1 Korinti 6

Cong kara ba̱yaan

1A̱nzan a̱ ya ba yin kok nkara ba̱yaan cong i di ba̱nyet shirya ka̱sa ba, da̱ nyin ba wu nat i di ba̱nyet tssup ba si ya jyi mi ba? 2Yi si wu bvwo ka̱sak ka ba̱nyet Ka̱za a̱mi a̱ nin yya ka̱sa ka shirya ni e? Ka̱ a̱mi, a̱nzan a̱n byyi na̱macwwang nkyang na nin ya kaat jyi? 3Yi bvwo da̱ njit ni yya ba̱pfong Ka̱za ba shirya baa? Ka̱ a̱mi, na̱mankyang ka̱sa nani a̱ ni za kaat o? 4Ki ntaka̱i nkyang ani ya ba, yi na̱ sook nat i di ba̱nyet ba a̱ wi yet kyang ka̱yat ncoc ka ni e? 5Kyang nsum a̱mi da̱ nyin! N bvwo yi byyi a̱ntyok a̱za̱ncyi ka̱yat nyin, a̱tuba nu a̱ ni maai a̱ ya kam zok ji ni. 6Se a̱wumba a̱ sook a̱wumba a̱ nat i bat shirya na, ba̱nyet ba di ba yet ba̱nyet tssup i ba a̱ wa si ba̱ yya shirya.

7Ka̱sak ka yin cong kara ba̱yaan ka̱yat nyin ni tyyei ka̱sak ka yin hwan ba̱sa̱rei ni. Goma yi wu shim ba ya yya na̱kpot a̱ ya bvuk baa? 8Nyin si ma̱n shyi ka̱yat ba̱nyet ya yya na̱kpot, i bu ya yya bvuk, hat bu yya ba̱wumbeyang nyin a̱ka̱tuk nkyang ani. 9Yi si wu bvwo di ba̱nyet a̱ka̱tukyya a̱ ni wai nwa Dityok Ka̱za ti, ee? Da̱ a̱yin a̱ ryok ya raai ba, di ba̱kan-a̱naan, di ba̱nyet tssup na̱za na̱yaan, di ba̱ntyok kwai bu ba̱yaan, 10di ba̱tang, di ba̱nyet cat nkyang ka̱sa, di ba̱nyet sswa nkwwa, di ba̱nyet pfwei ba̱nyet, di ba̱nyet bvuk ba̱yaan -- sa̱rei a̱yin ka̱yat mba a̱ ni nwa Dityok Ka̱za ti ba. 11Ba̱yanyet nyin a̱ yin yet ntaka̱i iya, ma Ka̱za a̱ ka̱n tun a̱ka̱tukyya nyin nu a̱ wwon, yi bu yet ba̱nyet nka, ka si tyyi yi yet ba̱tsatsak a̱ta̱ssi nka rot diyrek A̱gwam Yesu Kristi bu Tswa Ka̱za njit ji.

Yi wwon ndwam nyin na na yet kyang dyep Ka̱za

12Ba̱yanyet a̱ ni hywa, “N maai yya kyang a n cat i.” Ee, ku yet ka̱ryong, ma nkyang nzaan byyi kpungtun ba. N drok n hywa, “N maai yya kozan kyang,” ma n cat yya kyang a n nin tyyi dikwwa ni ba. 13Ba̱yanyet a̱ ni hywa, “Kyangya yet nying ka̱hwa; ka̱hwa a̱ ma̱ yet ka̱nying kyangya.” Ee, Ka̱za a̱ ni ba̱ byyan ba̱sa̱rei. Rwam a̱neywu yet nying kan-a̱naan ba, ma ku yet nying yya A̱gwam Yesu dikwwa, A̱gwam Yesu a̱ ma̱n yet a̱nying rwam. 14Cet na Ka̱za kan yrek Yesu i dikwu ni nkpa bu ni za yrek meyang.

15Yi bvwo ndwam nyin na yet nkap rwam Yesu. A̱nza̱tuk n nin sook rwam Yesu mon bu nying jyen? Ko ba̱ncincong! 16Ku myim yi bvwo a̱yin nu a̱ sook rwam nu a̱ mon bu jyen ni, na̱ bvwo a̱ mon byin a̱mi ba̱ nu. Ba̱ryat Ka̱za ba a̱ za tyyei ba̱zizrak, “Mba ba̱mba ba̱hwa ba ni brak a̱ tyyi rwam yring.” 17A̱yin nu a̱n ma̱ mon diccu nu ba̱ A̱gwam njit Yesu ni a̱ tyyi bu kyang yring ba̱ nu an tswa.

18Yi wwon kan-a̱naan. A̱ka̱tukyya a̱yaan a̱n byyan rwam a ba, ma kan-a̱naan a̱ byyan rwam a. 19Yi si wu bvwo di ndwam nyin na yet ka̱bvwa swat nTswa Ka̱za a? A̱tuba nu Ka̱za ka yin ya ryi na̱ swat ka̱yat ndwam nyin ka ni e? Yi swat a̱ccu nyin ba, ma yi shyi an bvak Ka̱za. 20A̱ ya san a̱ tan ba̱gingang. Rot a̱mi se yi wwon ndwam nyin na tyyei shii Ka̱za na.

Currently Selected:

1 Korinti 6: kaj

Highlight

Copy

Compare