1 Korinti 14
14
Za̱nang Tswa Ka̱za
1Kyang a yi nin tyyi ka̱ssi ni nkpa yet cat ba̱nyet. Yi tyyi ndya nyin i shya za̱nang nTswa Ka̱za, tun ba za̱nang ssang ba̱ryat Ka̱za tyyei ba. 2A̱tuba nu a̱ ryat a a̱riryem a̱yaan ni a̱ ryat bu ba̱nyet ba, a̱ ryat bu Ka̱za a̱mi, rot a̱yin a̱ hok kyang a na̱ ryat i ba; a̱ ryat ba̱ryat ka̱nrang ka̱yat nTswa nu. 3Ma a̱yin nu a̱ ssang ba̱ryat Ka̱za a̱ tyyei ni a̱ ryat bu ba̱nyet, a̱ ba̱ brang, a̱ bo ba̱ nok, a̱ bo ba̱ kun dizot. 4A̱yin nu a̱ ryat a a̱kang a̱riryem i a̱ brang bu diccu nu, ma a̱yin nu a̱ ssang ba̱ryat Ka̱za a̱ tyyei ni a̱ brang ba̱nyet tssup ba sa̱rei.
5N cat se sa̱rei nyin ryat a kang a̱riryem, ma a̱kpok cat nzuk u yi ssang ba̱ryat Ka̱za tyyei. Rot a̱yin nu a̱ ssang ba̱ryat Ka̱za a̱ tyyei ni a̱ byyi kpungtun a̱ ra̱u a̱tuba nu a̱ ryat a riryem a ni, seko ka̱ a̱yanyet a̱n shyi a̱ ni tyyei kyang a na̱ ryat i, ba̱nyet tssup ba sa̱rei a̱ ga bvwo kyang a na̱ ryat i a̱ ga ndai. 6Ba̱wumbeyang, a̱nzan a̱ yet nying ba nzuk u, ki n ni ryat a̱riryem a yi pfong ni ba, seko ki n ya ba bu ba̱ryat nyyai ka̱bvwa Ka̱za, ko bvwo, ko a̱zizrak zzek a̱nying Ka̱za?
7Ko di nkyang a̱bvom sang sucet a zi na tsot i, da̱ni di ka̱shirwa bu zinzom ni, a̱yin a̱ ni yya ni a̱n bvwo diwan a̱bvom ti ba bvom ni, se a̱ bvwo diwan a̱bvom ti naat ansham? 8Ki a̱ntyok tyap digba nzwang u a̱ tyyak ansham ba, a̱nyan a̱ yya shiri wruk zwang ji? 9A̱mi meyang, ba̱nyet ba a̱n hok kyang ba ka̱ a̱ ryat an nwap a ba pfong ni ba. A ni ryat ba̱ a̱cwrya sang kpungtun. 10A̱riryem a̱n shyi ba̱gingang i ka̱sa ka, ma kozan diryem bvwo kyang a ti ryat i. 11Ma ki n pfong kyang a a̱yin nu na̱ ryat i ba, n ni ku cyang na̱ yet wap yaan da̱ nzuk, nu meyang ba̱rimi na̱ ni n cyang. 12Nyin meyang yin cat za̱nang Ka̱za ji ni, ku myim yin tyyi ka̱ssi naai nkyang a ni tyyi ba̱nyet tssup ba a̱ ya ka̱son ni.
13A̱yin nu a̱ cat ryat a a̱kang diryem i na̱ naai Ka̱za a̱ ku brang na̱ tyyei ba̱nyet ba bvwo kyang a na̱ ryat i. 14Rot ki n yya a̱duwa a a̱kang diryem, tswa nzuk ji a̱mi naai, ma a̱huhwa nzuk u a̱n shyi ba. 15Rot a̱mi kyang a myim ni n naai ka̱yat ntswa nzuk ka nta̱mak bu a̱huhwa nzuk u, n bo n bvom ka̱yat ntswa nzuk ka nta̱mak bu a̱huhwa nzuk u. 16Ki yi dyep Ka̱za bu ka̱yat ntswa nyin, ka̱ a̱yanyet a̱n shyi ba̱ nyin a̱ bvwo kyang a yi yya ni ba, na̱ yya ni a̱n tyyi amin nu a a̱duwa gwai Ka̱za nu yi yya ni. Nu a̱ byyi ryen bvwo kyang a yi ryat ni ba. 17Ko a̱duwa gwai Ka̱za nyin nu a̱ si bu ryi ni, ka̱ a̱tuba nu a̱ shyi ba̱ nyin ni a̱ hok kyang ba, kun ku byyi kpungtun ba.
18N gwai Ka̱za n nin dyat a a̱riryem n ya ra̱u, 19ma ki zi nwa ka̱bvwa sujada, goma n hywa a̱nyyi a̱pfon, a̱nyyi na ba ni bvwo ni, ku ran ryat a̱nyyi cyi kop swak i diryem ti ba̱nyet ba ni hok ni ba.
20Ba̱wumbeyang nzuk, yi ryok ya brak n yya na̱mawon a̱huhwa nyin nu ba, ma yi tyyi na̱mawon a̱za̱gbang a̱ka̱tukyya. Yi yya a̱huhwa di ba̱nyet ba a̱ ka̱n maai ba̱nyet i. 21Ba jem i ba̱ryat Ka̱za ba a̱ hywa,
“I ba̱ryat ryat a̱kang a̱riryem, Ka̱za a̱ hywa,
n ni ryat bu ba̱nyet nzuk.
