Yesu ba bu ba̱nekwo ba a̱ ba̱ byyek, mba meyang ba ma̱n tyyei kyang a Ka̱za ka yya i ka̱cyet mba ka ni. 5Ba̱nyet tssup ba a yet ba̱nyet Farisa ni a̱ hywa di dolet ba tyei nwap iya ncen a̱ bo ba̱ tyyei ba tssup truwang Musa ji.

6To, ba̱pfong Yesu ba bu ba̱nekwo ba a̱ tung ka̱rek ka̱yring a̱ ryat ba̱ryat bani. 7Ba bu tyak a̱jinjing a̱cecet u, Bitut a̱ ta̱za a̱ sseng a̱ hywa, “Ba̱wumbeyang nzuk, yi bvwo nyyai gba̱gbang Ka̱za a̱ n tssa ka̱yat nyin n ni yya nwap a wa'azi Ka̱sham Ba̱ryat ka ba ga hok a̱ wrak ka̱ryong. 8Ka̱za ka a̱ bvwo a̱huhwa koyan ni, nka a̱ bo tyyei ka̱sak ka kan wrak nwap a Tswa nka ji ka̱sak ka ka ka̱n za ryi ni. 9Ka̱za a̱ bo cyang zi bvwon ba̱ mba ba. Ka ba̱ cii a̱ka̱tukyya mba nu rot ba wrak ka̱ryong. 10To, ba̱ a̱nzan a̱ nin byyi zi bvun nwa mai Ka̱za n nwa saai ba̱nyet tssup ba cot, nyyi na njit di zi ni maai i cot i ba, di ba̱tyyi a̱kwop njit ba ba yin maai a̱ cot ni ba? 11Zi wrak ka̱ryong sucet a zi shya ni yet za̱nang A̱gwam Yesu, mba meyang ba̱rimi.”

12Sa̱rei ba̱nyet ba ka̱bvwa ka̱tung ka a̱ tyyi ba̱ nyong a̱ pfong Barnabat bu Bulut ba kok nkyang ka̱hat bu nkyang ka̱wun na Ka̱za ka yya ka̱yat nwap zaan ta ka̱bvwa mba ni. 13Ka̱ram ka ba̱nyet Barnabat ban tyak ba̱ryat mba ba ni, Yakubu a̱ hywa, “Yi hok ansham ba̱wumbeyang! 14Siman a̱ za tyyei ka̱tsitsrang ka Ka̱za kan tyyei cat nka na di nwap nzaan ani i ryen na kan tun ba̱yanyet ka̱yat mba ba yet ba̱nyet nka ni. 15Ba̱ryat ba̱nyet tyyei ba̱ryat Ka̱za ba a̱ cong a̱ bu ba ba̱cicrak bu kyang a zi ri-ryi naani ni. Ba yin jem i ba̱ryat Ka̱za ba a̱ hywa,

16‘A̱gwam Ka̱za a̱ yin hywa, N ni brek,

n bo bu yrek ka̱ryi Dawuda ka a̱ ka̱n kpa ni,

n jyi na̱bvwa na a̱ hwwei ni,

n na̱ nok brak sa̱rei.

17Wwon sa̱rei kpikpit ba̱nyet a a̱ nwa cat A̱gwam Ka̱za;

nta̱mak bu kpikpit nwap a n yei ba bu yet ba̱nyet nzuk ni.

18Kyang a A̱gwam Ka̱za na̱ ka̱n dyat i ku naani,

a̱ bo tyyi ba bvwo a̱mi nyyai gba̱gbang.’ ”

19Yakubu a̱ ya ka̱son a̱ bo hywa, “Kyang a nzuk n dyi ni, zi ryok tyyi nwap a brak tssup Ka̱za ni rwan ba. 20Kyang a myim ni zi jem wasika n ba̱ tyyei ba ryok ya kyangya na wi yet a̱zizrak ni ba rot na yet nyyi ba̱hyum; a̱ ryok kan-a̱naan; a̱ ryok ya dinam kyang ti ba cyik a̱ hywat i ba, ko ba̱sok. 21Ba twang truwang Musa na kozan ka̱tuk A̱sa̱ba̱t nyyai gba̱gbang har ka̱pfun ka̱yat a̱bat a̱duwa ka a̱ bvon yya wa'azi ba̱ryat nu ba ka̱yat kozan ka̱nkrang.”

