1 Korinti 15
15
Ta̱za Kristi i dibyyi
1To, ba̱wumbeyang, n bo ni ya yring Ka̱sham Ba̱ryat ka n yi n bu ya tyyei ni, yi na̱ san, nna yi bun tyyi ndya nyin na di cet. 2Mba yet Ba̱ryat ba n yin bu ya tyyei ni. Mba a̱mi a̱ bo yet sucet nyin na ki yi ba̱ breng di cet, seko ki yi yin san di ndya na ba.
3Kyang a n san ni nkpa n ya tyyei, ku shii ba̱t: Wato ka̱sak ka Yesu na̱n kwu i hywak a̱ka̱tukyya njit u ni, a̱mi Ba̱ryat Ka̱za ban za tyyei, 4bu ka̱sak ka ba yin ku nyat ni, wwon Ka̱za a̱ ku shyek ka̱tuk nom ntat, a̱mi Ba̱ryat Ka̱za ba a̱ bon za tyyei, 5bu ka̱sak ka Bitut bu kpikpit ba̱pfong Yesu swak bu ba̱hwa ba yin ku ryi ni. 6Wwon ba̱nyet ku tssup ba yin da̱u cyi tsson a̱ bo ku ryi bu ka̱ram ka̱yring. Ma a̱kpok mba a̱ ri sso, seko ba̱yanyet mba a̱ ka̱n kwi. 7Wwon Yakubu bu kpikpit ba̱pfong a ma̱n ku ryi.
8Nzuk n yet a̱ngbom a̱tuba nu a̱ ku ryi ni, rot ryen na ba yin ni n byin ka̱yat Yesu ni yin bvwon bu nying kpikpit ba̱nyet a. 9N yin wwat ba̱nyet tssup Ka̱za ba ka̱bvung ba̱gingang. Rot a̱mi sa̱rei i ba̱pfong Yesu ba nzuk n yet ka̱baan ka, n maai ma n shyi ka̱yat mba ba. 10Ka̱za a̱ hok dizot nzuk, nkpa n byyi n nin dyi ni ka̱pfun, pfong dizot nka ti yet a̱kpam i swat nzuk a ba. Ma ki yi bu rot a̱ssi i cyang ansham, pfong a n ka̱n yya ni ku ra̱u nying kpikpit a; ba nzuk ba, ma pfong dizot Ka̱za ti yin shyi ba̱ nzuk ni. 11Ko nzuk n yya, ko mba a̱ yya, bu pfong wa'azi na a̱mi zi yya, nkpa bu yet kyang a yin tyyi ndya nyin na ni.
Ka̱sak ka njit zi ma̱ nin ta̱za ni
12Nnaanini njit ba̱ryat ba zi ya tyyei ni mba a̱ yet Yesu Kristi a̱ ta̱za nyyai a̱yabyen, wwon ba̱yanyet nyin ba ton di ba̱nyet ba a̱ ka̱n kwi ni a̱ bo ni ta̱za ba. 13Ki ba̱nyet ba a̱ kwi ni a̱ ni ta̱za ba, Yesu a̱ ma̱ yin ta̱za ba, ka̱ni? 14Ki Ka̱za a̱ yin yrek Yesu ba, wa'azi njit ji byyi kpungtun ba, a̱mi brak ntyyi ndya nyin na. 15Ku si tat ma zi brak tyyi ba̱nyet bvei dira an kyang a Ka̱za ka yya ni, rot zi hywa di a̱ yin shyek Yesu i dikwu. Ma ki ba̱nyet ka̱n kwi ba a̱ ni shyek ba, ka̱ yin ku shyek ba. 16Rot ki ba̱nyet ba a̱ ka̱n kwi ni a̱ ni ta̱za ba, to, Yesu a̱ ma̱ yin ta̱za meyang ba. 17Ki Yesu a̱ ma̱ yin ta̱za ba, ntyyi ndya nyin na yet kyang ba, yi ri swat bu ka̱yat a̱ka̱tukyya nyin ka. 18Ku bu ryi anye ba̱nyet tssup ba a̱ ka̱n kwi ni a̱ bo ni kaat ba. 19Ki tssup Yesu njit a ni tyak bu i hok ansham ka̱sa kani, zi ni tyyi kyang dizot sa̱rei i ka̱sa ka.
