1 Yohana 4

Tswa Ka̱za bu nying A̱ra̱ndwan

1Ba̱rywai nzuk, yi ryok wrak ka̱ryong a kozan a̱yin nu a̱ hywa da̱ a̱ byyi Tswa Ka̱za ni ba, ma yi ba̱ mai i gi bvwo tswa ji yet nying Ka̱za ni, rot ba̱nyet bvei diraa i diyrek Ka̱za a̱n shyi ba̱gingang a̱ kan cong ka̱yat ka̱sa ka. 2Ka̱sak ka yi nin bvwo Tswa Ka̱za ji ni kankaa: a̱yin nu a̱ shim di Yesu Kristi a̱ ba ka̱yat rwam a̱neywu ni, a̱ byyi Tswa ji nyyai ka̱rek Ka̱za ni. 3Ma a̱yin nu a̱ ton ka̱sak ka Yesu na̱n ba ka̱yat rwam a̱neywu ni a̱ byyi Tswa Ka̱za ba. Taka̱i ntswa na na̱ byyi ni ku nyyai da̱ A̱ra̱ndwan Yesu. Yi yin hok da̱ bai, ma n ya tyyei, a̱ shyi ka̱sa ka nnani.

4Ma nyin na̱won nzuk, yi yet ba̱nying Ka̱za, nyin ba bu ka̱n dot ba̱pfong dira ba, rot Tswa ji yi byyi ni byyi cet ra̱u nying ji ba̱nyet ka̱sa ba ba byyi ni. 5Mba ba na ryat bu nkyang ka̱sa na ni, ba̱nyet ka̱sa ba a̱ ma̱n ba̱ pfong rot ba yet ba̱mbaa. 6Ma njit, zi yet ba̱nying Ka̱za. A̱yin nu a̱ bvwo Ka̱za ni a̱ ni za pfong. A̱yin nu a̱ ma̱n yet a̱nying Ka̱za ni ba a̱ ni za hok ba. A̱mi zi nin bvwo Tswa ka̱ryong ji bu nying dira ji.

Cat Ka̱za

7Ba̱rywai nzuk, zi ya gwai rot yagwai nyyai di Ka̱za. A̱yin nu a̱ gwai ba̱wumbeyang ni a̱ yet ka̱won Ka̱za, a̱ bo bvwo Ka̱za. 8A̱yin nu a̱ gwai ba̱nyet i ba a̱ bvwo Ka̱za ba, rot Ka̱za ka yet cat. 9Ka̱sak ka Ka̱za kan tyyei cat nka na ni nkpa yet tom a ka tom Ka̱won nka ba̱diyin ni ka ba ka̱sa zi gi shya sucet. 10Ka̱sak ka zi nin bvwo cat ani: Zi gwai Ka̱za, ma gwai njit a nkpa tyyei cat a ba. Zi ryi cat a i cat a Ka̱za ka za cat i, ka̱ram ka kan tom Ka̱won ka ka bu yya diwat ti ba nin tssu a̱ka̱tukyya njit u ni.

11Ba̱rywai nzuk, ka̱ a̱mi Ka̱za kan za cat, ku myim zi ma̱n ya gwai meyang. 12A̱yin a̱n shyi a̱ ka̱n dyi Ka̱za ba. Ma ki zi ya gwai, zi bvwo Ka̱za a̱ shyi ba̱ njit, gwai nka na tyyi a̱tsatsak sa̱rei a njit.

13Ka̱za a̱ ka̱n za ryi Tswa nka ji, nkpa n byyi zin bvwo ka shyi ka̱yat njit, zi ma̱n shyi ka̱yat nka. 14Zi ka̱n dyi i bu wrak shaida ka̱sak ka A̱tyyi na̱n tom Ka̱won nu, ka bu san ba̱nyet ka̱sa ba ni. 15A̱yin nu a̱ hywa di ka̱nu nu Yesu a̱ yet Ka̱won Ka̱za ni a̱ shyi bu Ka̱za, Ka̱za a̱ ma̱n shyi ba̱ nu. 16Njit a̱ccu njit, zi bvwo i bun wrak ka̱ryong i cat a Ka̱za ka za cat i.

Ka̱za a̱ yet cat. A̱yin a̱ gwai ba̱nyet i, a̱ shyi bu Ka̱za, Ka̱za a̱ ma̱n shyi ba̱ nu. 17Rot a̱mi cat Ka̱za na tyyi a̱tsatsak ba̱sa̱rei an ndya njit a, zi gi bu wi hok nsum a̱ta̱ssi Ka̱za ka̱tuk nshirya ka. Zi ni maai rot swat njit a i ka̱sa ka ryi di yin swat Yesu na ni. 18Cat byyi ka̱wun ba. A̱tsatsak cat u a̱ trung ka̱wun. A̱yin nu a̱ ri swat i ka̱wun ni a̱ ka̱n shya a̱tsatsak cat u ba. A̱ pfong ka̱wun, rot a̱ hwa ba ni ku nyep.

19Zi cat rot Ka̱za a̱ yet ka̱son a̱ za cat. 20Ka̱ a̱yin a̱ hywa, “N gwai Ka̱za,” wwon a̱ rak ryi a̱wumba nu, a̱yin a̱ywu a̱ bvei dira. Ka̱ maai cat a̱wumba nu nu na̱ wa cyang ni ba, na̱ bu yya ni a̱n cat Ka̱za ka na̱ wi ka̱n dyi na ni? 21Nkpa Yesu na̱ za tyyei: a̱yin nu a̱ cat Ka̱za ni, dolet na̱ cat a̱wumba nu.

Currently Selected:

1 Yohana 4: kaj

Highlight

Copy

Compare