2 Ekuruhungi 22
22
Ahasia ma rire ombara mOjuda
(2Ozo 8:25-29; 9:21-28)
1Ovaaraba tjiva va taurira mozondanda nave zepa ovazandu avehe vombara Jehoram, posi ya Ahasia, ingwi ongero. Komuhingo mbwi ovandu va Jerusalem otji va zika Ahasia a rire omupingene wa ihe mouhona. 2Ahasia wa rira ombara tja ri nozombura omirongo vivari na mbari; neye wa honapara mOjerusalem oure wombura imwe. Ina wa ri Atalja, omusuko wombara Ahab, nomusuko womusuko wa Omri, ombara ya Israel. 3Ahasia wina wa horera kotjikaro tjeṱunḓu rombara Ahab, ina tjinga e mu popera kouvi. 4Eye wa tura ondjo komurungu wa Muhona, orondu kombunda yonḓiro ya ihe, ovandu veṱunḓu rombara Ahab ombaa ve mu popere kombandjarero ye. 5Ahasia wa zuva kondunge yawo ne rikutu kuna Jehoram, omuzandu wa Ahab ombara ya Israel, movita okurwisa Hasael, ombara ya Sirie. Ovimbumba vyovita vya hakaenena kOramot mOgilead, nu Joram wa tendwa motjirwa. 6Jehoram wa yaruka kotjihuro Jesreel okukaveruka ovito vye, nu Ahasia wa ya ngo okukemuvarura.
7Ndjambi wa tjita kutja omavaruriro nga wa Ahasia ku Joram ye ete onyoneno ku ye. Ahasia ngunda e ri ngo, eye na Jehoram va rwisiwa i Jehu, omuzandu wa Nimsi, ngwa twirisirwe i Muhona kutja a nyone ouhona wa Ahab. 8Jehu ngunda ama eta omberero ya Ndjambi kouhona wa Ahab, wa hakaena notjira mu mwa ri ovanane vOvajuda novasya va Ahasia, mba kongorera Ahasia mouyenda we. Nu Jehu we ve zepa avehe. 9Tjazumba Ahasia wa pahewa; nowo ve kemuvaza a ṱara mOsamaria. Owo ve mu twara ku Jehu nave mu zepa. Nungwari va paka orurova rwe mena rondjozikiro ku ihe mukururume, ombara Josafat, ngwa karerere Muhona nomutima we auhe.
Kapa ri umwe weṱunḓu ra Ahasia ngwa hupa, nu ngwa yenena okuhonapara.
Atalja ma rire ombara oserekaze mOjuda
(2Ozo 11:1-3)
10Kamanga Atalja, ina yombara Ahasia, tja zuva kutja omuzandu we wa ṱu, otja rakiza kutja ovandu avehe veṱunḓu rombara ya Juda ve ṱe. 11Ahasia wa ri nomuṱena wena Joseba, ngwa kupirwe i omupristeri Jojada. Joseba wa yama Joas, umwe wovazandu va Ahasia, mongumumu, e mu isa po povazandu ovakwao vombara, mba ri pokuṱa, ne mu horeke puna omumuṱakamise metuwo romapwikiro wovirare mondjuwo ya Muhona. Joseba wa horeka Joas ku Atalja kutja a ha ṱu. 12Joas wa horekwa mo oure wozombura hamboumwe, Atalja ngunda ehonapara otja ombara oserekaze.
Currently Selected:
2 Ekuruhungi 22: HRR-UNI
Highlight
Copy
Compare
Share
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