20Ma njit zi bvwo Yesu a̱ yin kwu, Ka̱za a̱ ku yrek, ka̱won ka̱tsitsrang ka a̱ ta̱za i ba̱nyet ba a̱ ka̱n kwi ni. 21Ka̱sak ka dikwu ti tin ba ka̱sa ka hywak a̱tuba a̱yring ni, a̱mi meyang i hywak a̱tuba a̱yring zi ma̱ nin ta̱za i dikwu ti. 22Rot ka̱sak ka ba̱nyet ban kwi i hywak mon byin bu A̱damu ni, a̱mi ba bo nin ta̱za rot ba mon diccu bu Yesu. 23Ma koyan a̱ byyi ka̱ram nu. Yesu nu a̱ yet ka̱son a̱ ta̱za, ba̱nyet ku tssup ba bu ka̱ram ta̱za mba, ka̱ram ka Yesu na̱n brek nyyai Tazwa ni. 24A̱ngbom ka̱ram u a̱ si ba, wwon Yesu a̱ si brek Dityok ti a̱ wrak Ka̱za A̱tyyi, ka̱ram iya na̱ ka̱n byyan sa̱rei a̱tityok bu cet ka̱sa na. 25Rot Yesu a̱ ni yen breng dityok ti se ka̱ram ka Ka̱za kan da sa̱rei ba̱ra̱ndwan nu ba a̱ tyyi na̱ntai a̱tak nu ka ni. 26A̱ra̱ndwan a̱ngbom u Ka̱za ka ni bvwa ni nu a̱ yet dikwu. 27Rot ba̱ryat Ka̱za ba a̱ hywa, “Ka̱za a̱ ka̱n da kozan kyang a̱ tyyi i na̱ntai a̱tak nu.” Ka̱ram ka dan hywa ‘kozan kyang’ a̱ ka̱n da a̱ ku tyyi mi ni, se zi bvwo a̱n tyyi Ka̱za ka a̱ ra nkyang iya a̱ tyyi Yesu mi ni ba. 28Ka̱za a̱ ni tyyi kozan kyang an bvak Yesu, wwon Yesu a̱ si bo ma̱n wrak Ka̱za diccu nu, Ka̱za a̱ si ma̱n san sa̱rei a̱ tyyi, a̱ si nwa dityok nka ti.
29Ki ta̱za i dibyyi n shyi ba, a̱nzan a nin byyi ba̱nyet a̱ yya baptisma i hywak ba̱nyet ba a̱ ka̱n kwi ni? A̱nzan ba nin tun? Ki ba ryat di ba̱nyet ba a̱ kwi ni a̱ ni ta̱za ba, a̱nzan a̱n byyi ba̱nyet ba ban yya baptisma nu a̱zi hywak mba? 30Da̱ni da̱ njit ba̱pfong Yesu ba ni, a̱nzan a̱ nin byyi zin swat ka̱nu dikwu kozan ka̱ram. 31Ba̱wumbeyang, n cyang dikwu kozan ka̱tuk. N ya hyong ka̱sak ka zin shyi bu sso ka̱yat Yesu Kristi A̱gwam njit ni; nkpa n byyi n nin hywa a̱mi. 32Ki bu cat rya a̱neywu a̱mi n ni kwan bu nyam kyi Afisa, ka̱ssok a̱nzan n nin tun? Ma ki Ka̱za a̱ ni yrek ba̱nyet ba a̱ ka̱n kwi ni ba, se zi bvun rya, i ya, i sswa, rot ka̱ntson zi wu kwi.
33Di ba ryok ya raai ba: “Bvon-tsaap jring nji byyan kpikpit a.” 34Yi brek bu nwa a a̱tsatsak a̱huhwa i wwon a̱ka̱tukyya, rot ba̱yanyet nyin a̱ bvwo Ka̱za ba. N hywa a̱mi yi gi hok nsum.
Rwam hwai a zi ni san ni
35Shim ba̱yanyet a̱ zzim, “Ba̱nyet ba a̱ kwi ni a̱ ni yya ni a̱n ta̱za? A̱nzan taka̱i rwam ba ni byyi?” 36Mu hok wai! Ka tup yak, kun ta ba se tswa ji yen kwu. 37Tswa ji a tup ni yet kyang a ni wruk ni ba. Ka tup nywat, ko zuk, ko yakpat, ko taka̱i nzwa zaan, ki i ta 38Ka̱za a̱ ni za̱ ryi taka̱i dityin na ka cat i, kozan dityin ba̱cicrak bu rwam nti na.
39Ndwam nkyang a Ka̱za ka krok ni ki bvwon: ndwam ba̱neywu ba̱zan, bu nying nyam ba̱zan, na̱non a̱ ma̱ bvwon, hwon meyang ba̱zan.
