2 Korinti 11

Bulut bu ba̱pfong diraa

1Ki yi shim yi yen yya hakuri ba̱ nzuk, ho n yya brik ba̱cincong. Yi wu ka̱n yya hakuri nu. 2N pfong a̱za̱ nyin da̱ni Ka̱za kan pfong a̱za̱n nyin ni. Yi ryi da̱ a̱zizrak ka̱neyang u n ka̱n dop n wwon ba̱ a̱yanyet n ni ku ryi ni; ba̱ a̱tuba a̱yring a̱mi, nu a̱ yet Kristi. 3Ma n pfong ka̱wun ndya nyin na na bu kyyai, a̱tsatsak tssup u a̱ ya kaat, ku ryi di Ka̱ta̱nyrang ka yin tyyei Hawa'u a̱za̱ncyi a̱ ku raai ni. 4Kyang a n byyi n nin hywa a̱mi ni, rot koyan a̱ ba da̱ nyin a̱ bu yya wa'azi Yesu a̱yaan ba̱zan ba̱ a̱nu zi ka̱n yya nyyai ka̱tsitsrang ka ni ba, ko yi san tswa ka̱ta̱nyrang bvwon bu Tswa Ka̱za ji yi ka̱n san ni, ko ba̱ryat ba̱yaan ba a̱ bvwon bu Ka̱sham Ba̱ryat ka yi ka̱n san da̱ njit i. Yi yya ansham ba n ba̱ ssang.

5Ma n hwa a̱yin ka̱yat ba̱nyet iya yin yei ba̱cecet ba̱pfong Yesu ni a̱ n dan ba. 6Ko n yet a̱ntyok bvwo ka̱nu ba ma n shyi bu bvwo, kuma ka̱ram ka zin shyi ba̱ nyin ni yi ryi bvwo nzuk a bu swat nzuk a ba̱zizrak i kozan ryen.

7N yin san zang da̱ nyin a wa'azi Ka̱sham Ba̱ryat Ka̱za nu n yin ya yya mi ni ba. Da n yin ya yet ba, n ga ya tyyi shii. Ku yin yet ka̱ywap da̱ nzuk o? 8Ka̱ram ka n nin yya pfong da̱ nyin ni, zang nzuk ji yin nyyai di ba̱nyet tssup i na̱bvwa na̱yaan. Ku ryi di n yin ba̱ bvei n cong a̱mi n ga ya brang. 9Da n yi ya zzim krum ba ka̱ram ka n nin shyi ba̱ nyin ni. Ba̱nyet tssup ba a̱ yin nyyai Makidoniya ni a̱ yin breng kozan kyang a̱ bu n dyi. Da̱ni di ku ka̱n dyi ni, a̱mi ku bu nin dyi, ho n bu ya tyyi cot. 10N ya tyyei: tun ka̱ryong Kristi ka kan shyi ba̱ nzuk ni, ba a̱yin nu a̱ shyi i ka̱byen Akaya ka a̱ ni-ni n bvwo ya cin nani ni, ka̱sak ka n nin wi san krum da̱ nyin ni. 11Ho a̱nzan? Di n ya cat baa? Ka̱za ma a̱ bvwo n ya cat!

12N ni ya ka̱son bu kyang a n yya naani ni n ga hweyak ba̱pfong iya ryen ya cin di zi yya bu pfong yring ba̱ mba. 13Ba̱nyet iya a̱ yet ba̱pfong ka̱ryong ba. Sa̱rei mba ba yet ba̱pfong diraa, ma ba ya bvan a̱ cat ba ba̱ cyang ba̱cicrak bu ba̱pfong ka̱ryong Kristi ba. 14Di ku yet kyang ka̱hat ba, rot Ka̱ta̱nyrang meyang a̱ na ya bvan a̱n yya a̱jijyat a̱pfong Ka̱za. 15Rot a̱mi ku ni yet a̱hwai kyang ba ki ba̱kwwa nka ba a̱ ya bvan a̱n yya a̱tsatsak ba̱pfong. Ma nom n shyi cong bai koyan a̱ ni san zang pfong nu.

