2 Korinti 8
8
Ka̱sak ka ba̱nyet tssup ba nin wwat i
1To, ba̱wumbeyang, zi cat yi bvwo aliheri nu Ka̱za ka nang ba̱nyet tssup Makidoniya ba ni. 2Ko ba yin ba̱ me di ka̱bvung ni a̱ yya da̱ mba, sa̱rei ka̱yat ka̱bvung iya ba shyi bu ba̱gwai. Ko ba yin shyi i dizot ni, ba wwat bu ndya mba ba̱zizrak. 3Yi ryok n ya tyyei ka̱ryong: har ma ba yin wwat a̱ seyak kyang a ba byyi ni. A̱mi ban sook ka̱yat ndya mba ka, 4har ma ba za naai a̱ za faan zi ba̱ ryok ba bon brang a̱ ga san ba̱nyet tssup Ka̱za ba a̱ shyi Yahudiya ni. 5Ba yya kyang a zi hwa di ba ni yya ni ba, se ba yen wrak A̱gwam Ka̱za ndya mba na, a̱ si wa bvwa a̱n za ryi a̱ccu mba na ka̱sak ka Ka̱za kan cat i. 6Nkpa n byyi zin tyyi Titut na̱ zzwang tung kyang a yi wwat i. Ko nyyai ka nu a̱ yin soma a̱tsatsak pfong ani. 7Da̱ni yin sseng ansham i kozan kyang ni, rot yi byyi tyyi rya, i si bu bvwo ba̱ryat, i bu byyi bvwo. Yi si bun tyyi ka̱ssi brang ba̱nyet bu gwai a yi za yya mi ni. Rot a̱mi se yi sseng ansham ka̱yat a̱tsatsak pfong ka ni.
8Ba di n ya tyei truwang ba, n cat a̱mi yi bvwo ka̱sak ka ba̱yanyet ba tyyi ka̱ssi i cat brang ba̱nyet bani ni, rot n ga n bvwo ki ba̱gwai nyin ba a̱ yet ba̱nying ka̱ryong. 9Yi bvwo sa̱rei aliheri nu Yesu na̱ za ba mi ni. A̱ yin byyi shya ba̱t, ma a̱zi hywak njit na̱ kpa dizot. A̱ yin cat dizot nu ti i ya ba di shya.
10A̱huhwa nzuk u a̱nuu: Dirya ti seyak ni nyin a̱mi yin yet ka̱son yrek ba̱ryat ba̱ brang ba i si bun yet ka̱tsitsrang tung ka. 11Dolet yi ya ka̱son i zzwang kyang a yi ka̱n sook ni yya ni. Yin tyyi ka̱ssi i kpo tyak da̱ni yi yin sook ni, i zzwang ba̱cicrak bu shya nyin na. 12A̱yin nu a̱n tyyi rya a̱ ni wrak ni, Ka̱za a̱ ku zzim kyang a na̱ sang ni ba. Kyang a na̱ byyi a̱ ni wrak ni, nkpa Ka̱za ka ni san.
13Ba cat njit a ba̱yanyet a̱ byyi ba̱yanyet a̱ sang ba, ma zi cat koyan a̱ byyi ba̱cicrak ba̱yaan. 14Ku myim yi ya ka ba̱ mba, rot nnanini yi shyi mi ba̱gingang kyang a yi nin ba̱ brang ni. Ka̱ram ka̱yaan meyang ba ma̱ bu ya nang kyang a ba byyi ni. To, a ryi yi ba ba̱cicrak bu ba̱yaan. 15Da̱ni di ba̱ryat Ka̱za ban hywa ni,
“A̱yin nu a̱ tung ba̱t ni
di ku ku ra̱u ba,
da̱ a̱yin nu a̱ tung ba̱cincong ni
di ku ku rat ba.”
Titut bu ba̱nyet ka̱cyet nu ba
16Zi dyep Ka̱za mi ka̱sak ka kan tyyi i rya Titut na na̱ sook ya brang a ka̱sak ka njit zin sook nin ya brang ni. 17Zi tyyi na̱ ba da̱ nyin, na̱ shim. Ma a̱ yin sook ba na da̱ nyin nyyai zi ka̱n ku zzim ba. 18Zi tom a̱wumba a̱yring njit ba̱ nu, a̱nuni sa̱rei ba̱nyet tssup ba ba cin i tyyei Ka̱sham Ba̱ryat ka ni. 19Har ma ba̱nyet tssup a̱ bo ku tssa na̱ cong ba̱ njit ka̱ram ka zin breng za̱nang ji naat i Urushalima ka ni, ba̱nyet a̱ ga shya dyep Ka̱za a nji zi bu yet shaida ji zin wrak a̱ccu njit an pfong ani ni.
20Zi cat a̱yin a̱ za tok i ryen na zin yya pfong wwat taka̱i a̱gba̱dang za̱nang ani ni ba. 21Zi kwan i yya kyang a ni myim Ka̱za i bu myim ba̱nyet ni.
22Zi tom a̱wumba a̱yring njit a̱ bai ba̱ mba. Nu ma zi ka̱n ku mak i na̱ta̱ryen ba̱gingang i ryi ntyyi ka̱ssi nu ka. Nnanini a̱ breng rya a̱za̱ nyin a̱n tyyi rya a̱ ya brang ba̱gingang. 23Ma da̱ni di Titut ni, a̱ yet a̱kpondang pfong nzuk i dikwwa ti zi ya yya mi ni. Kpikpit ba̱wumbeyang a, ba̱pfong a̱mi ba̱nyet tssup ba ba tssa a̱ tom, ban bu tyyei shii Kristi na. 24Rot a̱mi, a̱ta̱ssi ba̱nyet tssup i na̱nkrang na̱yaan ni sa̱rei ba̱ nyin yi tyyei ba̱nyet bani cat nyin na, ba ga bvwo ya gba na zi ya gba ni yet ka̱ryong.
Currently Selected:
2 Korinti 8: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
