याकुब 3

देतोङहेङ तहता ताअ्लि

1ओइ खान्धुराइ ओनेगेलाइ, नेलाइकोसो हेन्जा झना परमेस्वरको बचनको सिक्स्यक माजेङसु, हाइपालिपानु नेलाइ गिसुखेना, केलाइ सिक्स्या पिकालाइको न्याय आरुगेलाइको खाङतेङ झन थाङका रुपहोइ जेनावा। 2केलाइ झाराङ हेन्जा काम बिगिर पानाखे, कालाउ जेदोङ द्‍याङ ताइमिङ दोअ्का काथाता गल्ति मापाखे, वा ताइमिङहेङ पुर्न रुपहोइ काबुता ताअ्लि दोखे कालाउ उङको द्‍याङ सिद्द जेङखे।

3जेसापा ओह्याँगेलाहेङ ताइको कब्जाता ताअ्लि इम्बालाइको नुइता लागाम लागाइस्वाना पानु, इम्बालाइको गोताङ जिउहेङ जेता मन जेङखे ओसोङ चुम्पुलि दोस्वाना। 4खाङसु जाहाजगेलाइ जेदोङ बार्का भेरमासो चोलिखे, इङको बा-बारका हिलाउ बुङ एनोङ म्हुइका पतवारहोइ चालाइका द्‍याङ ताइको इच्छा आन्सारसो जेता मन जेङखे ओताङ चुम्पुखे। 5इन्सिकाङ देतोङ बुङ एनोङ म्हुइका आङग जेङतेङ बा-बारका काथाको घमन्ड पाखे। खाङसु, एनोङ म्हुइका मेको झिल्काहोइ बारका झारहेङ बुङ मे लागाइखे। 6देतोङ बुङ एनोङ मेदोङ भाइका हि, या जिउको आङगगेलाइ मध्ये हि जेदोङ हेन्जा दुस्ट हि। या दोङ केलाइको गोताङ जिउहेङ नासा पाखे कालाउ गोताङ जिबनहेङ दोङ मे जोलाइ पिखे कालाउ नरकको मेता उङको ओतावा!

7हिदोइ बुङ खाल्को गुपुस, जिहाँ-जुइलेङ, पोम्भेलेतेङ तेअ्का जन्तु कालाउ समुन्द्रको जिब जन्तुगेलाइहेङ तह लागाइलि दोखे, कालाउ द्‍याङको जातिसो दोङ इम्बालाइहेङ तह लागाइका हि। 8कालाउ देतोङहेङ हिदोइ बुङ द्‍याङ तह लागाइलि मादोखे। या पुह्याँको बिस भाइकाङ हेन्जा हान्ति पाका कालाउ चिका न्हाका दुस्ट हिखे।

9देतोङ पाहासो केलाइ प्रभु कालाउ आबाको बाखिन पान्हाखे, कालाउ इदोइसोङ परमेस्वरको स्वरुपता बानाइका द्‍याङगेलाइको बिरोधता केलाइ मारेम्का धुइनाखे। 10एनोङ दोङ नुइसो बाखिन कालाउ मारेम्का काथा ओल्हिखे। काङको खान्धुराइ ओनेगेलाइ, एसा माजेङलि गोइका हि। 11जातिङकोङ दोङ एनोङ चिको मुलसो न्हेनोङ दोङ ताअ्का चि कालाउ खाका चि ओल्लेलि मादोखे। 12काङको खान्धुराइ ओनेगेलाइ, हाइ लाब्राको सिङता जैतुन माकुनु आङगुरको सिङता लाब्रा सेलि द्वावा रो? इन्सिकाङ ताइका चिको मुलसो ताअ्का चि ओल्लेलि मादावा।

न्हे खाल्को बुद्दि

13नेलाइ मध्येसो बुद्दिमान कालाउ ग्यानि द्‍याङ हासु हि? जेसापा नेलाइ बुद्दिमानि कालाउ ग्यानि हिसुना पानु मोनोइ दोफा रेम्का कामगेलाइ पातेङ तिङपासु। 14कालाउ जेसापा नेलाइको हृदयता हेन्जा आरिस कालाउ स्वार्थ हि पानु घमन्ड मापासु, कालाउ सत्येको बिरोधता माधाताइसु। 15या बुद्दि परमेस्वरसो लोका बुद्दि माको, कालाउ याते सुमिङ, द्‍याङको बिचारसो कालाउ साइतानसो दोङ लोका हि। 16हाइपालिपानु जेता आरिस कालाउ स्वार्थ हिखे, इन्ता चेरसुका-फेसुका कालाउ गोताङ खाल्को भ्रस्ट काम जेङका हिखे।

17कालाउ जेदोङ बुद्दि परमेस्वरसो लोखे इङको लाम्फाङ सुद्द हिखे, कालाउ इङको सान्तिप्रिय, मोनोइ, मिलिका, दायाहोइ कालाउ रेम्का कामहोइ भरिका, पक्स्य पात मान्थुका कालाउ छल माकोसिङ हिखे। 18कालाउ सान्ति ताअ्का झाराङ सान्तिको चालाइ बिखे कालाउ इम्बालाइ धार्मिकताको सिसा जोम्पाखे।

Currently Selected:

याकुब 3: DHINT

Highlight

Copy

Compare