प्रकास 13

समुन्द्रसो ओल्लेतेङ लोका न्हेनोङ राक्सेस

1एनोङ, राक्सेस समुन्द्रसो बाहार ओल्लेतेङ लोका का तिङघा। वाको न्हि लोङ पुरिङ हिघाहि कालाउ तेलोङ दाङगेलाइ हिघाहि वाको गोताङ दाङता मुकुट हिघाहि। वाको गोताङ पुरिङता परमेस्वरको बिरोध पाका मिङ लेखेका हिघाहि। 2जेदोङ राक्सेस का तिङघा वा नाइभिरि भाइका हिघाहि, कालाउ वाको खोकोइगेलाइ लोकाराको भाइका हिघाहि, कालाउ वाको नुइ खुवाँको नुइ भाइका हिघाहि। बारका आजिङगर ताइको सरबुङ इङको राक्सेसहेङ पिहि कालाउ वासेहेङ प्रिथिबि ह्रुता सासन पालि खाबारा पिहि। 3वाको एनोङ पुरिङता, वाङखाराका पेचाराको दाग हिघाहि जेदोङ कारान वा सिलि दोधावा। कालाउ इङको पेचारा एल्लि दोका हिघाहि। ओदोङ भाअ्सिङ, प्रिथिबिता हिका द्‍याङगेलाइ आचाम्मा जेङहि कालाउ इङको राक्सेसहेङ पिताइलि तेङहि। 4झाराङ द्‍याङगेलाइ इङको बारका आजिङगरको आराधाना पाहि हाइपालिपानु वा राक्सेसहेङ खाबारा पिका हिघाहि। द्‍याङगेलाइ राक्सेसको बुङ आराधाना पाहि। इम्बालाइ दोअ्हि, “राक्सेसको भाइकाङ बल्लियाका हासु बुङ मान्थु। कालाउ हासु बुङ वाको दोफा धुम पालि माद्वावा।”

5परमेस्वर राक्सेसहेङ आनुमति पिहि कालाउकि वा ताइको खाबाराको बारेता घमन्ड पालि द्वाको। कालाउ परमेस्वरको आपामान पालि द्वाको। परमेस्वर राक्सेसहेङ न्हे कुरि न्हे माइना थेकापा थुनिहि। 6राक्सेस परमेस्वरहेङ स्रापलि तेङहि। वा परमेस्वरको मिङको बिरोधता, जेता परमेस्वर हिका इङको थामेको बिरोधता कालाउ स्वर्गता हिका गोताङ द्‍याङगेलाइको बिरोधता धुइहि। 7परमेस्वर राक्सेसहेङ आनुमति पिहि कि वा परमेस्वरको द्‍याङगेलाइ दोफा धुम पातेङ हारिपालि। कालाउ गोताङ कुल, भासा, रास्ट कालाउ जाति-जातिको झाराङ द्‍याङगेलाइहेङ सासन पालि राक्सेसहेङ बुङ आनुमति हि। 8कालाउ प्रिथिबिता हिका गोताङ द्‍याङगेलाइ राक्सेसको आराधाना पाहि। सुमिङहेङ सिरजाइका खान्तेङ लाम्फासोङ जेदोङ द्‍याङगेलाइको मिङ जिबनको कितापता लेखेका हिघाहि, सिरिप उङको द्‍याङगेलाइ राक्सेसको आराधाना मापाहि। जिबनको किताप थुमाको किताप हि जेदोङ बिलिदानको रुपता सेअ्का हिघाहि।

9जाइ काङको या काथा हिङदोङखे, वा इङको काथाहेङ ध्यान पितेङ हिनाको।

10जेदोङ द्‍याङ झ्यालखानाता परिलि गोइका हि, वा जातिङकोङ झ्यालखानाता परियाङ,

कालाउ जाइ तरवारहोइ सेअ्न्हालि गोयाङ, वा जातिङकोङ तरवारहोइ सेअ्न्हाङ।

ओदोङ भाअ्सिङ परमेस्वरको द्‍याङगेलाइ कस्टगेलाइको सोमोइता धैर्यता ताअ्लि गोइखे कालाउ परमेस्वरता जेलाउ बुङ भोरोसा पातेङ हिलि गोइखे।

