2 Korinti 12

Nkyang a ba tyyei Bulut i ba̱zzak ni

1Dolet a̱mi n ya gba ko n nin bvwo ba̱gba ba a̱ myim ni ba. N ya tyyei kyang a A̱gwam nzuk u Yesu na̱ n tyyei i ba̱zzak ni. 2N bvwo a̱ntyok tssup a̱yaan a̱rya swak ba̱ a̱naai a a̱ seyak ni ba yin ku wup a̱ nat i a̱tantai nTazwa ka. (Ki kun dyi a̱mi ooo, ki ba̱zzak na̱ ma̱ yin zzak oo, Ka̱za ba̱diyin a̱ bvwo.) 3N bo ni hywa, ba yin ku wup a̱ nat ba̱ nu Ka̱ryi Pfwi. (Ma brak ki ba̱zzak oo, ki ku ma̱ yin dyi a̱mi oo, Ka̱za ba̱diyin a̱ bvwo.) 4Ka̱ yemi na̱ sin hok nkyang a ba shim a̱neywu na̱ tyyei ni ba, di diryem ti ni maai i na̱ ryat ba. 5N ya gba ka̱sak ka Ka̱za ka nin dyi taka̱i ba̱zzak iya ni, ba diccu nzuk n ni gba ba. Seko nkyang a tyyei sang cet nzuk a ni. 6Ki cat ba̱gba ba a̱mi ma n ya gba, ku ni yet bvwon ba, rot ka̱ryong a̱mi n dyat. Ma n ni ya gba ba, rot n cat a̱yin a̱ tyyi a̱huhwa nu nu ba̱gingang a̱za̱ nzuk a̱ wa wwon kyang a n yya bu kyang a n dyat ni ba.

Ka̱za a̱ ta̱gbak Bulut di gugwak nu ti

7Ba tyong bu ya gba n si ra̱u ka̱bvwa ka rot a̱cecet ba̱zzak u n si ryi ni. Ka̱za a̱ n tyyi hywu i rwam nzuk a ku ryi da̱ a̱pfong Ka̱ta̱nyrang ni, ku n zzap tyei, ho n bu ya cin n da̱u. 8Nkrang ka̱tat n yya a̱duwa, n naai A̱gwam Yesu na̱ n tun da̱ nkpa 9na̱ hywa da̱ nzuk “Za̱nang nzuk ji na̱ maai, rot cet nzuk a a̱mi yet a̱kpok ka̱ram ka an sang cet i.” Rot a̱mi n da̱u koyan di ba̱gwai ba, rot n hyong rat cet nzuk a n ga hok ka̱sak ka cet Yesu na ku ni n cam ni. 10Di sang cet a, di ditok ti bu ka̱bvung ka n sswa a̱zihywak Kristi ni n na̱ san di rya sai. Rot ka̱ram ka n nin hok digugwak ti ni, ka̱ram iya a̱mi n nin hok cet.

A̱huhwa Bulut tazwa ba̱nyet Korinti

11N dyat anye a̱bvwon a̱yin, ma nyin n byyi n nin yya a̱mi; nyin a̱mi yet ba̱nyet ba ni ryat a̱tsatsak nkyang tazwa nzuk ni! Rot ko n nin yet kyang ni ba, nzuk n yet ka̱baan di ba̱nyet iya yin yei ba̱cecet ba̱pfong ni ba. 12Nkyang ka̱hat bu nying ka̱wun na a̱yin na̱ ni yya a̱n tyyei a̱ yet a̱pfong Kristi ni, n yi na̱ yya bu hakuri a a̱ssi nyin. 13Bu ka̱bvwa ka yin bvat kpikpit ba̱nyet tssup a i na̱bvwa na̱yaan na ni nka a̱ yet n yi ya zzim kyang ba. N ya naai yi n cii ka̱ywap iya.

14Bai a̱mba̱tat nzuk a naani n zzop n bai da̱ nyin, da̱ n bo ni ya zzim yi n brang di kyang ba. Nyin a̱mi n cat, ba zwa nyin ji ba. Ki zi tssup swat ka̱sa na ma, ba̱tyyi a̱ na ssang di na̱mawon ba, na̱mawon a̱mi a̱ wa na ssang di ba̱tyyi ba. 15Ku ni n yet kyang gwai a̱mi n hywat sa̱rei kyang a n byyi ni nta̱mak bu diccu nzuk ma n ga n ya brang-brang. Ki n ya gwai n da̱u, nkpa ni tyyi gwai a yi n gwai ni i nwa zzak o?

16Yi ni shim n yin cat ya tyyi cot ba. Ma shim a̱yanyet a̱ hywa di n yin bu ya raai n ya bvei diraa rot n yin san kyang da̱ nyin ba. 17To ni? N ya bvwa n cong i ba̱nyet ba n tssop da̱ nyin ni e? 18N yin naai Titut nta̱mak bu a̱ntyok tssup a̱yaan ba ba da̱ nyin. To, ki Titut nu a̱ yin bu ya bvwa a̱n cong? Anye ka̱cyet njit ka, nzuk bu Titut, a̱ yet bu ka̱yring o? Kyang a zi bu cat ni i yet bu yring o?

19Shim yi ni hwa di zi cat bu ka̱bvwa sak tak a a̱ssi nyin. Kaai. Zi ryat a̱ta̱ssi Ka̱za da̱ni di ba̱nyet tssup ni. Ba̱kpondang, kyang a ni ya brang ni nkpa zi yya. 20Ka̱wun a̱ n za. Ki n bu ba n bu shya yi bu ryi di ka̱sak ka n nin cat yi ryi ni ba, da̱ nyin ba nin dyi ka̱sak ka yin cat n dyi ni ba. Ki n bu ba n bu shya yi kpa swam bu ba̱yaan, yya diryen bu ba̱yaan. Ki n bu shya yi shyi an zok bu ba̱yaan. Ki n bai n bu shya ba̱shwwang bu cat diccu bu pfwei ba̱yaan ku ya sook. Ki n bu shya cat yet bu jyi ba ya nwa? 21Ka̱wun a̱ n za, ki n bu ba Ka̱za a̱ bu n tyyi rat a a̱ssi nyin, har n kun i hywak a̱ka̱tukyya nu ba̱yanyet ba yya nyyai gba̱gbang a̱ rak wwon kan-a̱naan nu bu ka̱pfwa ka ba ka̱n nwa ni.

Currently Selected:

2 Korinti 12: kaj

Highlight

Copy

Compare