2 Korinti 7
7
1Ba̱wumbeyang nzuk, da̱ni di ban dyat a̱wwon a̱ ni za ryi nkyang ani ni, se zi ryang kozan a̱shishik kyang u a̱ shyi ka̱yat ndwam njit ka bu ndya njit a ni wwon ba̱zizrak. Se zi wrak a̱ccu njit ba̱sa̱rei i tyong Ka̱za.
Rya Bulut sai ba̱ mba
2Se yi za yrang ndya nyin na. Zi byyan a̱yin rya ba, da̱ njit ba byyan a̱yin ba, da̱ njit ba bu bvuk a̱yin ba. 3Ba di n ya yya shirya ba; da̱ni di n ka̱n ya tyyei ni, yi shyi mpfwa njit har zi pfong di zi shyi ba̱ nyin kozan ka̱ram ni, ko zi yet ba̱cet ko zi kwi zi shyi ba̱ nyin. 4Tazwa ba̱ryat, n pfong ba̱set n dyat ba̱ nyin, ya cin nzuk a bu shyi a nyin. Sa̱rei bu ka̱bvung ka zi sswa ni n pfong ba̱ kpa̱u. Ba̱gwai nzuk ba a̱ ra̱u.
5Ko zi bu nwa Makidoniya ni, zi shya pfwi ba. Koke zin brak zi sswa ka̱bvung: Ba̱nyet ba shyi ba an zok ba̱ njit, ka̱wun a̱ si bo tyyi a̱ hywat ndya njit a. 6Ma Ka̱za ka a̱ na ta̱gbak ba̱nyet ba a̱ ryi hwan ni a̱ za ta̱gbak a̱ za ba bu Titut. 7Bu ba nu na diyin a̱mi za ta̱gbak ba, har na̱ bo bu za tyyei ka̱sak ka swat nyin na kun ku ta̱gbak ni. Na̱ bo n tyyei ka̱sak ka yin cat n dyi naani bu dizot nzuk ti yi pfong ni har cat n brang. Ku ni n brang rya sai a.
8Ko wasika nzuk u a̱ bu ya byyan rya, n kun dambvwo ji n ni ku jem ni ba. N yi yen kun dambvwo i ka̱ram ka n nin dyi wasika nu na̱ ya byyan rya i ka̱baram ba̱cincong ni. 9Ma naani n hok ansham; ba di n gwai n ni ya byyan rya ba, ma rya byyan nyin na tyyi yi shei ka̱cyet nyin ka. Ka̱za a̱n yya pfong di rya byyan na; rot a̱mi zi ya yya a̱ka̱tuk ba. 10A̱yin nu Ka̱za ka ku tyyi rya byyan ni, a̱yin a̱ywu a̱ na shei ka̱yat mpfwa nu ka, a̱ shya sucet, kun dambvwo zin shyi i taka̱i iya ba. Ma rya byyan na yet nying ka̱sa na ni cong di dikwu. 11Yi cyang kyang a rya byyan Ka̱za na ku ya ba mi ni: cyang taka̱i ka̱ryong bu ntyyi ka̱ssi na yin tyyi i gi ya tssu wwon ba̱zizrak ni, bu ka̱sak ka yin dak nkyang iya ni, a̱nzan taka̱i ka̱wun, a̱nzan taka̱i cat, bu ka̱sak ka yin tyyi ka̱ssi ryi ba yya shirya ka̱ryong ni. A kozan a̱gbang yi ya tssu tun an kyang ani.
12To, ko n ya jem wasika nu ni, ba a̱yin nu a̱ byyi hywak a ni ba̱diyin n yin ku jem mi ba, ba a̱tuba nu ba ku yya hywak ani ni ba, ma n ya jem mi ba̱sa̱rei nyin i gi ya tyyei ba̱zizrak a̱ta̱ssi Ka̱za ka̱sak ka yin za ryi a̱ccu nyin di ka̱ryong ni. 13Nkpa n byyi zin hok ansham.
Ba ba̱ nkpa za ta̱gbak ba ma, ka̱sak ka Titut na̱ bun za tyyei di yi ku brang i ku ta̱gbak na̱ hok ansham rot rya nu na yin shya pfwi ni, iyemi bu za tyyi shok ba̱t. 14N ya cin ba̱t di Titut, nyin meyang yi ma̱n tun nsum. Kozan ka̱ram zi na ya tyyei ka̱ryong, ka̱sak ka meyang zi na ya cin ni, a̱mi Titut na̱ bun dyi ku yet ka̱ryong. 15Rot a̱mi a̱ ya gwai a̱ ra̱u nyyai ka; ka̱ram ka na̱n yring ka̱sak ka sa̱rei nyin yin pfong zzek nu na ni bu ka̱sak ka na̱ bu nwa yi ku san di ka̱wun bu rwam ba̱trim ni. 16N shyi bu gwai ka̱sak ka n nin byyi rya a nyin ba̱zizrak ni.
Currently Selected:
2 Korinti 7: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