प्रिथिबिसो ओल्लेतेङ लोका राक्सेस

11कालाउ न्हुसो, का आरोङ एनोङ राक्सेसहेङ प्रिथिबिसो बाहार ओल्लेतेङ हिका तिङघा। वाको बुङ थुमाको भाइका न्हेनोङ दाङगेलाइ हिघाहि। कालाउ जेलाउ वा नुइ धुइहि, वाको गाला बारका आजिङगरको भाइपाङ हिघाहि। 12इदोइ न्हेतेङ राक्सेस लाङतिको राक्सेसको पिका सरबुङ प्रयोग पाघाहि। वा सुमिङता हिका गोताङ द्‍याङगेलाइहेङ इङको लाङति राक्सेसको आराधाना पालि बाध्ये बानाइहि। कालाउ इङको राक्सेसको वाङखाराका पेचारा एल्लि दोका हिघाहि। 13न्हेतेङ राक्सेस हेन्जा आचाम्माका चिन्हा तिङपाहि। एता थेकापा कि, जेलाउ द्‍याङगेलाइ तिङघाहि वा आकाससो प्रिथिबि ह्रुता मे हुल्पाहि। 14न्हेतेङ राक्सेस इदोइ गोताङ लाङति राक्सेसको पिका सरबुङसो पाहि। इदोङ आचाम्माका चिन्हाको कारान हेन्जा द्‍याङगेलाइहेङ आसर जेङहि कालाउ इम्बाइलाइ धोका निङहि। न्हेतेङ राक्सेस द्‍याङगेलाइहेङ आग्या पिहि कि वा लाङति राक्सेसको मुर्ति बानाइहि कालाउ वाको आराधाना पाको। हेन्जा लाम्फा, इदोइ राक्सेसहेङ वाङखाराका पेचारा तरवारहोइ जेङका हिघाहि इन्सिका जेङलाउ बुङ आरोङ सिन्हुहि। 15न्हेतेङ राक्सेसहेङ बुङ परमेस्वर आनुमति पिहि कि वा लाङति राक्सेसको मुर्तिहेङ सिन्हु पाको, कालाउकि राक्सेसको मुर्ति काथा पालि द्वाको कालाउ आरुहेङ आदेस पिलि द्वाको जेदोङ द्‍याङगेलाइ इङको मुर्तिको आराधाना मापाखे इम्बालाइ सेअ्न्हाको। 16न्हेतेङ राक्सेस गोताङ द्‍याङगेलाइहेङ बाध्ये बानाइहि, जाइ महत्वय पुर्न कालाउ जाइ महत्वय हिन हि, धनि कालाउ गरिब, बान्धाइति माकुनु जाइ बान्धाइति माजेङका, कि उङको झाराङ द्‍याङगेलाहेङ लाङति राक्सेसको मिङ ताइको दाम्पाहा खुर माकुनु ताइको कापालता छाप लागाइयाको। 17राक्सेस इदोइ याको भाअ्सिङ पाहि कालाउकि सिरिप जाइ वाको ह्रुता छाप लागाइहि, वा दोङ आमेने पि:लि द्वाको कालाउ चोल्लि द्वाको। इङको छाप लाङति राक्सेसको मिङ हिघाहि माकुनु वाको मिङ तिङपाका सङख्या हिघाहि।

18इदोइ बुझिलिको भाअ्सिङ बुद्दिको आस्यकता हि। जाइ दोफा बुद्दि हि, वा दोङ राक्सेसको सङख्याको माने भोलि द्वावा। हाइपालिपानु इदोइ द्‍याङको मिङ हि। इङको इदोइ सङख्या हि छ छय छयसैछथि हि (666)

Currently Selected:

प्रकास 13: DHINT

Highlight

Copy

Compare