1 Yohana 2

Yesu Kristi a̱ntyok za brang

1Na̱won nzuk, n ya jem i yi gi wwon a̱ka̱tukyya nu. Ka̱ a̱yin a̱ ma̱n kpa a a̱ka̱tukyya, zi byyi Yesu Kristi, a̱zizrak a̱yin, nu a̱ shyi i naai A̱tyyi nu ka̱nu njit. 2Yesu mbvak nu brak a̱ yet ryen na Ka̱za ka nin za cii a̱ka̱tukyya nu ni, ba a̱ka̱tukyya njit ba̱ njit ba, ma ba̱ a̱nying kpikpit ba̱nyet u sa̱rei.

3Ki zin tssup truwang Ka̱za ji ni, nkpa ni tyyei ka̱sak ka zin ka̱ bvwo ni. 4Ka̱ a̱yin a̱ hywa, “N ku bvwo,” ma di na̱ tssup truwang Ka̱za ji ba, taka̱i a̱yin iya i yet ba̱ a̱bvei dira, ka̱ryong ka shyi ka̱yat nu ba. 5Ma a̱yin nu a̱ tssup ba̱ryat Ka̱za ba ni a̱ bo ni tyyei ka̱sak ka na̱n gwai Ka̱za ba̱sa̱rei rya nu na ni. Ka̱sak ka zi nin bvwo zi yet ba̱nying Ka̱za ni ku naa: 6Ka̱ a̱yin a̱ hywa da̱ yet a̱nying Ka̱za, to, dolet na̱ cong ka̱sak ka Yesu na̱ yin cong ni.

A̱hwai truwang

7Ba̱rywai nzuk, a̱hwai truwang a̱mi n ya jem mi ba, a̱kukwo nu yi ka̱n hok nyyai ndoson ni. A̱kukwo truwang nu nu a̱ yet kyang a yi wu ka̱n hok i. 8Ma truwang ji n ya jem i ni i yet a̱hwai, ka̱ryong nji ka zi ka̱ ryi ka̱yat Yesu ba̱ nyin. Rot ryin shyi i tyyai, wwon ka̱bvwa sai ka̱ryong ka a̱ ka̱n nwa sai.

9A̱yin nu a̱ hywa da̱ shyi i ka̱bvwa sai i wwon a̱ bo shyi i rak ryi a̱wumba nu ni a̱ ri shyi an dyin. 10A̱yin nu a̱ gwai a̱wumba nu ni, nu a̱mi a̱ shyi i ka̱bvwa sai; rot a̱mi a̱ byyi kyang a ni tyyi a̱yanyet a̱ nwa a a̱ka̱tukyya ni ba. 11Ma a̱yin nu a̱ rak ryi a̱wumba nu ni a̱ ri shyi ka̱yat ndyin. A̱ cong ka̱yat nkpa di na̱ bvwo ka̱rek ka na̱n naat i ba, rot ryin na ku tyyi a̱tutwan.

12Na̱won nzuk, n ya jem mi rot ba ka̱ ya tssu a̱ka̱tukyya nyin i diyrek Yesu. 13Ba̱tyyi, n ya jem mi rot yi bvwo a̱yin nu a̱ shyi nyyai ndoson ni. Zam, n ya jem mi rot yi ka̱n dot A̱ka̱tuk A̱yin nu.

14Na̱won, n ya jem mi rot yi bvwo A̱tyyi nu. Ba̱tyyi, n ya jem mi rot yi bvwo a̱yin nu a̱ shyi nyyai ndoson ni. Zam, n ya jem mi rot yi byyi ncet, ba̱ryat Ka̱za a̱ swat a ndya nyin, yi bu rot A̱ka̱tuk A̱yin nu.

15Yi ryok gwai ka̱sa ko nkyang a yet nying ka̱sa nani ba. Ki yi gwai ka̱sa ka yi ni gwai A̱tyyi nu ba. 16Sa̱rei nkyang a yet nying ka̱sa nani ni -- nkyang a rwam ku cat i, bu nkyang a a̱ssi na cat i, bu nkyang a shyi ka̱sa ka ba̱nyet ban yet a̱ccu mba ni -- na yet nying A̱tyyi ba, ma nying ka̱sa a̱mi. 17Ka̱sa kani sa̱rei bu nkyang a shyi ka̱yat nka ba̱nyet ba cat i ni tyak, ma a̱yin nu a̱ shyi i yya kyang a Ka̱za ka cat i a̱ ni kwu ba.

A̱ra̱ndwan Yesu Kristi

18Na̱won nzuk, a̱ngbom ka̱ram a̱ ba shishrek. Ba yin ya tyyei a̱ hywa A̱ra̱ndwan Yesu Kristi a̱ ni ba; ba̱ra̱ndwan ba̱gingang a̱ ka̱n ba, nkpa n byyi zin bvwo a̱ngbom ka̱ram a̱nuu. 19Ba̱nyet bani ko nyyai ba yin yet ba̱ njiit ba. Nkpa n byyi ba yin wruk a̱ za wwon. Ba da yin yet ba̱ njiit da ba yin sseng ba̱ njit. Ma ba yin wruk zi gi bvwo ka̱sak ka ba yin wi yet ba̱ njiit ba nyyai ka̱son ka ni.

20Ma nyin Yesu a̱ ka̱n ya krok Tswa Ka̱za. Rot a̱mi sa̱rei nyin yi bvwo ka̱ryong. 21N ya jem i ba rot yi cyi ka̱ryong ka ba, seko rot yi ka̱ bvwo i si bu bvwo ka̱sak ka dira wwut nyyai i ka̱ryong ba.

22To, a̱nyan a̱ yet a̱bvei dira nu? A̱yin nu a̱ hywa di Yesu nu a̱ yet Kristi ni ba. Taka̱i a̱yin a̱ya a̱ yet A̱ra̱ndwan Yesu rot a̱ rak A̱tyyi nu bu Ka̱won ka. 23Rot a̱yin nu a̱ rak shim Ka̱won ka ni a̱ rak A̱tyyi nu. A̱yin nu a̱ ma̱n shim Ka̱won ka ni, a̱ shim A̱tyyi nu.

24Se yi sseng ansham i breng ba̱ryat ba yi ka̱ hok nyyai ndoson ka ni. Ki yi breng ba̱ryat ba yi ni swat mon diccu bu Ka̱won ka ba̱ A̱tyyi nu. 25Wwon kyang a Yesu na̱ ryat a̱wwon a̱ ni za ryi ni, nkpa yet sucet wityak.

26N ya jem i tazwa ba̱nyet ba a̱ cat ya raai i. 27Ma Kristi a̱ wa ka̱n ya ryi Tswa nu ji. Ki Tswa nu ji shyi ba̱ nyin, yi bu ni kun a̱ntyok ya zzek ba. Rot Tswa nu ji na zzek ba̱nyet nkyang sa̱rei; zzek nji na i bu yet ka̱ryong, ba dira ba. Se yi tssup kyang a Tswa nu ji zi ya zzek i, i mon diccu ka̱yat Kristi.

28To, na̱won nzuk, yi sseng mon diccu ba̱ nu rot nom a na̱ bun ba ni yi hok ansham i gi wi hok nsum a̱ta̱ssi nu. 29Yi bvwo ka̱sak ka Yesu na̱n yet a̱tsatsak a̱yin ni, rot a̱mi ku myim yi bu bvwo a̱yin nu a̱ yya a̱tsatsak nkyang ni a̱ yet ka̱won Ka̱za.

Currently Selected:

1 Yohana 2: kaj

Highlight

Copy

Compare