2 Ekuruhungi 18
18
Omuprofete Mikaja ma rongo Ahab
(1Ozo 22:1-28)
1Josafat, ombara ya Juda, tja rira omutumbe nomutjiukwa, wa hungira orukupo rwomundu weṱunḓu re nora Ahab, ombara ya Israel. 2Kombunda yozombura tjiva, Josafat wa ya kOsamaria okukavarura Ahab. Nu Ahab wa zepa ozonḓu nozongombe ozengi okutjitira Josafat na imba mba ri puna ye omukandi. Eye wina wa rora okupopa Josafat e rikute kuna ye kutja ve karwise otjihuro Ramot mOgilead. 3Ahab wa pura Josafat a tja: “Mo yenene okuyenda puna ami okukarwisa Ramot mOgilead?”
Josafat wa zira a tja: “Ove tji we rirongere puna otjimbumba tjoye tjovita, ami wina me rirongere puna ihi otjandje. Matu rikutu kuna ove.” 4Tjazumba a tja: “Nungwari rutenga pura Muhona otjiṋa hi.”
5Ahab otja woronganisa ovaprofete mangara omasere yane ne ve pura nai: “Hi karwise Ramot mOgilead?”
Owo va zira ave tja: “Ketjirwise! Ndjambi me ku pe outoṋi.”
6Nungwari Josafat wa pura nai: “kape nomuprofete warwe ngu ma sora okutupurira ku Muhona are?”
7Ahab wa zira a tja: “Ingee pena umwe, ingwi Mikaja, omuzandu wa Imla. Nungwari ami mbe mu tonda, eye tjinga e he ndji ukire otjiṋa otjiwa, posi ya aruhe tjinga e ndji ukira oviwonga uriri.”
Josafat wa zira a tja: “O tja nao.”
8Ombara Ahab otja isana omukarere ombondo wondjuwo youhona ne mu raere kutja a kaete Mikaja tjimanga.
9Ozombara azeyembari za haama kovihavero vyazo vyouhona potjitondero pendje yomuvero wa Samaria, aza zara otupera twazo twouhona; novaprofete avehe va ukira momurungu wazo. 10Umwe wovaprofete mba, ngwa ri nena Sidkija, omuzandu wa Kenana, we riungurira ozonya zovitenda, na tja ku Ahab: “Muhona ma tja nai: ‘Ove mo rwisa Ovasirie nozonya otja inḓa, nga tji we ve yandeke.’ ” 11Ovaprofete avehe varwe va hungira tjingetjo nave tja: “Karwise Ramot mOgilead, nove moka toṋa. Muhona me ku pe outoṋi.”
12Omukarere ingwi ombondo ngwa ya okukaeta Mikaja wa tja nai ku ye: “Ovaprofete avehe varwe va ukira ombara ouṋingandu, nove tjita otja ovakweṋu wina.”
13Nungwari Mikaja wa zira a tja: “Tjiri, tjimbe tja Muhona omunamuinyo ami me hungire imbi Ndjambi mbi me ndji raere.”
14Neye tje ya kombara Ahab, eye we mu pura na tja ku ye: “Mika, ami nombara Josafat ngatu karwise Ramot mOgilead?”
Mikaja wa zira a tja: “Twendeye, nu mamu ka toṋa. Muhona me mu pe outoṋi.”
15Nungwari Ahab we mu zira a tja: “Tji mo hungire ku ami mena ra Muhona, hungira ouatjiri! Mbi sokukuraera ovikando vingapi?”
16 #
Num 27:17; Esek 34:5; Mt 9:36; Mk 6:34 Mikaja wa zira a tja: “Ami mba muna Ovaisrael avehe ava rimbara kozondunda tjimuna ozonḓu nḓe hi nomurise. Nu Muhona wa tja: ‘Ovandu mba kave nomunane, ve esa ve yaruke kozoyawo mohange.’ ”
17Ahab wa tja nai ku Josafat: “Ami mbe ku raera kutja Mika kemee ndji ukire otjiṋa otjiwa; aruhe me ndji ukire oviwonga uriri!”