Bulut a̱ ya cin ka̱sak ka na̱n sswa ka̱bvung ni

16N bo hywa, da̱ a̱yin a̱ ryok n cyang da̱ a̱bvwon ni ba. Ma ki yi n cyang a̱mi, yi san da̱ni yi ni san a̱bvwon ni, n ga ma̱ shya kyang a n ni ya cin ni. 17Ma kyang a n dyat ni ba nkpa a̱mi Ka̱za ka ni shim n hywa ba, ma di ba̱ryat ya cin bani n dyat da̱ a̱bvwon ni. 18Ma da̱ni di ba̱nyet ban shyi ba̱gingang a̱ cin a̱ccu mba ni, nzuk ma n ni ya cin. 19Ma nyin ka̱sak ka yin byyi a̱za̱ncyi ni yi kula bu bvwon njit a ba. 20Yi kula bu ba̱nyet ba a̱ ya tyyi i dikwwa, ko ban ya bvwa a̱n cong ni, ko bu tssem a ba ya tssem ni bu ryihywat a ba ya yya mi ni, har bu tsot a a̱ssi. 21Yi hywa di n yet a̱bubvot a̱yin to, n shim n yet ba̱ a̱bubvot a nkyang iya.

Ma ka̱ a̱yin a̱n shyi a̱ ni ya cin, di wai nzuk ani n ma̱n pfong ka̱wun ya cin ba. 22Ba yet Ibraniyawa a? N ma̱n yet. Ba yet ba̱nyet Isreila a? N ma̱n yet. Ba yet na̱mbvon Ibrahim o? N ma̱n yet. 23Ba yet ba̱kwwa Yesu o? (Nzuk n dyat da̱ni di a̱tyong jyik ni.) N ma̱n yet a̱tsatsak a̱kwwa n ba̱ ran. N ka̱n yya pfong n ba̱ ra̱u. N ka̱n nwai a̱jaru n ba̱ ra̱u. Ba ka̱ n tsot da̱ a̱yo a̱ ba̱ ra̱u. N si bo naat shishrek bu dikwu ba̱t. 24Nkrang ka̱pfon ba̱nyet Yahuda ban twang a̱yo nswak ntat ba̱ a̱kumbvuyring. 25Ba̱cecet Rom a̱ n tsot di shan a̱ bvwa ka̱tat. Ba n mang di kpang nkrang ka̱yring. Nkrang ka̱tat jirgi ba̱shekwot ku hwwei ba̱ nzuk, har ka̱ram ka̱yaan n yya a̱sa nswak hwa ba̱ naai ka̱yat ba̱shekwot. 26I na̱cyet nzuk a kozan ka̱ram n shyi ka̱nu dikwu a ncen, n shyi ka̱nu dikwu a mbvak ba̱nyet a̱tsaai. N bo nshyi ka̱nu dikwu a mbvak ba̱wumbeyang nzuk ba̱nyet Yahuda bu nwap nzaan. Ka̱ram ka̱yaan n shyi ka̱nu dikwu ka̱yat ka̱nkrang, ka̱ram ka̱yaan ka̱yat ka̱yit, ka̱ram ka̱yaan ma a a̱yuywu ba̱shekwot. Ka̱ram ka̱yaan n shyi a mbvak ba̱rywai diraa. 27Ki n yya n kwwat ka̱tuk, ka̱ram ka̱yaan nda n shyi ba. Ka̱ram ka̱yaan cihywat bu na̱shyi. Ka̱ram ka̱yaan wun shrim bu ka̱gbyang.

28Zi bring nkyang nzaan ma, kozan ka̱ram n shyi ba̱ a̱huhwa ba̱nyet tssup u koke. 29Ki nkap a̱yin ta̱ruk, nzuuk a ma ta̱ruk. Ka a̱yin a̱ ma̱n kpa a a̱ka̱tukyya, dolet n hok dikwu.

30Ki dolet a̱mi n ya cin, n ni ya cin tazwa nkyang ka tyyei sang cet nzuk a ni. 31Ka̱za a̱tyyi A̱gwam njit Yesu ka zi dyep diyrek nka har a̱ba̱da ni a̱ bvwo ba̱ryat nzuk ba a̱ yet diraa ba. 32Ka̱ram ka n yin nwa ka̱nkrang Damaskut ni, gwamna nu A̱gwam Atitat na̱ yin tyyi ka̱ yemi ni a̱ tyyi ban hwwun ka̱nu ka̱nkrang ka a̱ n pyyem. 33Se ba ni n tyyi ka̱yat a̱gba̱dang ka̱nshang a̱ kwwat a̱ wruk i dibvong ka̱tanga n sin shot an bvak nu na.

Currently Selected:

2 Korinti 11: kaj

Highlight

Copy

Compare