प्रकास 12

बेबाल कालाउ बारका आजिङगर

1जेलाउ इङको दोहि, इन्ता एनोङ आचाम्माका चिन्हा आकासता तिङपाहि। हाइपालिपानु एमि बेबाल तालि ह्रुता जाअ्तेङ हिघाहि, जाइको धाबा सान्हेको भाइपाङ चिल्काघाखे। वाको पुरिङता वा एनोङ मुकुट तुका हिघाहि जेदोङता तेन्हे फुरुगेलाइ हि। 2उङको बेबाल गान्धि तेअ्का हिघाहि, कालाउ वाको जामाल जोलोम पिका सोमोइ लोहि। जामालहेङ जोलोम पाका बेला, तु-निन्चानाङ वा ह्रिकाइतेङ हिघाहि। 3कालाउ आकासता आरोङ चिन्हा तिङपाहि: कालाउ इन्ता एनोङ इ:का रङको बारका आजिङगर जेदोङ साइतान दोङ हि। वाको दोफा न्हि लोङ पुरिङ कालाउ तेलोङ दाङगेलाइ हिघाहि। कालाउ गोताङ पुरिङता एनोङ-एनोङ मुकुट हिघाहि। 4इङको को मेथोङहोइ आकासको ए तिहाइ भाग फुरुगेलाइ कोअ्तेङ प्रिथिबि ह्रुता थाइगिल्पिहि। इङको बारका आजिङगर बेबालको आगाता जाअ्हि, कालाउकि जेसाङ वाको जामाल जोलोमनासाङ उङकोहेङ चाअ्लि द्वाको। 5जेलाउ उङको बेबाल एमि जामालहेङ जोलोम पिहि, कालाउ वासेहेङ बारका आजिङगर माचाहि, हाइपालिपानु ओदोङ घुरि वासेहेङ घिङहि कालाउ परमेस्वर कालाउ वाको सिङहासनता चुमाहि। उङको वाजान गोताङ सुमिङको द्‍याङगेलाइ ह्रुता चिरको डान्ठाहोइ सासन पावा। 6उङको बेबाल चाहि एनोङ चाका-मान्दा थामेता खाअ्हि। परमेस्वर वाको भाअ्सिङ इसिका थामे तियार पाहि कालाउकि ए-हाजार न्हे साइ सुम कुरि दिना थेकापा वासेहेङ सामाराइयातेङ ताअ्लि द्वाको।

बारका आजिङगरहेङ स्वर्गसो थाइगिल्हि

7याको न्हुसो स्वर्गता धुम जेङहि। मिखाएल स्वर्गदुत बाकि झाराङ स्वर्गदुतको प्राधान हिघाहि। मिखाएल बाकि स्वर्गदुतगेलाइहेङ जाइ वाको खाबाराता हिघाहि कालाउ ओबालाइहेङ चुमातेङ बारका आजिङगरगेलाइहेङ झाअ्मिरिहि। कालाउ बारका आजिङगर आरु वाको दुत जाइ वाको दोफा हिखे, इम्बालाइ आरोङ मिखाएलको बिरोधता धुम पाहि। 8-9कालाउ इङको बारका आजिङगर धुमता हारेहि। कालाउ इङको बारका आजिङगर कालाउ वाको दोफाको दुत स्वर्गता हिलि मानिङहि। इम्बालाइहेङ प्रिथिबिता थाइगिल्पिहि, इङको बारका आजिङगर इङको ओदोङ हि जाइ हेन्जा सोमोइ लाम्फा पुह्याँको रुपता देखाल जेङहि। वाको मिङ साइतान, जाइ द्‍याङगेलाइहेङ दुसिखे। वा दोङ जाइ इदोइ सुमिङता द्‍याङगेलाइहेङ जेलाउ बुङ धोका पितेङ लोखे।

10कालाउ का स्वर्गता एनोङ बारका गालासो एसा दोअ्तेङ हिका हिङघा,

“एला केलाइको परमेस्वर ताइको द्‍याङगेलाइहेङ बान्चि पावा!