Ba jem nwap nzaan na wasika

22Wwon ba̱pfong Yesu ba nta̱mak ba̱nekwo ba bu sa̱rei ba̱nyet tssup a̱ ryat a̱ sak a̱ ni tun ba̱yanyet ka̱yat mba ba nat Antakiya bu Bulut bu Barnabat. Ba tun Yahuda nu ban yei Barsabbat ni bu Sila, ba yin shyi ka̱yat ba̱nyet ka ba̱wumbeyang ba̱sa̱rei ba pfong a̱za̱ mba ni. 23Wasika nu ba yin jem a̱ ba̱ ryi ni a̱ hywa:

“Njit ba̱pfong Yesu bu ba̱nekwo, ba̱wumbeyang nyin, zi byei sa̱rei ba̱wumbeyang njit ba a̱ yet nwap nzaan na swat Antakiya bu Siriya bu Silisiya ni. 24Zi hok di ba̱yanyet a̱ wruk da̱ njit a̱ bu ya sak a̱tak a̱ kwan brak ndya nyin na. Njit dei zi ba̱ tom ba. 25Rot a̱mi njit ba tung i ryi ku myim zi tssa ba̱yanyet ka̱yat njit tom ba ba da̱ nyin ba cong bu ba̱rywai njit ba, Bulut bu Barnabat, 26ba̱nyet ba a̱ ka̱n jing sso mba ni a̱ ga yya pfong A̱gwam Yesu Kristi ni. 27Zi ya tom di Yahuda bu Sila ba bu ya tyyei di ka̱nu kyang a zi jem ni. 28Tswa Ka̱za ji ba̱ njit ryi ku myim zi ya sak cot ku seyak nkyang ani zi ni ya twang i ni ba. 29Yi ryok ya kyang a ban yya ba̱hyum ni ba. Yi ryok ya ba̱sok ba. I ryok ya kyang a ba cyik a̱ hywat i ba. Yi wwon kan-a̱naan. Ki yi wwon nkyang ani, yi yya ansham. Ka̱za a̱ ya wwon nda! Se nom yaan!”

30Ba̱pfong Yesu ba a̱ nat a̱ si nwa Antakiya a̱ tung ba̱nyet tssup ba sa̱rei a̱ ba̱ ryi wasika nu. 31Ba bu twang wasika nu a̱ gwai ba̱t rot ba̱ryat ba a̱ ba̱ tyyi cet. 32Yahuda bu Sila da ma a̱ yin yet ba̱nyet tyyei ba̱ryat Ka̱za, ba da̱de ba ryat bu ba̱nyet tssup ba, a̱ ba̱ ta̱gbak ban tyyi ka̱ssi bu tssup a. 33Ba bu bvwa na̱ma nom ba̱cincong, ba̱wumbeyang ba a̱ shyi Antakiya ni a̱ ba̱ tun ba nat lafiya di ba̱nyet ba a̱ ba̱ tom ni. [ 34Ma Sila a̱ ryi ku myim na̱ swrang ka̱ yemi.]

35Bulut bu Barnabat a̱ yen bvwa ka̱ram ka̱ yemi Antakiya ka. Mba bu ba̱nyet ba̱gingang ba zzek ba̱nyet ba a̱ bo yya wa'azi ba̱ryat A̱gwam Ka̱za ba.

Bulut bu Barnabat a̱ ya ghai

36Ba bu bvwa ka̱ram, Bulut a̱ hywa di Barnabat, “Ku myim zi wruk nwai sa̱rei na̱nkrang a zi ka̱n yya wa'azi ba̱ryat A̱gwam Ka̱za ni i byei ba̱wumbeyang ba i ryi ka̱sak ka ban dyi ni.” 37Barnabat a̱ cat ba nat bu Yohana Markut; 38ma Bulut a̱ rak da̱ ryi ku myim ba nat ba̱ nu ba, rot i wruk ka̱son na a̱ yin dak si tyak ka̱cyet ka ba̱ mba, a̱ tyet a̱ brek Bamfiliya. 39Ba sseng a̱cecet ka̱ yemi, a̱ hwwon a̱ ya ghai, koyan a̱ sook ryen nu. Barnabat a̱ drok bu Markut ba nwa jirgi ba̱shekwot a̱ nat Kubrut. 40Bulut a̱ tssa Sila, ba ba̱ yya a̱duwa a̱ ba̱ tyyi an bvak Ka̱za, 41na̱ drok a̱ nwa ka̱byen Siniya bu Silisiya a̱ ta̱gbak ba̱nyet tssup ba.

Currently Selected:

Npfong 15: kaj

Highlight

Copy