2 Korinti 9
9
Brang ba̱nyet tssup ba
1N dyi ku yet la̱llei n bo ya jem i i ba̱ryat brang ba̱nyet tssup ba ba. 2Rot n bvwo ka̱sak ka yin cat ba̱ brang a ni, har n na ya gba di ba̱nyet Makidoniya ba. N na ba̱ tyyei da̱ nyin ba̱nyet Akaya ba a̱ ka̱ soma tung nkyang nyyai a̱turya. Ntyyi ka̱ssi nyin ka a̱ hwwut ba̱yanyet ba̱gingang a̱mba ban tyyi ka̱ssi. 3N tom ba̱wumbeyang bani da̱ nyin, rot n cat kyang a n ka̱n dyat tazwa nyin ka ni ku bu yet diraa ba. Se yi rop kozan kyang sak da̱ni di n ka̱n ba̱ tyyei yi ni yya ni. 4Ki ba̱yanyet nyyai Makidoniya a̱ bu cong ba̱ nzuk a̱ ba da̱ nyin a̱ bu shya yi ka̱n yya kyang ba, ku n yet kyang nsum, ba̱lle nyin. Rot zi ya gba ba̱t. 5Nkpa n byyi n nin naai ba̱wumbeyang bani ba yet ka̱son nzuk a̱ ba da̱ nyin, a̱ ga bu tyak tung kyang a yi yin sak ni wrak ni; ba ku bu yet kyang a ba ni ya tssup ni ba, ma yi sook di za̱nang ji yi wwat bu a̱sai ndya ni, ba ba̱ a̱dyying ba.
6Yi bvwo gan ji hywa, “A̱yin nu a̱ nai yak nu bu dissi ni ku ma̱ ni ta ba̱ a̱yayring; ma a̱yin nu a̱ nai ba̱gingang ni a̱ ma̱ ni kprem ba̱gingang.” 7Se koyan a̱ wrak ka̱sak ka na̱n sook ka̱yat rya nu ni, bam bu byyan rya ko ba gwwak a̱yin ba. Rot Ka̱za a̱ cat a̱yin nu a̱ ni wrak bu rya sai ni. 8Ka̱za a̱ byyi cet a̱ ya ryi a̱ ra̱u ka̱sak ka yin cat i, yi gi byyi shya ka̱yat kozan kyang, yi gi wwat bu rya yring n brang kozan taka̱i a̱tsatsak pfong. 9Da̱ni di ban jem ni,
“A̱tsak a̱yin a̱ ka koke a̱ wwat ba̱nyet byyi dizot bu rya yring,
a̱tsatsak nkyang u na̱ yya ni a̱ byyi ka̱hywat ba.”
10Ka̱za a̱mi a̱ wwat a̱keyak zwa ji na̱ ni tup ni a̱ bo wwat kyang a ba ni ya ni; nu a̱mi a̱ ni ya ryi zwa ji yi ni tup ni, a̱ za̱ tyyi zi rai a̱ bo za̱ tyyi disum ti, a̱ tyyi sa̱rei a̱tsatsak nkyang u yi yya ni na̱ byyi ka̱nu-a̱tan yi gi wwat ba̱gingang. 11A̱ ni ya ryi kozan taka̱i shya, yi gi wwat bu rya yring kozan ka̱ram, har ba̱nyet ba a̱ dyep Ka̱za an za̱nang nyin ji ba san da̱ njit i. 12Rot kyang a yi yya ni ba bu ba̱nyet Ka̱za ba a̱mi ku ba̱ jyet sa̱rei nkyangya na ba cat i ba, ma ku bu tyyi dyep Ka̱za ba̱gingang. 13Taka̱i mpfong ani yet shaida tyyi ndya nyin ji, si bu tyyi ba̱nyet ba ba dyep Ka̱za, rot yi bu yya kyang a Ka̱sham Ba̱ryat Yesu ka ka hywa ni, ba bu Ba̱ryat ba yi tyyei ni ba, har yi bu ka kozan kyang a yi byyi ni ba̱set ba̱ mba, nta̱mak bu kpikpit ba̱nyet a ma. 14Ba ni ryi aliheri Ka̱za nu ka ya nang ni a̱ hok ansham nyin, a̱ yya a̱duwa ba̱t a̱zi hywak nyin. 15Zi gwai Ka̱za mi bu za̱nang ji ka za ryi ni, za̱nang ji sswa cet a̱yin a̱ kok ni.
Currently Selected:
2 Korinti 9: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
