2 Tasaloni 1
1
1Nyyai di Bulut bu Silwanut bu Timoti, zi jem ba̱nyet tssup ba a̱ shyi Tasalonika mi ni, ba̱nyet ba a̱ yet ba̱nyet tssup A̱tyyi njit Ka̱za bu A̱gwam njit Yesu Kristi ni.
2Ka̱za A̱tyyi njit bu A̱gwam njit Yesu Kristi a̱ ya ryi a̱liheri bu tsswa nda.
Shirya ka̱ram bai Yesu
3Ba̱wumbeyang, dolet zi dyep Ka̱za mi kozan ka̱ram a̱zi hywak nyin. Ku myim njit zin yya a̱mi, rot ntyyi ndya nyin na kun brang ni, har gwai a yi gwai ba̱yaan ni i ra̱u nyyai ka. 4Nkpa n byyi zin yet a̱ccu njit a sa̱rei ka̱yat ba̱nyet tssup Ka̱za ka; zi yet a̱ccu na rot ka̱sak ka yin byyi hakuri ni bu tyyi ndya nyin na sa̱rei ka̱yat ka̱bvung ka yi sswa ni, bu yya na ba yya da̱ nyin ni.
5Sa̱rei nkyang ani za tyyei ka̱sak ka shirya Ka̱za ji zin yet ka̱ryong ni, bu tyei ba ya twang a̱ tyyi i ba̱nyet ba a̱ maai a̱ nwa i Dityok Ka̱za ti ni; nkpa a̱mi si bu yet hywak sswa ka̱bvung nyin na. 6Ka̱za a̱ ni yya kyang a myim ni: ka ni tyyi ba̱nyet ba a̱ yya da nyin ni i ka̱bvung 7a si bo ya ryi pfwi, nyin ba̱nyet ba a̱ sswa ka̱bvung ka ni, har nta̱mak ba̱ njit. A̱ ni yya a̱mi ka̱tuk ka Yesu A̱gwam njit na̱ nin brek bu ba̱cecet ba̱pfong Ka̱za ba nyyai Tazwa bu diryem ndong ni, 8a̱ ga bu nyep ba̱nyet ba a̱ rak san Ka̱za ni bu ba̱nyet ba a̱ rak tssup Ka̱sham Ba̱ryat Yesu Kristi ka ni. 9Shirya mba ji byyi tyak ba; ba sswa ka̱bvung di ba bo byyi ryi a̱ssi A̱gwam Yesu bu a̱gba̱dang shii nu nu ba, 10ka̱tuk iya na̱ nin ba san digba̱dang nu ti ni nyyai di sa̱rei ba̱nyet nu ba bu gwai nyyai di ba̱nyet ku tssup ba sa̱rei. Yi ma̱ nin shyi ka̱yat mba, rot yi san ba̱ryat ba zi ya tyyei ni.
11Nkpa n byyi kozan ka̱ram zi ya yya a̱duwa, Ka̱za njit ka a̱ ga ya tyyi yi maai yei nka na, ka̱yat cet nka ka ka ya yya sa̱rei a̱tsatsak nkyang u yi cat yya na ni bu kozan pfong nying ntyyi rya. 12Zi yya a̱duwa a̱ni, diyrek A̱gwam Yesu njit ti i gi shya shii a̱ nyin, nyin meyang ka̱yat nu. A̱liheri Ka̱za njit nu bu A̱gwam njit Yesu Kristi nu a̱ tyyi zin shya nkyang ani.
Currently Selected:
2 Tasaloni 1: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.