1 Tasaloni 5
5
Yi swat cam
1Ma ba̱wumbeyang, da̱ni di ka̱ram ba nu ka ni, ba se zi ya jem i ba. 2Rot nyin ma yi bvwo ka̱tuk ba A̱gwam njit ka a̱ ni hyok da̱ a̱tang na̱ nan nwa a̱ta̱tuk ni. 3Ka̱ram ka ba̱nyet ban shyi ryat myyi ndya bu wi pfong ka̱wun ni, ka̱bvung a̱ ba̱ nwa ba ahwa, da̱ni da̱ a̱mbyring ka̱hwa na̱ nan kun bu byyin ni, di ba ni byyi ryen shot ba. 4Ma nyin ba̱wumbeyang yi shyi an dyin ba, ba̱lle nom iya i bun ya ba da̱ a̱tang ni ba. 5Rot sa̱rei nyin yi yet na̱won a̱ta̱nom, bu na̱won ka̱bvwa sai. Zi yet na̱won ka̱tuk ko na̱won ndyin ba. 6Rot a̱mi zi ta̱rwam zi bu kai nda di ba̱yanyet i, seko zi swat ba̱ a̱ssi njit zizrak n cam. 7Rot ba̱nyet tssak nda ba a̱ na kai a̱ta̱tuk, ba̱nyet ba ma̱n swei nkwwa na ni a̱ swei a̱ta̱tuk. 8Ma njit zi yet ba̱nying a̱ta̱nom, rot a̱mi se zi cam i ryok hyong, gwai ba̱yaan bu tyyi ndya njit a i yet a̱ryet u zi nin ya cam ni, byyi rya i shya sucet njit i ryi di a̱ka̱te ntswam u ni. 9Ka̱za a̱ za sak i diryen nka ba, seko sucet wi tyyai ka̱yat A̱gwam njit Yesu Kristi, 10njit a̱mi na̱ kwu zi hywak njit a, rot ko zi yet ba̱cet ko zi shyi nda ba bu shya zi shyi swat ba̱ nu. 11Rot a̱mi, se yi ta̱gbak ba̱yaan ndya na bu nok ba̱yaan, da̱ni di yi ka̱n sook ni.
A̱ngbom ba̱ryat
12Ba̱wumbeyang, zi ya naai yi tyong ba̱nyet ba a̱ ya yya mpfong a ba̱gingang ni, ba̱kwak-ka̱son nyin ba a̱ ya zzek ka̱yat A̱gwam Yesu ni. 13Yi ba̱ ryi shii i ba̱ gwai rot pfong a ba yya ni, i bu swat ansham bu ba̱yaan.
14Zi bu ya naai, ba̱wumbeyang: yi kam ba̱rentong ba, ba̱nyet ba ndya mba na ka̱n tyyi cet i ba yi ba̱ brang, i bu brang ba̱nyet sang cet ba, i yya hakuri bu koyan. 15Se yi ta̱rwam, yi ryok brek a̱ntyok a̱kpot i da̱ a̱kpot ba, ma kozan ka̱ram yi tyyi ndya i yya ba̱yaan a̱tsatsak bu sa̱rei ba̱nyet ba.
16Yi gwai kozan ka̱ram 17bu yya a̱duwa kozan ka̱ram 18bu san kozan kyang a ya ba ni di shok. Nkpa yet nkyang a Ka̱za ka cat da̱ nyin i swat mon diccu nyin na bu Yesu ni. 19Yi ryok zzap Tswa Ka̱za ji tyei ba, 20i ryok byyai ba̱ryat Ka̱za ba ba̱nyet ba pfong ni ba. 21Seko yi na mak kozan kyang: nying na yet i yi kpo breng ansham 22i tyong kozan taka̱i na̱kpot.
23Ka̱za di bvak nka a̱mi a̱ wwat tsswa nda na, a̱ ni ya jrang sa̱rei, a̱ bvo cam tswa nyin ji bu sso nyin ji bu ndwam nyin na, yi gi bu yet ba̱nyet sang hywak bu ditok ka̱tuk brek A̱gwam njit Yesu Kristi. 24A̱tuba nu a ya yei ni a̱ yet a̱ntyok ka̱ryong; rot a̱mi a̱ ni ya yya kyang a na̱n ya yei ni.
25Ba̱wumbeyang, njit ma zi cat yi za yya a̱duwa.
26Yi byei ba̱yaan da̱ a̱zizrak byei.
27N cat ka̱yat cet Ka̱za yi twang wasika a̱ni a pfwo ba̱nyet tssup a sa̱rei.
28A̱liheri A̱gwam njit Yesu Kristi a̱ swrang ba̱ nyin. Amin.
Currently Selected:
1 Tasaloni 5: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
