2 Ekuruhungi 2
2
Salomo me rirongerere okutunga ondjuwo ya Muhona.
(1Ozo 5:1-18)
1Salomo we rimana okutunga ondjuwo Muhona mu me rikotamenenwa, na wina okuritungira ondjuwo ye youhona. 2Eye wa twa ovarumendu 70,000 okututa omitwaro, novarumendu 80,000 okuka omawe mozondundu. Pa ri ovarumendu 3 600 mbaa ve tjevere oviungura.
3Salomo wa hinda ombuze ku Hiram, ombara ya Tirus, na tja: “Ndji randisa otupapa otja tji wa tjitire ku tate, ombara David, indu tji we mu randisire omiti vyotupapa okutunga na vyo ondjuwo ye youhona. 4Ami me tungu ondjuwo okuyozika Muhona, Ndjambi wandje. Oyo mai rire poṋa popayapuke ami notjiwaṋa tjandje mu matu rikotamenene ku ye mokutwimisa ovyomoro omuwa, nu mu matu punguhire ozomboroto zomaraisiro aruhe, nu mu matu punguhire ozombunguhiro ozoningiririsiwa, omuhuka auhe nongurova aihe, mesabata, mOmukandi wOmatendameno wOmueze, na momayuva warwe omayapuke, kondjozikiro ya Muhona, Ndjambi wetu otja tji pa rakiziwa ku Israel nga aruhe. 5Ami me vanga okutungira Muhona ondjuwo onene, Ndjambi wetu tjinga e ri omunene poomukuru varwe ngamwa. 6#1Ozo 8:27; 2Eku 6:18Nu tjiri, kape na umwe ngu ma yenene okutungira Ndjambi ondjuwo, orondu nangarire ounene womayuru kamaau yenene ku ye. Ami me sora vi okutungira Muhona ondjuwo, posi yopoṋa porwapo pu mape twimisirwa ovyomoro omuwa ku Ndjambi? 7Nambano ndji hindira omurumendu onongo mokukorora omiti, na mokuungura ongoldo nosilveri nongoporo novitenda, na mokutunga omarapi omarovazu nomaserarovazu nomaserandu pyu. Eye ma ungura puna ozonongo zandje nde ri mOjuda na mOjerusalem, nu nda toororwa i tate David. 8Ami me tjiwa kutja ovaungure voye ve tjiwa okuka omiti. Ndji hindira omiti vyotupapa novyomiparara novyomiṱati vya Libanon. Ami mba rongere okukuhindira ovarumendu vandje ve vatere imba ovoye. 9Owo mave ungura omiti omingi, orondu ondjuwo, ndji me vanga okutunga, mai rire onene nohimise. 10Ami me ku hindire ovikokotwa ozotona omayovi yevari, novirya ozotona omayovi yevari, nomavinu ozorita omayovi omasere yane, nomaze womiṋinga ozorita omayovi omasere yane vi rire ovikurya vyovarumendu voye ovaungure.”
11Hiram, ombara ya Tirus, wa tjanga eziriro ndi ku Salomo: “Muhona tjinga a suvera otjiwaṋa tje, eye we ku zika okurira ombara yatjo. 12Nga tangwe Muhona, Ndjambi wa Israel, Omuute weyuru nehi! Eye wa yandja omuzandu onongo nomunazondunge nomunandjiviro kombara David. Nomuzandu ngwi nambano we ripura okutungira Muhona ondjuwo, nondjuwo ye omuini youhona. 13Ami me ku hindire omurumendu omunazondunge nonongo wena Hiram. 14Ina wa ri owomuhoko wa Dan, nu ihe wa ri omukwatera wotjihuro Tirus. Eye u tjiwa okuungura oviṋa pongoldo nosilveri nongoporo novitenda nomawe nomiti. Nu u tjiwa okuungura nomarapi omarovazu nomaserarovazu nomaserandu pyu, notupera otuheze. Eye wina u tjiwa okukorora noruvyo nokutjanga ovisanekero ngamwa mbya raerwa. Nga ungure puna ovaungure voye ozonongo, na puna imba mbaa ve ungurire iho, ombara David. 15Nambano tu hindira ovirya novikokotwa nomavinu, nomaze womiṋinga mbi wa heya. 16Eṱe matu ku pe otupapa atuhe tu mo hepa mozondundu za Libanon, natu tu kutu nawa kumwe natu tendezisa two nga kOjopa. Okuzambo oove ngu mo tu twara kOjerusalem.”
17Ombara Salomo wa vara ovandu wozonganda avehe, mba turire mehi ra Israel tjimuna ihe David tja varere. Mwa ri ovature wozonganda 153 600. 18Eye wa toorora ovandu 70,000 okututa omitwaro, na 80,000 okuka omawe mozondundu, nu wa zika ovatjevere 3 600 okuhingira ovandu koviungura.
Currently Selected:
2 Ekuruhungi 2: HRR-UNI
Highlight
Copy
Compare
Share
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