40Ndwam a yet taka̱i nying tazwa na ni n shyi, nying ka̱sa na i bu ma̱n shyi. Shisham nying tazwa ji bvwon, shisham nying ka̱sa ji i bu ma̱n bvwon. 41Nom byyi shisham nkpa ba̱zan, hywan i ma̱n byyi nkpa ba̱zan, na̱ta̱ngwat meyang ba̱zan. Ko ka̱yat na̱ta̱ngwat ka na ka bvwon shisham na ji.
42Ku ni ryi a̱mi ka̱ram ka ba̱nyet ka̱n kwi ba ban ta̱za ni. Ka̱ram ka rwam a kun nwa ka̱yat ryak ka ni ku yet nying bwi, ma ka̱ram ka kun ta̱za ni ku bu byyi bwi ba. 43Ka̱ram ka ban kpo tyyi i ryak a ni, ku ryi bibyyi i si bu yet a̱bubvot. Ka̱ram ka ban kpo yrek ni, ku ni yet ka̱sham bu byyi cet. 44Ka̱ram nyat ka ku yet rwam a̱neywu; ka̱ram ka kun ta̱za ni ku brak tyyi rwam a tswa zi breng ni. Nyin ma yi bvwo rwam ani n shyi; rot a̱mi rwam a tswa zi breng ni ma̱n shyi. 45Ba̱ryat Ka̱za ma a̱ hywa, “Ba yin yya A̱damu ka̱son nu bu sucet,” ma a̱nying a̱ngbom u nu a̱ yet Tswa ji wwat sucet i. 46Yi bvwo a̱nying rwam u nu a̱ na yet ka̱son a̱ ba, a̱nying Tswa nu a̱ sin sak. 47Dirwap ka̱sa nti ba yin bvwa a̱n yya A̱damu ka̱son nu, ma a̱mba̱hwa nu a̱ ba nyyai Tazwa. 48Ba̱nyet ba a̱ yet ba̱nying ka̱sa ba ni a̱ ryi di a̱yin nu ba yin yya di dirwap ka̱sa ti ni, ma ba̱nyet ba a̱ yet ba̱nying Tazwa ba ni a̱ ryi di a̱yin nu a̱ ba nyyai Tazwa ka ni. 49Ka̱sak ka zin tai a̱tuba nu ba yin yya di dirwap ka̱sa ti ni, a̱mi zi bu nin tai A̱tuba nu a̱ ba nyyai Tazwa ka ni.
50Ba̱wumbeyang, kyang a n cat yi bvwo ni ku na ni: dinam bu ba̱sok a̱ ni maai a̱ nwa ka̱yat Dityok Ka̱za ti ba. Kyang a yet nying bwi ni mbrak tyyi nying wi bwi ba.
51N ya tyyei kyang yring yin shyi i ka̱nrang: sa̱rei njit a̱mi ni kwi ba, ma ba bu za shei ba̱sa̱rei njit 52ka̱baram ba̱cincong, di ta̱kpat dissi ni, ka̱ram ka a̱ngbom digba da̱ nin tyyak ni. Rot ka̱ram ka digba tin tyyak ni, ba̱nyet ba a̱ ka̱n kwi ni, ba ba̱ yrek bu ndwam a ni wi bwi ni, a̱ si bo shei ryi njit a ba̱sa̱rei. 53Rot dolet a̱mi rwam a yet nying bwi a ni i brak tyyi nying wi bwi a, rwam a yet nying kwi a ni i brak tyyi nying wi kwi. 54Rot a̱mi ka̱ram ka a̱nying bwi u na̱n brak a̱ tyyi a̱nying wi bwi u ni, a̱nying dikwu a̱ brak a̱ tyyi a̱nying wi kwi ni, da̱ni di ba̱ryat Ka̱za ban hywa ni yet ka̱ryong: “Dikwu tyak mbvak nti; ba ta̱ ya!”
55“Dikwu, dingwak ya zwang nwan ti shyi ke?
Dikwu, cet top nwan na shyi ke?”
56Dikwu shya cet top nti na nyyai da̱ a̱ka̱tukyya, a̱ka̱tukyya a̱ ma̱n shya cet nu na nyyai di Truwang Musa. 57Ma zi gwai Ka̱za mi ka za jyet nasara rot kyang a Yesu Kristi A̱gwam njit na̱ yya ni.
58Rot a̱mi, ba̱wumbeyang, yi sseng ansham. Yi ya ka̱son bu mpfong A̱gwam Yesu kozan ka̱ram, rot yi bvwo kozan kyang yi yya an pfong Yesu na ni yi nin byyi kpungtun.
Currently Selected:
1 Korinti 15: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
