2 Ekuruhungi 23
23
Jojada ma pirukire Atalja
(2Ozo 11:4-16)
1Nungwari mombura oitjahambombari Jojada omupristeri we rimana kutja indwi orwo oruveze orusemba okupirukira Atalja. Eye we rikuta kuna ovahongore vetano votjimbumba tjovita: OoAsarja, omuzandu wa Jeroham, na Ismael, omuzandu wa Johanan, na Asarja, omuzandu wa Obed, na Maaseja, omuzandu wa Adaja, na Elisafat, omuzandu wa Sikri. 2Owo va ryanga movihuro avihe vya Juda, ave eterere Ovalevi noviuru avihe vyozonganda zOvaisrael kOjerusalem.
3 #
2Sam 7:12
Avehe va woronganena mondjuwo ya Muhona, nu imo omu va tjitira omerikutiropamwe na Joas, omuzandu wombara. Jojada we ve raera a tja: “Omuzandu wombara ndja koka, eye ngwi! Eye nambano ongu ma rire ombara otja Ndjambi pa kwizikire kutja ozondekurona zombara David maze rire ozombara. 4Eṱe matu tjiti nai: Ovapristeri nOvalevi tji mave ya koviungura mesabata, orukondwa orutjatatu rwawo maru tjevere omivero vyondjuwo ya Muhona, 5norukondwa orutjatatu orukwao maru tjevere ondjuwo youhona, nu indwi orutjatatu orusenina maru tuwa pOmuvero wOmazikameno. Notjiwaṋa atjihe matji woronganene morupanda rwondjuwo ya Muhona. 6Kape na umwe ngu ma hiti mondjuwo ya Muhona posi yovapristeri nOvalevi mbe ri motjiungura. Owo mave yenene okuhita, orondu owo va yapurwa. Nungwari otjiwaṋa atjihe ngatji kare nonḓuviro komaraerero wa Muhona, nu tji kare pendje. 7Ovalevi mave kurama okukondoroka ombara amave i tjevere, ave nomangaruvyo wawo momake, nu mave kara puna ombara akuhe ku mai i. Auhe ngu ma kondjo okuhita mondjuwo ya Muhona, nga ṱe.”
8Ovalevi nOvajuda avehe va zuva komarakiza wa Jojada. Ovarumendu kave isirwe mo moviungura, tji va kutuka mEyuva rOkusuva; ovahongore otji va yakura imba mbe ya koviungura, na imba mba kutuka. 9Jojada wa yandja omanga notuvao kovahongore mbya ri ovyombara David nu mbya pwikirwe mondjuwo ya Ndjambi. 10Eye wa kuramisa ovarumendu, mba ri nomangaruvyo momake, okukondoroka komukuma auhe wokomurungu wondjuwo ya Muhona kutja ve tjevere ombara. 11Jojada wa pitisa Joas, e mu twako ekori rouhona kotjiuru tje ne mu pe embo romatwako womananeno wouhonapare. Komuhingo mbwi Joas wa zikwa okurira ombara. Jojada, omupristeri, novazandu ve va twirisa Joas, navehe va ravaera ave tja: “Ombara ngai hupe orure!”
12Ombara oserekaze Atalja tja zuva otjiwaṋa ama tji ravaerere ombara nondjoroka, otja tupuka ohakahana kondjuwo ya Muhona, otjimbumba ku tja woronganena. 13Imbo pomahitiro wondjuwo opa muna ombara ombe, aya kurama pongunḓe ndja tjitirwa ozombara, nu aya koverwa i ovahongore vovimbumba vyovita novatone vozohiva. Ovandu avehe aave ravaere nondjoroka nokutona ozohiva, novaimbure novinangoma vyawo aave hongorere ovandu nomanyando nga. Nu Atalja wa nyondorora ozombanda ze na ravaere a tja: “Omatjendje, omatjendje!”
14Jojada ka vangere kutja Atalja a ṱire popezu nondjuwo ya Muhona; notja pitisa ovahongore votjimbumba tjovita na tja ku wo: “Pitisireye Atalja pokati kotuteto twovatjevere, nu zepeye ngamwa auhe ngu ma vanga okumuyama.”
15Ovandu va kambura Atalja, ave mu twara kondjuwo youhona nave kemuzepera pOmuvero wOukambe.
Omarundurururiro Jojada nga tjita
(2Ozo 11:17-20)
16Omupristeri Jojada wa kondja kutja ombara Joas notjiwaṋa ve rikute kuna ye okutjita omerikutiropamwe wokutja mave kara otjiwaṋa tja Muhona. 17Owo avehe otji va ya kondjuwo onḓere ya Baal nave keihaṋa. Va nyanyaura otjipunguhiro noviserekarera vyovisenginina mbya ri mo, nave zepere Matan, omupristeri wa Baal, momurungu wovipunguhiro. 18Jojada wa zika ovapristeri nOvalevi moviungura vyondjuwo ya Muhona. Owo aave ungura oviungura avihe otja kovimbumba mbya haṋenwe i ombara David; va ningiririsa ozombunguhiro ozoningiririsiwa nḓe punguhirwa Muhona otja komazikamisiro wa Moses, amave yoroka nokuimbura otja David pa rakiza. 19Jojada wina wa zika ovatjevere vopomivero vyondjuwo ya Muhona, ve tjaere omuhakohoke ngamwa auhe kutja a ha hiti.
20Ovahongore vovimbumba vyovita, novatjiukwa votjihuro, novahongore notjiwaṋa atjihe ve rikuta ku Jojada motjimbumba tji tja ṱika ombara okuza kondjuwo ya Muhona okuitwara kondjuwo youhona. Owo va hitira momuvero imbwi omunene wondjuwo youhona, nombara ya kahaama kotjihavero tjayo tjouhona. 21Otjiwaṋa atjihe tja yoroka, notjihuro tja porimana, Atalja tja za nokuṱa nengaruvyo.
Currently Selected:
2 Ekuruhungi 23: HRR-UNI
Highlight
Copy
Compare
Share
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
