याकुब 2

भेदभाबको बिरोधता चेताउनि

1काङको खान्धुराइ ओनेगेलाइ, नेलाइ केलाइको महिमामय प्रभु येसु ख्रिस्टको खान्धुराइ हिकानाङ नेलाइ हासुको बुङ भेदभाव मापासु। 2उधारनको भाअ्सिङ जेसापा हिदोइ बुङ द्‍याङ सोनाको आउखुतिगेलाइ कालाउ रेम-रेम्का लोखोन होङतेङ नेलाइको मन्डलिको सभाता लोहि, कालाउ हिदोइ बुङ एमि गरिब बुङ आखेका-उखेका लोखोन होङतेङ लोहे पानु, 3नेलाइ इङको रेम्का लोखोन धाबा होङतेङ लोकाहेङ आदार मान पातेङ “इता रेम्का थामेता योम्सु” दोअ्ताना कालाउ आरोङ उङको गरिबहेङ चाहि नाअ् इन्ताङ जाअ्तेङ हि, माकुनु काङको खोकोइ भेरपा लेता योम्सु दोअ्स्वाना पानु, 4नेलाइ आधिमिहेङ रेम्का ब्यभार पासुखेना कालाउ आधिमिहेङ भेदभाव पासुखेना पानु, नेलाइहेङ दुसियाङ।

5काङको आनाउ खान्धुराइ ओनेगेलाइ, हिङसु, हाइ परमेस्वर सुमिङको नजरता गरिबगेलाइहेङ खाङधुरिता धनि बानाइतेङ इङको राइजिको उत्तराधिकारि जेङलिको भाअ्सिङ मासाल्हि रो? इदोइ दोङ राइजिको उत्तराधिकारि बानाइलि वासेहेङ प्रेम पाकालाइहेङ वा प्रतिग्या पाका माको रो? 6कालाउ नेलाइते गरिब द्‍याङगेलाइको आपमान पाका हिसुना, हाइ धनिगेलाइ नेलाइहेङ आत्याचार मापाखे रो? हाइ इम्बालाइ नेलाइहेङ आदालातता माचुम्पावा रो? 7हाइ इम्बालाइ इङकोङ आदारनिय येसुको मिङको निन्दा मापाखे रो? जेदोङ मिङसो नेलाइहेङ काइका हि?

8जेसापा नेलाइ “ताइको देरागेलाइहेङ ताइमिङ भाइपा प्रेम पासु” दोअ्का पबित्तरो धर्मसास्तरको राजकिय व्यवस्थाहेङ जातिङको पुरा पालि दोनुते थिकोङ पासुखेना। 9कालाउ जेसापा नेलाइ द्‍याङगेलाइहेङ भेदभाव तिङपास्वाना पानुते नेलाइ पाप पासुखेना, कालाउ व्यवस्थाहेङ माकेम्सुखेना। 10हाइपालिपानु जाइ गोताङ व्यवस्था मानिखे कालाउ एनोङ व्यवस्थाहेङ मामानिहि पानु, व्यवस्थाको गोताङ काथा वा किका मान्थुखे। 11हाइपालिपानु जाइ कासिबिरि मापासु दोअ्का हि, वा मारा बुङ मापासु दोअ्का हि। जेसापा नाअ् कासिबिरि मापाना, कालाउ मारा पासुन्हा पानु नाअ् व्यवस्था माकेम्खेना। 12ओदोङ भाअ्सिङ नेलाइको बचन कालाउ ब्यभाहार स्वतन्तरताको व्यवस्था बोमोजिम परमेस्वर पाहासो न्याय निङकालाइको भाइपा ज्याको। 13हाइपालिपानु जेदोङ द्‍याङगेलाइ आरुको क्रिपा पाका मान्थु वासेहेङ बुङ क्रिपा मापाङ। कालाउ वा क्रिपा पाखे पानु, परमेस्वर ताइको क्रिपा पाहासो वाको न्याय पाङ।

