1 Korinti 10

Ba kam ba̱nyet tazwa na̱za na̱yaan

1Ba̱wumbeyang nzuk, n cat yi yring ba̱tyyi njit ba a̱ yin tssup Musa ni bu kyang a yin ba̱ shya ni. Sa̱rei mba a̱mi a̱ninyyan na a̱ yin kup ba bo byek kei ti ban yei Bahar u ni. 2Ba yin ba̱ yya baptisma a̱nying yet ba̱nyet tssup Musa sa̱rei mba ka̱yat a̱ninyyan ka bu kei Bahar ti. 3Sa̱rei mba a̱ yin za kyangya ntswa bu yring, 4a̱ bo sswa ba̱shekwot ntswa ba̱ yring ba̱sa̱rei mba. Rot sa̱rei mba a̱ yin sswa ba̱shekwot an kpang ntswa iya yin cong ba̱ mba ni. Kpang iya a̱mi yet Yesu Kristi. 5Ma nkyang iya yin tyyi Ka̱za a̱ hok ansham mba ba, rot a̱mi ba̱yanyet ba̱gingang ka̱yat mba a̱ kwi an tswa ka̱yit.

6Sa̱rei nkyang ani za tssap a̱mi zi ta̱rwam zi bu tyyi ndya njit a i cat a̱ka̱tuk nkyang di ba̱tyyi njit ba ni, 7i bu ta̱rwam zi bu tssup na̱za na̱yaan di ba̱yanyet mba ba yin tssup i. Ba̱ryat Ka̱za a̱ hywa, “Ba̱nyet ba a̱ swrang a̱ ya a̱ sswa a̱ swei a̱ ta̱za a̱ nwa ba̱pfo.” 8Zi tyong kan-a̱naan, rot nu a̱mi a̱ yin tyyi ba̱nyet ncyi kop nswak nhwa ba̱ tat (23,000) a̱n kwi ka̱yat mba bu nom yring. 9Zi ryok me Ka̱za ba, rot nkpa yin tyyi ndyik a n hywaai ba̱yanyet mba. 10Zi ryok kop a̱dyying, rot nkpa yin tyyi ba̱yanyet mba a̱n kwi an bvak A̱pfong Ka̱za Dikwu na.

11Ka̱za a̱ yin ba̱ yya nkyang ani a̱ ga zzek ba̱yanyet. Ba bo na̱ jem a̱ ga za zzek di ba̱nyet a̱ngbom ka̱ram u a̱ ka̱n ba da̱ mba ni.

12Rot a̱mi a̱yin nu a̱ hwa da̱ sseng ni na̱ cam, ho a̱ bu kpa. 13Kozan ka̱me nu a̱ na̱ shya ni, ka yet bu ka̱yring bu kankaani a̱ shai ba̱nyet ba ni. Ma Ka̱za a̱ sseng an kyang a ka ryat a̱wwon ni, ka ni shim ka̱me ka a̱ ra̱u cet nwan ni a̱ na̱ shya ba. Ka̱ram ka ba na̱ me ni ka ni na̱ ryi cet a a nin sseng ni. A̱mi brak ka nin yya ryen na a nin shot i.

14Rot a̱mi ba̱kpondang nzuk, yi tyong na̱za na̱yaan ba. 15N dyat ba̱ nyin ba̱nyet a̱za̱ncyi. Yi hwa ansham nkyang a n ya tyyei ni, ki na yet. 16Kop ji zin sswa jibi A̱gwam Ka̱za na ni, nji a̱mi zi bun gwai Ka̱za: ka̱ram ka zin sswa an nji ni zi shyi yya a̱huhwa i ba̱sok Kristi ba. Burodi na zi na sam ya ka ni: ka̱ram ka zin shyi kpo ya na ni zi na shyi yya a̱huhwa rwam Yesu a̱mi. 17Burodi yring iya nkpa tyyi sa̱rei ka̱tswa njit ka zin tyyi rwam yring, rot sa̱rei njit zi ya i dikwang burodi tiyring iya.

18Cyang ba̱nyet Isreila na, ba̱ mba ni a̱ ya ka bu Ka̱za kyang a ban kwot ba̱hyum ba tazwa baga̱di ka ni. 19To, a̱nzan n ni hywa? Na̱za na̱yaan a̱ yet kyang o? Ki ba̱hyum ba ba na̱ kwot i ni a̱ yet kyang? 20Kaai! Ma ba̱hyum ba̱nyet witssup ba ba na wrak a̱ka̱tuk tswa, ba Ka̱za ba. Da n ma̱n cat yi mon a̱ccu ba̱ a̱ka̱tuk tswa ba. 21Yi ni yya ni n tyei na̱nu nyin an kop A̱gwam Yesu i bu bvwot cong tyei i ryei a̱ka̱tuk tswa? Yi ni yya ni n za i tebur A̱gwam Yesu bu nying a̱ka̱tuk tswa brak. 22Zi cat tyyi A̱gwam Ka̱za a̱ hok swam o? Zi ka̱ ra̱u di cet aa?

23Ba ryat di zi maai ya kozan kyang. Ee, ku yet ka̱ryong, ma ba kozan kyang a̱mi byyi kpungtun di ba̱neywu ba. 24Ku myim koyan a̱ cam bu diccu nu ba, ma zi cam ba̱yaan.

25Ka nat ka̱rek zzap dinam, bu dinam ti a si shya ni a san ya i ryok sseng zzim ba, ho a bu ya kwwat a̱ka̱tuk a̱huhwa. 26Rot ba̱ryat Ka̱za a̱ hywa, “Ka̱sa ka bu sa̱rei nkyang a n shyi ni yet nying Ka̱za.”

27Ka̱ a̱ntyok wi tssup a̱ na̱ yei ya kyangya, a cat nat a, ka nat a si ryok n zzim kyang ba, ho a bu ya kwwat a̱ka̱tuk a̱huhwa. 28Ma ka̱ a̱yin a̱ na̱ tyyei di kyangya na yet nying nna ni ba wrak na̱za na̱yaan ba̱hyum ni, a ryok ya ba, rot a̱huhwa a̱tuba nu a̱ na̱ tyyei i. 29Ba rot a̱huhwa diccu nwan ba, ma a̱nying a̱yin nu a̱ na̱ tyyei ni.

Shim a̱yanyet a̱ ni hwa a̱ hywa, “Ho a̱nzan n nin maai yya kyang a n cat i ba rot a̱huhwa a̱yanyet? 30Ki n gwai Ka̱za mi an kyangya na n shya ni, a̱yanyet a̱ hywa di ho a̱nzan n nin yya a̱mi e?”

31Nzuuk a nkpa yet: ko yi ya ko yi sswa, bu kyang a yi yya ni, yi yya n dyep Ka̱za. 32Yi swat swat a yi nin tyyi a̱yin da̱ wi kpa ni, ko ba̱nyet Yahuda ko nwap nzaan ko ba̱nyet tssup Yesu. 33Yi yya ka̱sak ka n nin yya ni: sa̱rei nkyang a n yya ni n na cat myim koyan. N na hwa a̱tsatsak kyang u a̱ ni n brang ni ba, seko a̱tsatsak kyang u a̱ ni brang ba̱nyet ba ni, ba ga shya sucet.

Currently Selected:

1 Korinti 10: kaj

Highlight

Copy

Compare