1 Korinti 9

Cet ba̱nyet yya wa'azi

1N swat diccu nzuk baa? N yet a̱pfong Yesu baa? N ka̱n dyi Yesu A̱gwam njit u baa? Nye nyin a̱mi yet pfong a n yya Yesu mi ni e? 2Ko ba̱yanyet a̱ n dak i yet a̱pfong u, nyin yi ni n dak ba. Kyang a nyin yi yet ba̱nyying ka̱yat Yesu ni tyyei kyang a n ka̱ n yya i yet a̱pfong Yesu nu ni.

3Ki ba̱nyet a̱ n byat, kyang a n na ba̱ tyyei ni ku na ni: 4Ku myim yi n dyi ya bu sswa a mpfong a n yya ni baa? 5Zi maai i ma̱n cong bu ba̱nyring njit ba yet ba̱nyet tssup ni baa? Da̱ni di kpikpit ba̱pfong a bu ba̱wumbeyang Yesu ba bu ba̱nyet Bitut ban yya ni baa? 6Ki yi ryi anye ba̱ nzuk bu Barnabat njit a̱mi maai i yya pfong da̱ a̱ccu njit n za? 7A̱nyan yi ka̱n dyi na̱ yet soja a̱ bo byin a̱ cat kyangya diccu nu? A̱nyan a̱ ni tup a̱ wi sswa disum ti? A̱nyan a̱ ni tsaai nyak a̱ wi sswa ba̱byyang ba?

8N dyat a̱mi di cet ba̱neywu o? Ba̱ryat Ka̱za ma a̱ hywa a̱mi. 9Musa a̱ yin jem a̱ hywa, “Ryok rop ka̱nu ka̱janki nka̱ bvwo ya yak a ka shai i ba.” A̱huhwa ba̱ryat ani a̱ shyi i ka̱janki ba, 10ma njit Ka̱za ka yin dyat a̱ za kwot i. Da̱ a̱ntyok keyak u da̱ a̱ntyok yya yak u, koyan a̱ yya pfong nu na a̱ cat a̱ ga bun shya ka̱ssi nu. 11Njit zi ka̱n tup nkyang Tswa Ka̱za ka̱yat ndya nyin ka. Ku ni ra̱u ki zi bu shya nkyang swat ka̱sa na da̱ nyin o? 12Ki ku myim yi yya ba̱nyet wa'azi ba̱yaan ni a̱mi, ku myim yi za yya mi ra̱u koyan.

Ma zi yya amfani di cet iya ba, se zi wun sseng sswa ka̱bvung kozan kyang ho zi bu tyyi kyang n hwwun ryen Ka̱sham Ba̱ryat tazwa Yesu. 13Yi bvwo ba̱nyet ba a̱ yya pfong a ka̱ryi Ka̱za ka ni a̱ ya ka̱ yemi, ba̱nyet ba a̱ shyi ka̱bvwa ba̱hyum ka ni a̱ ma̱n shai ka̱ssi mba ka̱ yemi. 14A̱mi A̱gwam Tazwa na̱ bon za tyyei, di ba̱nyet ba a̱ zzek Ka̱sham Ba̱ryat ka ni ku myim ba shai kyangya mba na ka̱ yemi.

15Ma nzuk n ka̱n yya a̱mi ba. Da an jem wasika a̱ni n byyi rya yi gin yya nkyang ani ba. Goma n kwu da̱ a̱yin a̱ ni n bvwo ya cin na. 16Pfong tyyei Ka̱sham Ba̱ryat a ka̱bvwa nzuk yet kyang a n ni ya cin ni ba. Kaito nzuk ki n dak! 17N si bu hywa da̱ nzuk a̱mi n kpo tssa n tun, Ka̱za a̱ ni n tan; ma ba ni n ti-tyyi, n byyi zzim zang pfong ba. 18Zang a̱nzan n bo n shya? Zang nzuk jinji yet wa'azi ji n yya ni ba wi n tan a ni. I ryen nani n yya amfani di cet nzuk a ba; ki n shim, se ba n tan a wa'azi nu n yya ni.

19N yet a̱kwwa a̱yin ba, ma n ya brak n yya a̱kwwa koyan, n ga n kwwat ba̱nyet ba̱gingang. 20Ki n brak di ba̱nyet Yahuda, n yya anye n yet a̱ntyok ba̱nyet Yahuda. Ki n brak di ba̱nyet ba a̱ tssup Truwang Musa ji ni, ko da̱ n nin shyi an bvak Truwang na ni ba, n yya anye nkpa n ri tssup. N yya a̱mi n ga nshya ntaka̱i ba̱nyet iya a̱mi. 21A̱mi brak, ki n brak di kpikpit nwap a n yya anye n shyi tssup zzek Ka̱za na ba. Da n si wa kpo sang ba, n tssup zzek Yesu a̱mi. 22Ki n brak di ba̱nyet sang cet i tssup a, n ma̱ n yya da̱ni di n byyi cet i tssup a ba, n ga n ba̱ shya n ba mi ka̱rek Yesu. N yet kozan kyang di ba̱nyet sa̱rei, n ga n san ba̱yanyet ka̱yat mba i kozan ryen na n maai yya ni. 23N yya nkyang ani sa̱rei, Ka̱sham Ba̱ryat ka a̱ ga ya ka̱son n ga n shya ka̱nu-a̱tan ba̱ryat Ka̱za zi ya ka bu ba̱yanyet.

24Yi bvwo: an cyi koyan a̱ na tyong, ma ba̱ a̱tuba a̱yring nu a̱ na si ya ryik a. Yi tyong cyi ji i ryen na yi nin za ryik a ni. 25Ka̱yat ba̱nyet ncyi iya koyan a̱ nan tyyi ka̱ssi a̱ tun ka̱wai, a̱ ga shya zang ji ni wi bvwa ka̱ram ni. Ma njit zi yya a̱mi i gi shya zang wityak. 26Rot a̱mi nzuk n tyong ba̱tai ba; n byyi ka̱bvwa ka n tyong n naat i. N bo n tsot n cam, ho n bu tsot bu wun. 27Rot a̱mi n gwwak rwam nzuk a n tyei dikwwa, ho n nwa bu wak bu ba̱yanyet n wruk i, a̱wwon nzuk diccu nzuk n wa n hwan. N cat wa'azi nzuk ji i yet a̱mi ba.

Currently Selected:

1 Korinti 9: kaj

Highlight

Copy

Compare