एला वा ताइको सरबुङको प्रयोग पाङ कालाउ राजाको रुपता सासन पाङ!

एला वाको ख्रिस्ट सुमिङता ताइको खाबारा दाबि पाङ!

हाइपालिपानु साइतान एलासो चुम्तेङ परमेस्वरको आगाता जाअ्तेङ, केलाइ दोफा काम पाका दादा-ओनेगेलाइहेङ न्हिसिन नितिम मादुसियाङ,

हाइपालिपानु साइतानहेङ स्वर्गसो बाहार थाइगिल्पिहि।

11केलाइको खान्धुराइ ओनेगेलाइ साइतानहेङ जितिका हि।

इम्बालाइ थुमाको हितिको सरबुङहोइ साइतानहेङ हारिपाहि।

इङको थुमा ओबालाइको पापसो लाअ्पालिको भाअ्सिङ सेअ्का हिघाहि।

इम्बालाइ साइतानहेङ हारिपावा हाइपालिपानु ओबालाइ जेलाउ बुङ इदोइ सुइकार पातेङ हि कि थुमा ओलालाइको प्रभु हि।

इम्बालाइहेङ साताइन्हातेङ सेन्हाहि, कालाउ बुङ ओबालाइ ताइको सुइकारसो पासा मासाराइहि।

12ओदोङ भाअ्सिङ इता स्वर्गता हिका नेलाइ झाराङ आनान्द जेङसु!

कालाउ नेलाइ झाराङ जाइ प्रिथिबि कालाउ समुन्द्रता हिका, नाअ् या हेथे थिलि गोइका हि।

हाइपालिपानु साइतान नाङकोता लेता लोका हि।

वा हेन्जा चेर ताम्पाका हि हाइपालिपानु वा गिखे कि वाको दोफा काम पालि हेन्जा सोमोइ मान्थु।”

13जेलाउ इङको बारका आजिङगर ताइमिहेङ प्रिथिबि ह्रुता थाइगिल्का थाहा गिहि, कालाउ वा उङको बेबालहेङ पिताइहि जाइ उङको चानको जोलोम पिहि। 14कालाउ परमेस्वर उङको बेबालहेङ बारका बाजाको न्हेनोङ पाखेना पिहि, कालाउकि वा उराइतेङ चाका-मान्दा थामेता हानिलि द्वाको दोअ्तेङ परमेस्वर वाको भाअ्सिङ तियार पाका हिघाहि। कालाउ इन्ता सुम-बासार आधा बासार थेकापा वासेहेङ सामाराइयातेङ ताअ्लि द्वाको, कालाउकि बारका आजिङगर वाको भेरपा थुकालि माद्वाको। 15कालाउ न्हुसो, बारका आजिङगर ताइको नुइसो झोराको भाइपा चि बेबाल भारि ओल्लेपाहि कालाउकि इङको चिको बानेहोइ उङको बेबालहेङ झोपातेङ चुम्पुवाको। 16कालाउ प्रिथिबि उङको बेबालहेङ साघाइहि, कालाउ बारका आजिङगर ताइको नुइसो चि ओल्लेपाहि वासेहेङ प्रिथिबि निपिहि। 17याको कारान इङको बारका आजिङगर बेबाल दोफा हेन्जा चेर ताम्पाहि। ओदोङ भाअ्सिङ, वा उङको बेबालको सान्तानको बिरोधता धुम पालि घोसाना पाहि। इङको या द्‍याङ हि जाइ परमेस्वरको आग्या केम्खे। कालाउ जेलाउ बुङ थुमा दोङ प्रभु हि दोअ्तेङ इङको इस्थिर हिखे। 18कालाउ, इङको बारका आजिङगर समुन्द्रको काम्भेता हानितेङ इन्ता जाअ्हि।

Currently Selected:

प्रकास 12: DHINT

Highlight

Copy

Compare