2 Yohana 1
1
1Nyyai di Yohana a̱yekwo ba̱nyet tssup Yesu --
Naat da̱ a̱naa ka̱ryi nu Ka̱za ka tssa ni bu na̱won nu na n gwai i, ba nzuk ba̱diyin ba ma a̱nta̱mak bu sa̱rei ba̱nyet ba a̱ bvwo ka̱ryong i. 2Zi ya gwai rot ka̱ryong ka a̱ shyi a mpfwa njit a ni, di ka byyi nom tyak ba.
3Ka̱za A̱tyyi njit, bu Yesu Kristi Ka̱won A̱tyyi, ba hok dizot njit a̱ za ryi tsswa nda bu ka̱nu-a̱tan; ryok ba yet ba̱ njiit ka̱yat ka̱ryong bu cat.
Zi tssup zzek Yesu na cicrak
4N gwai ba̱gingang bu ryi na̱won na̱yaan nwan na cong ka̱yat ka̱ryong ka̱sak ka A̱tyyi na̱n za tyyei zi yya ni. 5To, n na̱ naai a̱naa ka̱ryi, zi ya gwai sa̱rei. A̱nu na̱ yet a̱hwai truwang n na̱ jem mi ba; truwang ji zi byyi nyyai ndoson ni. 6Cat a n nin dyat i nkpa yet: dolet zi tssup truwang Ka̱za ji. Truwang jinji, ni yi ka̱n hok sa̱rei nyyai ndoson ni, n hywa di dolet zi swat ka̱yat ya gwai.
7Ba̱nyet dira a̱n shyi ba̱gingang a̱ ka̱n tyak ka̱sa ka. Ba rak shim ka̱sak ka Yesu na̱n ba i rwam a̱neywu ni. Taka̱i ba̱nyet ani yet ba̱nyet dira bu ba̱ra̱ndwan Yesu. 8Rot a̱mi, se yi ya cam ho yi bu wai zang pfong ji zi yya ni, ma koyan a̱ shya zang nu ba̱sa̱rei.
9A̱yin nu a̱ seyak zzek Yesu Kristi ni a̱ byyi Ka̱za ba. A̱yin nu a̱ ma̱n tssup zzek Yesu na ni, nu a̱ byyi A̱tyyi nu bu Ka̱won ka ka̱yat mpfwa nu. 10Ka̱ a̱yin a̱ ma̱n ba da̱ nyin bu zzek yaan ku bvwon bu naani, yi ryok ku san na̱sa nyin ba. Salama nu nu ma yi ryok san ba. 11Koyan a̱ san salama nu nu a̱ yet a̱rywai nu a̱ka̱tuk nkyang u na̱ yya ni.
Byet a̱ngbom
12N byyi nkyang ba̱gingang n ni ya tyyei ni, ma n dyi ku myim n ya jem mi ba. N hwa n ni ba da̱ nyin. Ki n ba n ni ryat nkyang ba̱gingang a̱ssi ba̱ a̱ssi ba̱ nyin, sa̱rei njit zi gi hok ansham.
13Na̱won a̱wumba nwan Ka̱za ka tssa ni a̱ na̱ byei.
Currently Selected:
2 Yohana 1: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
