Ovafilipi 1

1 # Oviu 16:12 Okuza ku Paulus na Timoteus, ovakarere va Kristus Jesus. Matu tjanga kovandu avehe mOfilipi mba rira otjiwaṋa tja Ndjambi mu Kristus Jesus, na kovanane novatarere wombongo.

2Ndjambi Tate na Muhona Jesus Kristus nge mu pe ohange notjari!

Paulus ma kumbire ombongo

3Ami mbi tja okuhepa ku Ndjambi aruhe tji me ripura na eṋe. 4Nu aruhe mbi mu kumbira nenyando, 5okuza keyuva etenga nga ku nai tjinga amwe ndji vatera okuzuvarisa Ombuze Ombwa. 6Nu, tjiri, me tjiwa nawa kutja Ndjambi ngwa utire otjiungura otjiwa mu eṋe, mee ketjimana meyuva ndi Kristus Jesus ndi meya. 7Eṋe aruhe mu kara mourizemburuka wandje! Notje ri kokuwa ku ami okuripura na eṋe. Orondu eṋe amuhe mu norupa puna ami motjari tja Ndjambi tje ndji pa nai motjovakamburwa mu mbi ri mena rOmbuze Ombwa, na indu tji me riyeura mombanguriro nokuhongonona ouatjiri wayo. 8Ndjambi wina ma tjiwa kutja ami mbi mu zera amuhe norusuvero Kristus Jesus ndwe mu suvera na rwo.

9Nu me kumbu kutja okusuverasana kweṋu ku ryamene ko komurungu, nokutja mu kure mokutjiwa ouatjiri namokusosonona oviṋa momuano omusemba, 10kokutja mu sore okutoorora imbi mbi ri oviwaviwa. Neṋe otji mamu rire ovakohoke novehinatjipo meyuva Kristus ndi meya, 11nongarero yeṋu mai urisiwa novihape vyousemba mbi za mu Jesus Kristus erike, kondjozikiro na kondangero ya Ndjambi.

Kristus nOmbuze ye Ombwa

12Ami, vakwetu ovasuverwa, me vanga kutja mu tjiwe kutja oviṋa mbya tjitwa ku ami vya vatera okuryamisa Ombuze Ombwa komurungu. 13#Oviu 28:30Ovatjevere vondjuwo youhona novakwao avehe varwe mbe ri mba nambano mave tjiwa kutja ami mbi ri motjovakamburwa mena rokutja mbi karera Kristus. 14Ovakwetu ovengi va zeuparisiwa mouṱakame wawo mu Muhona i omapando wandje, nowo otji va hara ouvanḓe okuzuvarisa Ombuze ya Ndjambi nokuhenandira.

15Nu ongahukiro kutja ovandu tjiva ve zuvarisa Kristus tjinga ave neruru nozombata, nungwari tjiva ve zuvarisa Kristus nombango ombwa, 16tjinga ave ndji suvera, nu tjinga amave tjiwa kutja okuyeura Ombuze Ombwa oko otjiungura tjandje. 17Nu imba mbe zuvarisa Kristus mena reruru nozombata, ve zuvarisa nombango ombi nokurivara oveni; owo ve tjangovasi mave weza ko ouzeu ku ami ngunda ambi ri motjovakamburwa.

18Nungwari mape vatere tjike? Otjiṋa otjinanḓengu okongwi okutja Kristus ma zuvarisiwa komuhingo ngamwa auhe, nandarire kutja owoposyo poo omusemba, ami me yoroka. Nami me panḓere pokuyoroka, 19tjinga ame tjiwa kutja me yamwa motjimbe tjozongumbiro zeṋu nombatero ndji za kOmbepo ya Jesus Kristus. 20Onḓero yandje onene nomaundjiro wandje okongwi okutja eha ṱisiwa ohoṋi oparukaze mu ngamwa tjiṋa, nungwari aruhe mbi panḓipare, kokutja mu avihe, mbi me hungire na mbi me tjiti, mbi yandje ondjozikiro ku Kristus, kutja omokukara nomuinyo poo omokuṱa. 21Otja ku ami, okukara nomuinyo okukarera Kristus, nonḓiro yandje okumunina po ondjambi. 22Nungwari tji mba karerere nomuinyo, me sora okuungurira Kristus komurungu. Nu ingwi kutja hi toorore tjiṋe hi nokutjiwa. 23Me nanwa kuvari; mbi nonḓero okuisa omuinyo mbwi nokukakara pamwe na Kristus; ihi atja rira kokuwa tjinene komeho ku ami. 24Nungwari motjimbe tjeṋu okokuwa tjinene komeho kutja mbi kare nomuinyo. 25Ami mbina ouatjiri kutja me toorora okukara nomuinyo puna eṋe, kokutja mbi mu vatere okukura mongamburiro, nu mu kare nenyando mongamburiro yeṋu. 26Nu tji mba kotoka rukwao ku eṋe, ohiviro yeṋu otji mai ririre ko onene mu imbi Kristus Jesus mbya tjitira eṋe mu ami.

Okuhihamisirwa Kristus

27Nambano otjiṋa otjinanḓengu tjinene okongwi okutja mu kare otja komuhingo wOmbuze Ombwa ya Kristus, nangarire tji meya ne mu munu, nangarire tji mbi ri kokure ne zuu kutja mwa zikama pamwe mombepo imwe, nokutja mu rwira pamwe ongamburiro yOmbuze Ombwa nomutima umwe. 28Amu tira ovanavita na eṋe; aruhe panḓipareye! Ihi matji ve raisire kutja owo mave pandjara, neṋe amu yamwa; nondjamo ndji mai zu ku Ndjambi. 29Ndjambi we mu pa otjari kutja mu karere Kristus, nu kamokukambura mu ye porwako, nungwari wina omokutatumisirwa ye. 30#Oviu 16:19-40Nambano eṋe mamu ru otjirwa tjingetjo hi ami tjinga ambi rwa; otjirwa hi okongwi okuyeura Ombuze Ombwa. Eṋe mwe tji muna rukuru ame tji ru, nu nambano wina me kaenda komurungu okutjirwa.

Currently Selected:

Ovafilipi 1: HRR-UNI

Highlight

Copy