खाङधुरि कालाउ काम

14काङको खान्धुराइ ओनेगेलाइ, जेसापा इदोइ बुङ द्‍याङ का येसु ख्रिस्टता खाङधुरि पाङका दोअ्खे, कालाउ आसल काम चाहि मापाखे पानु, उङकोसो हाइ फाइदा? हाइ वाको खाङधुरिहोइ उङकोहेङ बान्चिपालि द्वावा रो? 15जेसापा हासु बुङ खान्धुराइ वाजान ओने याते बेजान ओने दोफा थेम्का झोको लोखोन धाबा मान्थु, कालाउ वासेहेङ दिनाङको चालि-आम्लि माथेम्खे, 16कालाउ नेलाइ मध्ये हासु बुङ, वासेहेङ “परमेस्वर नासेहेङ आसिस प्याको, कालाउ हामु भेल्पा चाअ्” खिनिङ दोअ्खे, कालाउ वाको जिउता गोइका आमेनेगेलाइ चाहि नेलाइ मापिसुन्हा पानु, इङकोसो हाइ फाइदा जेनावा रो? 17एसापा दोङ नेलाइ येसु ख्रिस्टता खाङधुरि पासुखेना कालाउ कामता देखाल मापा सुखेना पानु, इङको खाङधुरि व्‍यर्थ दोङ हि।

18कालाउ हासु बुङ दोअ्तावा, “नाअ् येसु ख्रिस्टता खाङधुरि पासु, कालाउ का चाहि आसल कामगेलाइ पाङका।” कालाउ का दोअ्खा आसल काम माकोसिङको नाङको खाङधुरि कासेहेङ तिङपा, कालाउ काङको पाका आसल कामसो का ताइको खाङधुरि नासेहेङ तिङपाङका। 19नेलाइ खाङधुरि पासुखेना कि परमेस्वर एनोङ दोङ हि, इङको रेम्का हि भुत-आत्मागेलाइ बुङ खाङधुरि पाखे कालाउ थितेङ लुकु-लुकुपा फिरखे।

20ओइ नाअ् मुर्ख द्‍याङगेलाइ, हाइ नेलाइ आसल काम माकोसिङको खाङधुरि बेक्कार जेङखे दोअ्का काथाको प्रमान भोसुखेना? 21आबस्य दोङ केलाइको पुर्खा आब्राहाम दोङ ताइको चान इसाहाकहेङ बेदिता आर्पन पाका काम पाहासो परमेस्वरसो धर्मि जेङका हिघाहि। 22नाअ् तिङखेना, कि वाको कामगेलाइ दोफा-दोफाङ खाङधुरि बुङ क्रियासिल हिघाहि, कालाउ वाको कामसो बुङ वाको खाङधुरि सिद्द जेङका हिघाहि। 23कालाउ पबित्तरो धर्मसास्तरता इसिका दोअ्का बचन पुरा जेङहि, “आब्राहामको खाङधुरिको कारन परमेस्वर वासेहेङ एमि धर्मि द्‍याङको रुपता ग्रहन पाहि” कालाउ वा दोङ परमेस्वरको सानाइति गान्दिन्हाहि। 24नेलाइ तिङसुखेना कि, वाको कामसो एमि धर्मि द्‍याङको रुपता सुइकार जेङहि, खाङधुरिसो खिनिङ माको।

25ओसाङ पातेङ राहाब कासिबिरि बुङ, जेलाउ वा जासुस पाकालाइहेङ ताइको साअ्ता सात्कार पाहि कालाउ भेनेङ दामा भारि दिङगिल्पिहि, कालाउ वा ताइको कामगेलाइ पाहासो परमेस्वरसो एमि धर्मि द्‍याङको रुपता सुइकार जेङका हिघाहि। 26जेसाङ जिउ आत्मासो खेङन्हाखे वा सिका हिखे, ओसाङ खाङधुरि बुङ आसल काम बिना सिका भाइका हिखे।

Currently Selected:

याकुब 2: DHINT

Highlight

Copy

Compare