2 Korinti 13
13
A̱ngbom ba̱ryat bu byet
1Nkrang a̱mba̱tat ji njii n nin bai da̱ nyin. Ba̱ryat Ka̱za ba a̱ hywa, “Se ba̱nyet ba̱hwa ko ba̱tat a̱ wrak shaida, ba si wa bvwa a̱n hwaat a̱yin shirya.” 2I yin ba a̱mba̱hwa nzuk a n bu ya kam. Ko n nin shyi zan ni n bo n ya tssap. Ki n bu ba da̱ nyin, ba a̱yin nu i ba̱nyet ba a̱ ka̱n yya a̱ka̱tukyya, di ba̱nyet nyyai ba di ba̱nyet ba̱nyying ba, a̱ ni shot ni ba. 3Ka̱tuk iya a̱mi yi nin bvwo di Kristi a̱mi a̱ byyi ba̱ryat ba n ya tyyei ni. Kyang a na̱ yya ba̱ nyin ni tyyei sang cet nu ba, seko ku tyyei cet nu na. 4Ko ku yin yet cet rat a̱mi, na̱ kwu tazwa ka̱teyang ka; ma ka̱yat cet Ka̱za a̱ bo yet a̱cet. Ki zi ma̱n zzak ncet to, rot zi yet kyang yring ba̱ nu. Ma ka̱yat cet Ka̱za zi ni swrang ba̱ nu i gi ya yya pfong.
5Se yi ya mai i ryi ki yi swat ka̱yat ka̱ryong ka. Nyin yi bvwo ba̱zizrak yi byyi Yesu Kristi ka̱yat ndya nyin kaa? Ki yi hwan ba̱sa̱rei a̱ra? 6Ma se yi si bu bvwo njit a̱mi hwan ba. 7Zi naai Ka̱za yi bu ryok nwa a̱ka̱tukyya a̱yaan ba, ba ba ga ryi pfong njit a kun wruk tsutswat ba, ma yi gi yya kyang a myim ni ko di ku nin dyi di zi hwan ni. 8Rot njit zi ni maai i ya sseng a̱gagak bu ka̱ryong ka ba, seko zi wu ka̱ tssup. 9Kyang gwai njit a̱mi ki zi sang cet, ma nyin yi kpo byyi. Nkpa zi naai yi gi yet ba̱jyem. 10Nkpa n byyi n ni ya jem nkyang ani ka̱ram ka n nin shyi zan ni. N cat n bu nyyai n bu ya kpa di diryen, n ga ya tyyei cet na A̱gwam njit na̱ n dyi ni ba. Cet nu na na̱ n dyi ni yet nying ya nok, ba nying ya sam zzwam ba.
11A̱ngbom ba̱wumbeyang, yi gwai! Se ka̱tuk ka̱yaan. Yi kwan i gi shya yet ba̱jyem. Yi hok naai nzuk a. Yi ryok a̱huhwa nyin nu a̱ yet a̱yring, i swat ansham bu ba̱yaan. A̱mi Ka̱za ka a̱ yet a̱cat ba̱nyet ni a̱ bo ba̱ cat di tsswa nda ni a̱ ni swrang ba̱ nyin.
12Yi ya byei di ba̱wumbeyang ni.
Ba̱nyet tssup ba kyi sa̱rei a̱ ya byei.
13Aliheri A̱gwam Yesu Kristi bu cat Ka̱za bu mon diccu Tswa nka ti i swrang ba̱ nyin sa̱rei.
Currently Selected:
2 Korinti 13: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
