1 Yohana 5
5
Ba̱nyet wrak ka̱ryong a̱ ni rot ka̱sa ka
1A̱yin nu a̱ wrak ka̱ryong Yesu nu a̱ yet Kristi ni nu a̱ yet ka̱won Ka̱za. Ka̱ a̱yin a̱ gwai a̱tyyi, a̱ ni gwai ka̱won nu brak. 2Ka̱sak ka zi nin bvwo zi gwai na̱won Ka̱za na ni nkpa yet zi ka̱ gwai i tssup ba̱ryat nka ba ansham. 3Cat Ka̱za nkpa yet tssup ba̱ryat nka ba, di ba̱ryat nka ba ba za bvwa dikwu ba. 4Rot kozan ka̱won Ka̱za a̱ maai a̱ rot ka̱sa ka. Wrak ka̱ryong njit nkpa yet diwat ti zi nin dot ka̱sa ka ni. 5A̱nyan a̱ maai rot ka̱sa ka? Seko a̱yin nu a̱ wrak ka̱ryong di Yesu a̱ yet Ka̱won Ka̱za ni.
Shaida tazwa Ka̱won Ka̱za
6Yesu Kristi nu a̱ yin ba: a̱ ba bu ba̱shekwot baptisma bu ba̱sok dikwu nu ba. Bu ba̱shekwot na̱ yin ba mi ba, ba̱shekwot nta̱mak bu ba̱sok. Tswa ji nji bu za tyyei ka̱sak ka kun yet ka̱ryong Yesu a̱ yet Ka̱won Ka̱za ni, rot Tswa ji yet ka̱ryong. 7Nkyang ntat nna yet shaida ji: 8Tswa ji, bu ba̱shekwot ba, bu ba̱sok ba. Sa̱rei nkyang ntat ani shaida mba ji tazwa nu ka yet jring. 9Zi wrak ka̱ryong an shaida ba̱neywu, ma shaida Ka̱za ji ra̱u mbaa ji di cet, Ka̱za a̱ wrak shaida ji tazwa Ka̱won nka ka. 10A̱yin nu a̱ wrak ka̱ryong di Ka̱won Ka̱za ni a̱ byyi shaida jini ka̱yat mpfwa nu, ma a̱yin nu a̱ wrak ka̱ryong i ba a̱ tyyi Ka̱za dira, rot a̱ wrak ka̱ryong an shaida ji Ka̱za ka wrak tazwa Ka̱won nka ka ni ba. 11Shaida ji nji yet: Ka̱za a̱ za ryi sucet wityak ka̱yat Ka̱won nka. 12A̱yin nu a̱ san Ka̱won Ka̱za ka ni a̱ san sucet a, a̱yin nu a̱ ma̱ ka̱n ka̱ san ni ba a̱ wai sucet a.
Zi ni yya ni n shya sucet wityak a?
13N ya jem i yi gi bvwo yi byyi sucet wityak, nyin ba̱nyet ba wrak ka̱ryong diyrek Ka̱won Ka̱za ni. 14Zi byyi gbung rya a̱ta̱ssi Ka̱za, rot bu kyang a zi naai i ka ni za ryi, ki zi wu naai-naai kyang a ku myim ni. 15Kozan ka̱ram zin ka̱ naai i ka ni za hok. Rot zi bvwo ku yet ka̱ryong, zi bu bvwo brak kozan kyang zi naai da̱ nu a̱ ni za ryi.
16Ka ryi a̱wumba nwan na̱ yya a̱ka̱tuk nkyang u a̱ maai dikwu ni ba, a naai Ka̱za ka ku ryi sucet. N dyat bu ba̱nyet ba a̱ka̱tukyya mba nu na̱ maai dikwu ni ba. Ma a̱ka̱tukyya a̱yaan a̱n shyi a̱ na ba di dikwu, n hywa di yi yya a̱duwa tazwa nu ba. 17Yya kyang a wi yet i yet a̱ka̱tukyya, ma a̱ka̱tukyya a̱yaan a̱n shyi a̱ maai hywat a̱yin ba.
18Zi bvwo a̱yin nu a̱ yet ka̱won Ka̱za ni a̱ ni swat a̱ yya a̱ka̱tukyya ba, rot Yesu Ka̱won Ka̱za a̱ ku cam, a̱gwam a̱ka̱tuk tswa nu a̱n ku yya kyang ba.
19Zi bvwo zi yet ba̱nying Ka̱za, ko di ka̱sa ka sa̱rei a̱ shyi an bvak a̱gwam a̱ka̱tuk tswa.
20Zi bvwo brak, Ka̱won Ka̱za a̱ ka̱n ba a̱ bu za tat a̱ssi zi gi bvwo Ka̱za ka̱ryong ka. Sso njit ji shyi an bvak Ka̱za bu Ka̱won nu ka Yesu Kristi. Nu a̱ yet Ka̱za ka̱ryong ka, a̱ shyi bu sucet wityak a.
21Na̱won nzuk, yi ta̱rwam bu na̱za dira na.
Currently Selected:
1 Yohana 5: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