18Mikaja wa hungira komurungu a tja: “Nambano puratena ku imbi Muhona mbi ma hungire. Ami mba munu Muhona a haama kotjihavero tje tjouhona meyuru, ovaengeri ve avehe ava kurama posi ye. 19Muhona wa pura a tja: ‘Owaṋi ngu ma popo Ahab kutja a kaṱire kOramot mOgilead?’ Ovaengeri tjiva va hungira otjiṋa tjimwe nu imba ovakwao va hungira otjiṋa tjarwe, 20nga ombepo imwe tji ya kayenda komurungu, ai ya ku Muhona nai tja: ‘Ami me mu popo.’ Muhona we i pura nai: ‘Mo mu popo omuhingo uṋe?’ 21Ombepo ya zira ai tja: ‘Ami me katjita kutja ovaprofete va Ahab avehe ve kore ovizeze!’ Muhona wa tja ku yo: ‘Twende u kemupope. Ove moka toṋa!’ ”
22Nu Mikaja wa mana okuhungira na tja ku Ahab: “Pa tjitwa nai, Muhona wa tjita kutja ovaprofete voye ve ku korere ovizeze. Nungwari Muhona omuini we ku yengera otjiwonga!”
23Sidkija, omuzandu wa Kenana, wa ya ku Mikaja ne mu tono orupyu kotjitama na tja ku ye: “Ombepo ya Muhona ya za mo vi mu ami nai kahungira na ove?”
24Mikaja wa zira nai: “Ove mo rimunine omuini meyuva ndo tji mo kerihoreka metuwo romokwara.”
25Ombara Ahab wa rakiza komukarere we umwe na tja: “Kambura Mikaja u mu tware ku Amon, ingwi ongooneya yotjihuro, na ku Joas, omuzandu wombara. 26Ve raera kutja ve mu yumbe motjovakamburwa, nu ve mu pe ozomboroto nomeva uriri, nga tji mba kotoka nokuhinatjipo.”
27Mikaja wa zira a tja: “Tji wa kotoka nokuhinatjipo, okutja Muhona ka hungirire notjinyo tjandje.” Neye wina wa weza na tja nai: “Auhe weṋu nga puratene ku inga ngu mba hungire.”
Onḓiro ya Ahab
(1Ozo 22:29-35)
28Ahab, ombara ya Israel, na Josafat, ombara ya Juda, otji va karwisa otjihuro Ramot mOgilead. 29Ahab wa tja nai ku Josafat: “Tji matu i kovita ami me riteturura, nungwari ove mo i awe ri zarisa otja ombara.” Ombara ya Israel otji ya ya kovita aye riteturura.
30Ombara ya Sirie ya rakizire kovatye vomatemba wayo wovita kutja ave ha nanene omundu warwe motjirwa posi yombara ya Israel aiyerike. 31Owo tji va muna ombara Josafat, avehe va tjangovasi eye onguri ombara ya Israel, nave mu rwisa. Nungwari Josafat wa ravaera ku wo, nu Muhona, Ndjambi, we mu yama, na isa ko otjirwa ku ye. 32Ovatye vomatemba wovita tji va muna kutja eye kangu ri ngwi ombara ya Israel, otji va isa okumutezera. 33Nungwari Omusirie wa yumba otjiku ohei na yaha ombara Ahab pomahakaeneno wombanda ye yotjitenda nekwamo. Ahab wa ravaera komuhinge wetemba re rovita a tja: “Mba yahwa!” Neye we mu raera kutja a pitise etemba motjirwa. 34Otjirwa ngunda atja handja, ombara Ahab wa tjaererwa metemba re rovita a hungamasana nOvasirie. Momahitiro weyuva eye otja koka.
Currently Selected:
2 Ekuruhungi 18: HRR-UNI
Highlight
Copy
Compare
Share
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
