1 Korinti 12
12
Za̱nang ji Tswa Ka̱za jring zi wwat ni
1Naanini, tazwa za̱nang nTswa Ka̱za, n cat yin cii kyang ba. 2Yi bvwo ka̱ram ka yi yin yet ba̱nyet witssup ni, ba yin ya kwak a̱ si tyyi zan, yi yen tssup na̱za na̱yaan na a̱ byyi sso ni ba. 3Nkpa a̱mi n ya tyyei: a̱yin a̱n shyi a̱ ni ryat ka̱yat Tswa Ka̱za a̱ ni shyi Yesu ba; da̱ a̱yin na̱ bo ma̱n shyi a̱ ni maai a̱ dyep Yesu a̱ ku yei A̱ntyok Ka̱ryi ba, seko a̱ shyi bu Tswa Ka̱za ji.
4Za̱nang ji Tswa Ka̱za zi wwat i shii ka̱tswa, ma bu Tswa jring nji wwat. 5Mpfong i bun shyi ba̱zi ntaka̱i, ma A̱gwam a̱yring zi ku yya mi. 6Ncet pfong a bvwon, ma Ka̱za ka̱yring a̱mi a̱ wwat koyan cet pfong a. 7Kozan a̱yin Ka̱za a̱ ku nang za̱nang nTswa ji, rot koyan a̱ ga brang ba̱nyet tssup ba̱yaan. 8Tswa ji na wrak a̱yanyet ba̱ryat a̱za̱ncyi; a̱yanyet bu Tswa jring iya zi ku ryi ba̱ryat bvwo. 9A̱yanyet a̱ byyi za̱nang tyyi rya, a̱yanyet meyang za̱nang creng nhywu bu di Tswa jring iya; 10a̱yanyet a̱ byyi za̱nang yya nkyang ka̱hat, a̱yanyet za̱nang ssang ba̱ryat Ka̱za tyyei, a̱yanyet za̱nang ghai Tswa Ka̱za ba̱ a̱ka̱tuk ntswa; a̱yanyet a̱ byyi za̱nang ryat a a̱riryem ba̱gingang, a̱yanyet za̱nang bvan a̱riryem. 11Sa̱rei za̱nang jini Tswa jring a̱mi ka, i bu ka koyan ka̱sak ka zin cat i.
Ka̱sak ka rwam a kun byyi nkap i
12Da̱ni rwam a kun yet yring ni bu byyi nkap ba̱gingang ni, a̱mi sa̱rei nkap a nan yet bu rwam yring. Ami kun dyi bu Yesu Kristi. 13A̱mi njit sa̱rei njit ba̱nyet Yahuda bu kpikpit nwap a, di ba̱nyet ba a̱ yet ba̱nyet na̱sa ni di ba̱nyet ba a̱ yet ba̱kwwa ni; ba ka̱n za yya baptisma di Tswa jring a̱ tyyi i rwam Yesu; Tswa jring a̱mi sa̱rei njit zi ka̱n sswa.
14Rwam a byyi bu kap yring ba. Nkap n shyi ba̱gingang. 15Ki tak ku si bu hywa, “Nzuk n yet bvak ba, rot a̱mi n shyi i rwam ba,” nkpa ni tyyi ku ka̱u din shyi i rwam a ba. 16Ki pfwo ma̱n hywa, “Nzuk n yet dissi ba, rot a̱mi n shyi i rwam ba,” nkpa ni tyyi kun wi shyi i rwam a ba. 17Rwam a sa̱rei si bu yet dissi, ku yya ni n pfong? Ko ku si bu yet pfwo sa̱rei, ku yya ni n pfong swam a? 18Ma da̱ni di Ka̱za kan yya rwam a ni, a̱n tyei nkap a ka̱sak ka kan dyi dama ni. 19Ku si bu yet bu kyang yring, kun yet rwam ba; 20ma ba kpo yya an kap ba̱gingang, ma bu rwam yring a̱mi.
21Dissi n hywa di bvak, “N na̱ cat ba, an byyi kpungtun ba.” Diccu ti n hywa da̱ a̱tak, “N ya cat ba.” 22Ku ryi a̱mi ba. Zin yya kyang n sang nkap iya zi ryi na sang cet a ni ba. 23Na̱bvwa na̱yaan na zi cyang di na yet kyang i rwam njit ni ba, zi na na̱ cam, na̱ cii; na̱bvwa na̱yaan na zi wi cat ba̱nyet a̱ ryi ni zi si bu na̱ cam ansham, 24ma nkap a yet i na byyi nsum cyang ba Ma Ka̱za a̱ yya rwam a ka̱sak ka nkap a sang shii ni i shya shii a, 25rwam a gi yet yring, nkap a i shyi ba̱cicrak, i bu ya brang. 26Ki kap yring shyi i sswa ka̱bvung, sa̱rei nkap a na san dikwu ti hok, ki ba ma̱n dyep kap yring, sa̱rei nkap a na hok ansham.
27Naanini sa̱rei nyin yi tung i yet rwam Yesu na; koyan a̱ yet kap yring. 28Ka̱yat ba̱nyet tssup ka Ka̱za a̱ tason a̱n tyyi ba̱nyet yya wa'azi; ba̱nyet ba a̱n tssup i mba a̱ yet ba̱nyet ssang pfong Ka̱za a̱ tyyei; ba̱nyet ba a̱n sak i ba̱nyet zzek. Kpikpit a mba a̱ yet ba̱nyet yya nkyang ka̱hat, bu ba̱nyet ba a̱ byyi za̱nang creng ba̱nyet i, bu ba̱nyet pfong dizot, bu ba̱nyet breng ba̱nyet tssup, bu ba̱nyet ba a̱ byyi za̱nang ryat a̱riryem ba̱gingang ni. 29Ba sa̱rei mba a̱mi a̱ yet ba̱nyet wa'azi ba, ko ba̱nyet ssang ba̱ryat Ka̱za tyyei, ko ba̱nyet zzek, ko ba̱nyet yya nkyang ka̱hat, 30ko ba̱nyet creng nhywu, ko ryat a̱riryem ba̱gingang, ko tyyei kyang a ba ryat i. 31Kyang a myim ni yi tyyi ndya nyin an za̱nang ji yet a̱gba̱dang ni.
Cat ba̱nyet di ka̱ryong
Ma a̱kpok u nu a̱ yet ryen na n ni ya tyyei ni.
Currently Selected:
1 Korinti 12: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
