एफिसि 5

प्रेमता जिबन जियाइलि

1नेलाइ परमेस्वरको आनाउ सान्तानगेलाइ दोङ हिसुना, ओदोङ भाअ्सिङ नेलाइको स्वभाव परमेस्वरको भाइपाङ ह्याको। 2बोगेलाइको भाअ्सिङ प्रेममय जिबन बितिपासु, जेसाङ ख्रिस्ट बुङ केलाइहेङ प्रेम पाहि, कालाउ वा केलाइको पापको भाअ्सिङ ताइमिहेङ भोगको रुपता चढाइका हि। कालाउ परमेस्वर खुसि जेङहि, हाइपालिपानु बलिदान वाको भाअ्सिङ ताअ्का मालामालाका बासाना भाइका हिघाहि।

3कालाउ नेलाइ परमेस्वरको द्‍याङगेलाइ जेङनाङ नेलाइ कासिबिरि, चिचाहा, कालाउ गोताङ खाल्को मारेम्का कामगेलाइ मापासु। 4कालाउ नेलाइको माझाता हिदोइ बुङ आस्लिल काथागेलाइ, मुर्ख काथागेलाइ कालाउ लेदेर लुका काथाको मज्जाबुङ मापासु, हाइपालिपानु इसिका काथा नेलाइहेङ मासोबाइखे, भरु नेलाइ परमेस्वरहेङ धन्यबाद पिलि गोइखे। 5हाइपालिपानु नेलाइहेङ थाहा दोङ हि, कि हिदोइ बुङ कासिबिरि पाका, आसुद्द द्‍याङ, माकुनु चिचा द्‍याङ ख्रिस्ट कालाउ परमेस्वरको सासनको भागिदार माजेङखे। हाइपालिपानु चिचा पालि चाहि मुर्ति पुजिका भाइका हि, जाइ सुमिङको आनेमानेको आराधाना पाखे।

6हासु बुङ नेलाइहेङ इन्सिका पाप पालाउ परमेस्वर दन्ड माप्याङ दोअ्तेङ धोका माप्याको। हाइपालिपानु इन्सिका पापको कारनहोइ दोङ आत्तेरिगेलाइ ह्रुता परमेस्वरको क्रोड परिखे। 7ओदोङ भाअ्सिङ इन्सिका आखेका काम पाका द्‍याङगेलाइ दोफा माझ्वाइनासु, 8हाइपालिपानु नेलाइ कितिकितिका हिका द्‍याङगेलाइ कोनिङ हिघासुखेना, कालाउ एला नेलाइ फाइसालामकाको द्‍याङगेलाइ हिसुन्हा, हाइपालिपानु नेलाइ प्रभुको हिसुन्हा। ओदोङ भाअ्सिङ फाइसालामकाको द्‍याङगेलाइ कोनिङ जियाइसु। 9हाइपालिपानु फाइसालामकाता जियाइका द्‍याङगेलाइ आसल, धर्मि कालाउ भोरोसा योग्य हिखे। 10प्रभु हिदोइ काथाता खुसि ज्याङ इङको काथा धिरलि कोसिस पासु। 11कितिकितिकाता द्‍याङगेलाइ पाका आखेका काम मापासु। कालाउ एल्का कामगेलाइ पातेङ कितिकितिकाको कामगेलाइ एल्का माको दोअ्तेङ द्‍याङगेलाइहेङ तिङपासु। 12हाइपालिपानु खाङधुरि मापाका द्‍याङगेलाइ ए-कुन्हाता पाका कामगेलाइको बिसोइता दोअ्लि बुङ लेदेरका काथा दोङ हि। 13जेलाउ फाइसालामका हिदोइ बुङ आमेनेता चिल्काखे, झाराङ इङको इसिका दोअ्तेङ खाङलि द्वावा, हाइपालिपानु जेलाउ फाइसालामकाहोइ हाइ दोङ तिङपावा, इङको आमेने ताइमिङ फाइसालामयावा#5:13 जेलाउ मारेम्का द्याङगेलाइ नेलाइको रेम्का बेउरा तिनावा, इम्बालाइको मारेम्का बेउरा तिनावा, कालाउ इम्बालाइ मारेम्का पालि लाअ्तावा, कालाउ नेलाइ कोनिङ रेम्का जेनावा। 14ओदोङ भाअ्सिङ इसिका भनाइ हि:

“ओइ निन्धाकागेलाइ,

जागिसु कालाउ सिकासो ल्होसु,

कालाउ ख्रिस्ट नेलाइहेङ फाइसालामका प्यावा।”

