1 Timoti 5
5
Ka̱sak ka zi nin swat bu ba̱nyet tssup ba ni
1Ryok byat a̱kukwo a̱yin ba, ma ryat ba̱shinshwon ba nu da̱ni da̱ a̱tyyi nwan ni. Yya bu zam ji di ba̱wumbeyang ni. 2Yya bu ba̱nekwo ba̱nyring ba di ba̱naa ni, i bu breng na̱neyang ba̱nyring a di ba̱wumbeyang ni ba̱ a̱zizrak a̱huhwa.
3Breng ba̱nyring ba a̱ yet ba̱kpotyok ka̱ryong ni ansham wato ba̱nyring ba a̱ sang ba̱nyet ba̱ brang ni. 4Ma a̱kpotyok u a̱ byyi na̱won ko na̱mbvon ni, dolet mba a̱ ni ku breng, ka̱sak ka kun myim ba̱nyet tssup Ka̱za ba a̱n yya ni. Dolet ba cam ba̱tyyi mba ba bu ba̱tyyi a̱kwop ba, da̱ni di mba ba̱tyyi ba ba ka̱n breng na̱won ani, a̱mi tssup njit a kun cat. Ka̱za a̱ bo pfong ansham nkpa. 5A̱kpotyok a̱ra̱mbyring u a̱ shyi ba̱diyin ni, a̱ na wrak Ka̱za diccu nu. Kozan ka̱ram a̱ yya a̱duwa ka̱ta̱nom bu ka̱ta̱tuk a̱ naai Ka̱za ka ku brang. 6A̱ra̱mbyring u a̱ yet a̱kpotyok a̱ swat bu hok ansham ka̱sa nani ni, ko na̱n sso ni a̱ shyak bu kom ba. 7Ba̱ tyyei nkyang ani, ho a̱yin a̱ bu ba̱ pfwei. 8A̱yin nu a̱ ya yei a̱ntyok tssup ma a̱ rak wwat ba̱nyet nu ko ba̱tyyi bu ba̱wumbeyang nu ni nkyang swat ka̱sa na, taka̱i a̱yin iya a̱ rak ka̱ryong ka. Ba̱nyet ba a̱ yet ba̱nyet witssup ni ma ba ku ran.
9Ryok twang a̱ra̱mbyring tyei bu ba̱kpotyok ba, se a̱rya nu na a̱ seyak nswak a̱kitat, na̱ bo yet a̱yin nu a̱ yin swat a̱tsatsak swat ba̱ a̱ntyok nu nu ni. 10A̱ ni yet a̱tuba nu ba̱nyet ba pfong ansham mpfong nu ni, a̱yin nu a̱ ka̱n breng na̱won nu ansham, a̱ bo gwai ba̱yecen, a̱yin nu a̱ gwai ba̱nyet tssup ba ni, a̱ bo brang ba̱nyet ba a̱ nwa i ka̱bvung ni, a̱ tyyi diccu nu i yya nkyang a Ka̱za ka cat i.
11Ryok n tyyi a̱yiyrek ba̱nyring a a̱ ka̱n wi kop ni ba̱kpotyok ba, rot ka̱ram ka ba bun drok cat nyreng ni ba ni brak ka̱ryim a̱ sak Yesu mi. 12Ki ba yya a̱mi, ba ni ya kwwat shirya, rot ba jing ba̱ryat ba ba ka̱n dop a̱wwon di ba bo ni nyreng ni ba. 13Shim ba bo nwa dikpam, a̱ nwa ki nwwai na̱sa; bam ba̱ a̱mi ma, shim ba nwa ba̱shwwang, a̱ nwa tyei na̱nu mba i ba̱ryat ba̱yanyet, a̱ nwa ryat nkyang a myim ba hok i na̱nu mba ni ba. 14Nkpa n byyi ku nin yet ka̱sham na̱neyang ba̱nyring a a̱ yreng a̱ tyei na̱won a̱ breng na̱sa mba, ho a̱ra̱ndwan njit u a̱ bu shya kyang ditok. 15Na̱neyang ba̱nyring ba̱yaan na a̱ yet ba̱kpotyok ni a̱ wa ka̱n nwa ntam, a̱ brak a̱ tssup Ka̱ta̱nyrang. 16Rot a̱mi a̱ra̱mbyring tssup u a̱ byyi ba̱kpotyok ba̱nyring i a̱gbang nu ni na̱ ba̱ breng a̱ ryok rak a̱ wwon ba̱nyet tssup i ba, ba̱nyet tssup ba a̱ ga ma̱n shya diwat cyang ba̱nyet ba a̱bibyyi a̱yin ni ba.
17A̱kwak-ka̱son nu a̱ yya pfong ansham ni ba ku ryi shii a̱ bo ku tan a̱ ra̱u kpikpit ba̱nyet a, tun ba ba̱nyet ba a̱ yya wa'azi a̱ bo zzek ba̱gingang ni brak. 18Ba̱yrat Ka̱za ba a̱ hywa, “Nyak ji na̱ yya pfong ni, ryok za̱ yim kyangya ba.” Ka̱bvwa ka̱yaan ba̱ryat Ka̱za ba a̱ bo hywa, “Tan a̱yin nu a̱ na̱ yya pfong ni ba̱cicrak bu pfong nu na.” 19Ryok san a̱tyyak tazwa a̱kwak-ka̱son n yya pfong ba, se a hok ka̱nu ba̱nyet ba̱hwa ko ba̱tat. 20Ki ba shya na̱ yya a̱ka̱tukyya, a ku byat ka̱yat ba̱nyet, kpikpit ba̱nyet a i gin tyong nom yaan.
21A̱ta̱ssi Ka̱za bu Yesu Kristi bu ba̱pfong Ka̱za n kwak a̱pfo nwan, a yya nkyang ani i ryok cat ba̱yanyet i rak ba̱yanyet ba. 22Ryok gha i tyyi a̱yin yya pfong Ka̱za ba, yen cam ka̱cyet nu ka. Ryok tssup a̱ka̱tukyya ba̱yanyet ba. Tun mbvak nwan, i sseng zan.
23Ryok sseng bu i sswa ba̱shekwot ba. A nan sswa ba̱shekwot a̱nap ba̱cincong, i gi pfong ansham ka̱hwa nwan na gwai na̱ yya na ni.
24A̱ka̱tukyya ba̱yanyet a̱ shyi ba̱ a̱za̱kpai. Ba̱nyet ba̱gingang a̱ bvwo ba ni ba̱ yya shirya; ma nying ba̱yanyet shyi nrang, seko ku ri naat wruk ba a̱ta̱sa. 25A̱mi meyang zin cyang a̱tsatsak mpfong ba̱yanyet ba̱zizrak, ma kpikpit a ni swrang nyat hat a̱ba̱da ba.
Currently Selected:
1 Timoti 5: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
