1 Yohana 1

A̱tuba nu a̱ yet Diwan sucet i

1N ya jem i tazwa Diwan sucet ka nshyi nyyai ka̱tsitsrang ka Ka̱za kan yya ka̱sa ka ni. Zi ku hok da̱ a̱pfo njit, i bu ku ryi da̱ a̱ssi njit, i bu ku byram di mbvak njit. 2Ka̱ram ka sucet ani kun wruk a̱ ba a̱za̱ kpai ni zi ku ryi, nkpa n byyi zin dyat tazwa nu ka i bu ya kok i ka̱sak ka ban za tyyei sucet wityak a shyi ba̱ A̱tyyi nu ni. 3Nde, kyang a zi ryi i bu hok i nkpa zi ya tyyei yi gi mon a̱ccu ba̱ njit. Mon a̱ccu njit a i shyi ka̱yat A̱tyyi bu Ka̱won ka ban yei Yesu Kristi ni. 4N ya jem i, gwai njit a i gi maai.

Ka̱za a̱ yet ka̱bvwa sai

5Kyang a zi ka̱n hok da̱ nu ni, nkpa zi ya tyyei: ka̱sak ka Ka̱za kan yet ka̱bvwa sai ni, di ryin kun shyi ka̱yat nka ba. 6Ki zi hywa di zi mon a̱ccu ba̱ nka ma i swat ka̱yat ndyin, nkyang a zi ryat i bu nkyang a zi yya ni yet ba̱jyem dira. 7Ma ki zi swat i ka̱bvwa sai, da̱ni da̱ nu na̱n swat ka̱yat ka̱bvwa sai ka ni, zi mon a̱ccu bu ba̱yaan, ba̱sok Ka̱won nka Yesu ba si bo za tssu ba̱zizrak a̱ tun a̱ka̱tukyya nu.

8Ki zi hywa di zi byyi a̱ka̱tukyya ba, zi ya raai, ka̱ryong ka shyi ka̱yat njit ba. 9Ma ki zi tyyang a̱ka̱tukyya njit u di Ka̱za, ka ka̱n dop a̱ sak a̱ ni za yya a̱tsatsak, ka ni za tssu a̱ za kaai a̱ka̱tukyya njit u ba̱sa̱rei a̱ wwon. 10Ki zi hywa di zi byyi a̱ka̱tukyya ba, zi brak Ka̱za n yya a̱bvei dira, di ba̱ryat nka ba ba shyi a ndya njit ba.

Currently Selected:

1 Yohana 1: kaj

Highlight

Copy

Compare