N ni wwon ba̱ryat nzuk ba i na̱nu ba̱necen,
di ba̱nyet nzuk ba ba nin hok ba.”
22Ryat a a̱riryem yet a̱lama di ba̱nyet witssup ba, ba ba̱nyet tssup ba. Za̱nang tyyei ba̱ryat Ka̱za yet a̱lama di ba̱nyet tssup ba, ba ba̱nyet witssup ba.
23Yi hwa ki yi nwa sujada i nwa ryat a a̱kang a̱riryem, ba̱nyet sang bvwo a̱ nyyai a̱ bu nwa, di ba yet ba̱nyet tssup ba, ba ni hwa di yi tyong jyik baa? 24Ma ki sa̱rei nyin shyi i ryat ba̱ryat Ka̱za, a̱ntyok witssup ko a̱ntyok sang bvwo a̱ nyyai a̱ ba, a ryi na̱ brak a̱ cyang a̱ka̱tukyya nu nu rot ba̱ryat koyan ba na̱ hok i, ba ni ku yya shirya, 25a̱ka̱tuk a̱huhwa nu nu a̱ ni wruk a̱ ba a̱ta̱sa; na̱ ta̱gbok a̱ dyep Ka̱za a̱ tyyei, “Ka̱ryong a̱mi Ka̱za a̱ shyi kyi ka̱yat nyin!”
Ka̱sak ka ba nin nwai coc ni
26To, ku ri-ryi na ni, ba̱wumbeyang? Kozan ka̱ram yi nan si mon ka̱bvwa sujada, a̱yanyet a̱ bvom a̱bvom gwai Ka̱za, a̱yanyet a̱ zzek, a̱yanyet a̱ san ba̱ryat nyyai di Ka̱za a̱ tyyei, a̱yanyet a̱ ryat a a̱kang diryem, a̱yanyet a̱ tyyei kyang a na̱ ryat i. Dolet sa̱rei nkyang ani i brang coc ji. 27Ki ba̱yanyet a̱ ni ryat a a̱kang diryem, ba ryok seyak ba̱tat ba, wwon a̱ ryat ba̱yayring; a̱yanyet a̱ si bon shyi a̱ ni tyyei kyang a ba ryat i. 28Ka̱ a̱yin a̱ ma̱n shyi a̱ ni tyyei kyang a ba ryat i ba, a̱ntyok ryat a kang diryem u a̱ ryok ryat ba, seko na̱ ryat bu Ka̱za ka̱yat pfwa nu. 29Ba̱nyet ba̱hwa ko ba̱tat a̱ ni zzek ba̱ryat Ka̱za ba, kpikpit a i rot a̱pfo i hok kyang a ba zzek i. 30Ka̱ a̱yanyet ka̱yat ka̱tung ka a̱ ma̱n san ba̱ryat nyyai di Ka̱za a̱ ni tyyei, a̱tuba nu a̱ shyi i ba̱ryat ba ni a̱ yen pfwi a̱ ku nang diwat. 31Yi nan tyyei ba̱ryat Ka̱za ba a̱zi tak, rot ba̱nyet ba a̱ ga myyam a̱ ga ya ta̱gbak. 32Tswa ba̱nyet ji shya za̱nang tyyei ba̱ryat Ka̱za ji ni ni sswa cet mba ba, 33rot Ka̱za a̱ yet ka̱nying ka̱kyyai ba, ma ka̱nying a̱tsatsak swat.
Da̱ni di ka̱yat kozan coc ba̱nyet tssup Ka̱za ni, 34ba̱nyring a̱ swat ba̱ nyong ka̱yat coc. Ba ba̱ shim mi ba ryat ba, ma ba wrak a̱ccu mba a̱ tssup kyang a Truwang Musa ji zi hywa ni. 35Ki ba cat zzim kyang, ba ryok se ba brek a̱ nat ka̱ryi ba si zzim ba̱ntyok mba i na̱sa. Ku yet kyang nsum a̱ra̱mbyring a̱ ryat ka̱yat ka̱tung Coc.
36A̱nzan a̱ ya ba? Yi hwa da̱ nyin a̱mi ba di ba̱ryat Ka̱za baa, ki ba̱ nyin a̱mi ka̱n ba̱ hok? 37A̱yin nu a̱ hwa da̱ a̱ yet a̱ssang ba̱ryat Ka̱za tyyei ni, ko a̱ shya za̱nang nyyai di Tswa Ka̱za ni, na̱ yya a̱tsatsak a̱huhwa tazwa nkyang ka n ya jem mi ni; ku yet truwang nyyai di Ka̱za. 38Ma a̱yin nu a̱ rak hok a ni yi ma̱n dyok ku hok ba.
39To, ba̱wumbeyang nzuk, kyang a yi cat i nkpa yet yi cat ssang ba̱ryat Ka̱za tyyei, yi ryok n bvwo ryat a a̱riryem ba. 40Yi na yya kozan kyang ansham.
Currently Selected:
1 Korinti 14: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