15ओदोङ भाअ्सिङ नेलाइ हेसा जियाइस्वाना इङको बारेता हेन्जाङ ख्याल पासु। मुर्खगेलाइ भाइपा माको भरु बुद्दिमानि भाइपा जिबन जियाइसु। 16बुद्दिमानि दोफा गोताङ आबसरगेलाइ आसल कामको भाअ्सिङ प्रयोग पासु, हाइपालिपानु दिनागेलाइ आखेका हि। 17ओदोङ भाअ्सिङ मुर्ख माजेङसु, भरु बुद्दिमानि जेङसु कालाउ प्रभु नेलाइसो हाइ भोअ्खे इङको बुझिलि कोसिस पासु। 18गोरा-चि आम्तेङ माम्हासु, हाइपालिपानु इङकोहोइ द्‍याङगेलाइहेङ आसब्भय आनियन्तिरित तरिकाहोइ ब्याभार पाका बानाइखे, भरु पबित्तरो आत्माहोइ पोङघातेङ हिसु। 19कालाउ एमिसो भेनेङ दोफा मिलितेङ भजन कालाउ आत्मिक लेगेलाइ लेसु, कालाउ ताइको ह्रदयको ले को पदोगेलाइहोइ बाखानाइ पासु। 20केलाइको परमप्रभु येसु ख्रिस्ट पाका गोताङ कामको भाअ्सिङ जेलाउलाउ बुङ केलाइको आबा परमेस्वरहेङ धन्यबाद पिसु।

के कालाउ बे गेलाइहेङ आर्ति

21केलाइको ख्रिस्ट दोफाको भक्तिको कारनसो एमिसो भेनेङको आधिनता हिसु। 22ओइ बे गेलाइ, प्रभुको आधिनता हिका भाइपाङ नेलाइ ता-ताइको के को आधिनता हिसु। 23हाइपालिपानु के बे को पुरिङ हि, जेसाङ ख्रिस्ट मन्डलिको पुरिङ हिका हि, ख्रिस्ट मन्डलिको मुक्ति दाता हि, जेदोङ वाको ताइकोङ जिउ हि। 24जेसाङ मन्डलि ख्रिस्टको आधिनता हि, एन्साङ पातेङ बे गेलाइ बुङ गोताङ काथाता के गेलाइको आधिनता हिलि गोइखे।

25ओइ के गेलाइ, ताइको बे हेङ प्रेम पासु, जेसाङ ख्रिस्ट मन्डलिहेङ प्रेम पाखे। कालाउ ख्रिस्ट मन्डलिको भाअ्सिङ ताइको जिबन पिहि। 26कालाउकि वा मन्डलिहेङ बचन पाहासो कालाउ चिहोइ पातेङ सुद्द बानाइलि द्वाको। 27ख्रिस्ट ताइको मन्डलिको भाअ्सिङ सिहि, कालाउकि वा ताइको गोताङ द्‍याङगेलाइहेङ सिद्द बानाइयाको कालाउ इम्बालाइहेङ ताइमिको लोकाता चुमालि द्वाको। जेदोङता हिदोइ बुङ गल्ति माकुनु पाप माकुनु आरु मारेम्का कामगेलाइ माजेनाङ भरु इम्बालाइ पबित्तरो कालाउ सिद्द जेनावा।

28एन्साङ पातेङ दोङ के गेलाइ बुङ ता-ताइको बे गेलाइहेङ ताइकोङ जिउ भाइपाङ प्रेम पालि गोइखे। कालाउ जाइ ताइको बे हेङ प्रेम पाखे वा ताइमिहेङ प्रेम पाखे। 29हाइपालिपानु हासुलाउ बुङ ताइको जिउहेङ हिदिकाल बुङ मासिखाखे, भरु ताइको जिउहेङ प्रेम पातेङ पोसिखे, ख्रिस्ट बुङ मन्डलि दोफा एन्साङ पाखे। 30हाइपालिपानु केलाइ ख्रिस्टकोङ जिउको आङगगेलाइ कोनिङ हिनाहि। 31जेसाङ धर्मसास्तर लेखेका हि, “ओदोङ भाअ्सिङ द्‍याङगेलाइ ताइको आमाइ आबाहेङ लाअ्खे कालाउ ताइको बे दोफा मिलिखे कालाउ इङको न्हेमि एनोङ जिउ जेङखे।” 32या एनोङ बार्का रहस्य धर्मसास्तरता देखाल जेङका हि, जाइ का ख्रिस्ट कालाउ मन्डलिको सम्बन्धता लागु पातेङ बुझियाङका। 33कालाउ या काथा नेलाइता बुङ लागु जेङखे, नेलाइ झाराङ ताइको बे हेङ ताइमिहेङ भाइपाङ प्रेम पालि गोइखे, कालाउ बे बुङ ताइको के हेङ आदार पालि गोइखे।

Currently Selected:

एफिसि 5: DHINT

Highlight

Copy

Compare