1 Korinti 5

A̱ntyok kan-a̱naan ka̱yat ba̱nyet tssup

1Ba cin ka̱sak ka ba̱nyet ka̱yat nyin ban brak a̱ tyyi ba̱ kan-a̱naan ni, kyang a ba̱nyet witssup ba pfong shishyi nkpa ni. Ba hywa ma da̱ a̱yanyet a̱ kwai ba̱ a̱naa a̱mba̱hwa nu. 2Har yi wu shyi bu ya cin! Ku myim yi wu hok rya byyan, i nyying a̱yin a̱ywu ka̱yat nyin ka. 3Ko n nin shyi ba̱ nyin ka̱yat rwam ba, tswa nzuk ji shyi ba̱ nyin. N ka̱n yya a̱yin a̱ywu shirya da̱ni n shyi ka̱ yemi ni. 4Ka̱ram ka yin tung ka̱bvwa ka̱yring ni i diyrek A̱gwam Yesu, n shyi ba̱ nyin ka̱yat ntswa, cet A̱gwam njit a Yesu Kristi bu shyi ba̱ nyin, 5yi tun a̱yin a̱ywu ka̱yat coc ka wrak Ka̱ta̱nyrang, ka ga byyan rwam nu na, tswa nu ji i gi bu shot ka̱tuk ba A̱gwam Yesu ka.

6Yet a̱ccu nyin na byyi sham ba. Yi si wu bvwo ka̱sak ka cincong yisti zi nan tyyi sa̱rei dikwang burodi ti ngeyak ni e? 7Seko yi tun a̱cwai ntswa a̱ywu i gi yet a̱hwai dikwang u a̱ sang yisti ni. Rot ba wa ka̱n hywat a̱truk Swrap wwon njit u, nu a̱ yet Yesu Kristi. 8Rot a̱mi zi bu song a̱swa njit u, ba bun byyi burodi na byyi a̱kukwo yisti ni ba, wato yisti na̱kpot bu na̱nyan; ma bun byyi burodi na sang yisti ni, wato nying a̱zizrak bu ka̱ryong.

9N ka̱n ya tyyei i kpa nzuk a di yi ryok mon diccu bu ba̱kan-a̱naan ba. 10Ma yi ryok hwa di n dyat tazwa ba̱nyet witssup ba: ko di ba̱kan a̱naan, bu ba̱nyet cat nkyang ka̱sa, bu ba̱nyet bvuk ba̱nyet, bu ba̱nyet tssup na̱za na̱yaan. Ki a̱mi, seko yi wruk i ka̱sa ka. 11Kyang a n yin cat n ya tyyei ni: yi ryok mon diccu ba̱ a̱yin nu a̱ ya yei a̱wumba ma a̱ shyi i kan-a̱naan, ko a̱ yet a̱ntyok cat nkyang ka̱sa, ko a̱ ma̱n tssup na̱za na̱yaan, ko a̱ yet a̱ntyok pfwei ba̱nyet, ko a̱sswa nkwwa, ko a̱bvuk ba̱nyet -- taka̱i ba̱nyet iya yi ryok ya kyangya ba̱ mba ba ma.

12N byyi ka̱ta yya ba̱nyet ba a̱ wi yet ba̱njiit i shirya ba. Ba̱nyet ba a̱ shyi i tssup a a̱mi yi maai ba̱ yya shirya ji. 13Ka̱za a̱mi a̱ ni yya ba̱nyet ba a̱ wi shyi ba̱njiit a ni shirya. Ma yi nyying a̱ka̱tuk a̱yin a̱ywu wruk i ka̱yat nyin ka.

Currently Selected:

1 Korinti 5: kaj

Highlight

Copy

Compare