2 Korinti 10
10
Bulut a̱ ya cin tazwa mpfong Ka̱za ka
1Nzuk Bulut n ya naai rot tung kap bu taka̱i hakuri na Kristi na̱ byyi ni. Yi hywa di ka̱ram ka n dyat ba̱ nyin a a̱ssi ba̱ a̱ssi ni n na ryat ba̱shinshwon, ma ki n bu drok nat zan se n nwa ya ryat ba̱set. 2N ya naai yi ryok tyyi n ba n bu sak ba̱yanyet nyin a̱za̱ndong ba, rot n bvwo ki n shim n wan ba̱nyet ba a̱ hywa di zi tssup ka̱sa kani ni. 3Ku yet ka̱ryong a̱mi zi shyi i ka̱sa ka, ma zi kwan zwang da̱ni di ba̱nyet ka̱sa ba ban kwan ni ba. 4Nkyang nzwang njit a bvwon bu nying ka̱sa na; na yet nkyang nzwang nying ncet a Ka̱za ka za ryi zin byyan ba̱cecet ba̱ra̱ndwan. 5Ko di ba̱nyet ba a̱ sseng akpam a̱cecet ni ma zin ba̱ byyan nta̱mak bu kozan kyang a zzu ka̱hok ni, i teyang a̱ta̱ssi njit nin za bvwo ya ka̱son bu bvwo ba̱ryat Ka̱za ni. Zi gwwak kozan a̱huhwa na hok Kristi. 6Nyin se ka̱ram ka yin shim hok Kristi ba̱sa̱rei ni, zi si ya yya shirya wipfong nyin ji.
7Yi cyang nkyang a shyi ba̱ a̱za̱kpai. Ka̱ a̱yin nyin a̱ hwa da̱ a̱ yet a̱ntyok tssup Yesu, se na̱ bvwo njit meyang zi ma̱n yet ba̱nying Yesu da̱ni da̱ nu ni. 8Ko n si bu ya cin tazwa cet ka A̱gwam Yesu na̱n za ryi zin ya nok ni, ba zin ya hwwei ba, n nin hok nsum ba. 9Ba ba̱wasika nzuk ba a̱ yet ba̱nying ya shyit ba. 10Rot ba̱yanyet a̱ ryat a̱ yya, “Ba̱wasika Bulut ba a̱ byyi cet, ma nu diccu nu ki a ku ryi a̱ maai yet a̱yin ba ma, ba̱ryat nu ba a̱ byyi cet ba.” 11A̱yin nu a̱ byyi taka̱i a̱huhwa iya ni na̱ bvwo: ba̱wasika njit ba zi ya jem mi ni ka̱ram ka zin shyi ba̱ nyin ni ba a̱ bvwon bu kyang a zi ni ba i bu ryat da̱ nyin ni ba.
12To, ma njit zi ni maai i ya mak bu ba̱nyet ba a̱ ya breng ba̱ ntazwa ni ba. Ka̱ram ka ban ya mai ba̱ mba-mba ni a̱ bo ya mai bu ka̱yayat mba ni, ba byyi a̱za̱ncyi ba. 13Ma njit dei, zi ya cin seyak ka̱bvwa ka a̱ yet ka̱njiit ni ba. Ma zi ni ya cin ba̱cicrak bu ka̱bvwa ka Ka̱za kan za tyyi ni, ka̱bvwa ka a̱ bu ya tat ni ma. 14Zi naat gba̱gbang ba ka̱ram ka zin tyyei cet njit a a̱za̱n nyin ni, rot njit yin tason ba bu Ka̱sham Ba̱ryat Kristi ka da̱ nyin. 15Njit zi ka̱ ya cin an pfong a ba̱yanyet ba ka̱n yya ku si seyak ka̱bvwa ka Ka̱za ka za sak i ni ba. Seko zin byyi rya yi ni wrak Ka̱za ndya nyin na, zi gi maai yya nkyang nzaan na Ka̱za ka za tyyi yya na ni, nying na ra̱u nying na yi ka̱n dyi ni. 16Njit meyang zi si ma̱n shya diwat ti zi nin za ka̱son ni bu tyyei Ka̱sham Ba̱ryat ka i na̱byen na̱yaan na a̱ shyi gba̱gbang ba̱ nyin ni, da̱ njit ba naat ya cin an pfong a a̱yanyet na̱ ka̱n yya ni ba.
17Da̱ni di ba̱ryat Ka̱za ban hywa ni, “Ka̱ a̱yin a̱ ni ya cin, ryok na̱ ya cin ka̱yat nkyang ka A̱gwam Ka̱za na̱ yya ni.” 18Rot a̱yin a̱n tyyei diccu nu da̱ yet a̱tsatsak ba, se ka̱ram ka Ka̱za kan ku dyep ni, ba ka̱ram ka na̱ nin dyep diccu nu ni ba.
Currently Selected:
2 Korinti 10: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
