साल्न्हाका चात्या 22
22
1“काङको खान्धुराइ ओनेगेलाइ कालाउ आबागेलाइ, का ताइको पक्स्यता दोअ्लि गोइका काथा एला हिङसु।”
2पावल हिब्रु भासाता नुइ धुइका हिङतेङ झाराङ द्याङगेलाइ सिका हि। कालाउ पावल दोअ्हि:
3“का किलिकिया सहरको टार्सस सहरता जोलोमका एमि यहुदि हिघा, कालाउ का इदोङ यरुसेलेम सहरता गमलिएलको आधिनता बाराघा। कालाउ केलाइको पुर्खाको व्यवस्थाको सिक्स्या का रेम्फा निङका हिघा। का परमेस्वरता मेनाङ हाउसाइका हिघाखा जेसाङ नेलाइ एला हिसुना।” 4प्रभुको दामा पिताइका द्याङगेलाइहेङ का सिलि तोम्पाङ साताइघा। कालाउ का वाबाल कालाउ बेबालाइहेङ रिम्घा कालाउ झ्यालखानाता ह्वाघा। 5प्राधान पुजारि कालाउ गोताङ माहासभाको यहुदि आगुवागेलाइ बुङ काङको पक्स्यता साक्सि पिखे। ओबालाइ दोङ कासेहेङ दमस्कस देराता हिका यहुदि खान्धुराइ ओनेगेलाइको मिङता चिट्ठि पिहि, कालाउ इङको चिट्ठिता कासेहेङ खान्धुराइगेलाइहेङ रिम्तेङ यरुसेलेम सहरता चुमातेङ दन्ड पिलि खाबारा मिलिका हिघाहि। ओदोङ भाअ्सिङ का दमस्कस सहर हानिघा।
6जेलाउ का दमस्कस सहरको भेरपा लोघा इङको बेला माकुलाउ बुङ आधा दिना जेङका हिघाहि, कालाउ एन्सालाउ आचानक आकाससो एनोङ फाइसालामका काङको कोरपाहाङ चिल्का हि। 7कालाउ का भोनोइता थुन्हाघा, कालाउ कासेहेङ एसा हाइ दोङ दोअ्का एनोङ गाला हिङघा, “ओइ साउल, ओइ साउल, नाअ् हाइ पालि कासेहेङ साताइतेङ हिना?” 8कालाउ का हिअ्घा, “हे प्रभु नाअ् हासु हिना?” कालाउ वा कासेहेङ दोअ्हि, “का नासरत देराको येसु हिघा, जाइहेङ नाअ् साताइतेङ हिना।” 9कालाउ का दोफा हिका द्याङगेलाइ फाइसालामकाते तिङहि, कालाउ का दोफा धुइका को गाला चाहि माहिङहि।
10का दोअ्घा, “हे प्रभु, एला का हाइ पालि गोयाङ?” प्रभु कासेहेङ जोबाफ पिहि, “ल्हो कालाउ दमस्कस सहरता हाने। कालाउ नाअ् पालि गोइका तोकिका कामगेलाइ का नासेहेङ इन्ता दोअ्ताङका।” 11इङको फाइसालामकाको थाअ्साइकाहोइ का हाइ दोङ तिङलि मादोअ्घा, कालाउ का दोफा हिका द्याङगेलाइ कासेहेङ थोङतेङ दमस्कस सहरता चुमाहि।
12दमिसकस सहरता, एमि हननिया मिङ हिका द्याङ हिघाहि, वा मोसाको व्यवस्था पालन पालि भक्त हिघाहि। इन्ता हिका यहुदिगेलाइ वासेहेङ साम्मान पाघाखे। 13हननिया काङकोता लोहि, कालाउ काङको भेरपा जाअ्तेङ दोअ्हि, “ओने साउल, नाअ् आरोङ तिङलि दोअ्!” वा इन्सिका दोअ्नासिङ का तिङका जेङघा कालाउ का वासेहेङ तिङघा।
14कालाउ हननिया कासेहेङ दोअ्हि, “केलाइको पुर्खागेलाइको परमेस्वर वाको इच्छा गिलि कालाउ उङको धर्मि द्याङ, ख्रिस्टहेङ तिङलि कालाउ वाको गाला हिङलि नासेहेङ नियुक्त पाका हि।” 15हाइपालिपानु झाराङ द्याङगेलाइको आगाता वाको भाअ्सिङ नाअ् जेदोङ तिङका कालाउ हिङका हिना, नाअ् इङको गोताङ काथागेलाइको साक्सि जेनाना। 16कालाउ एला नाअ् हेन्जा माह्रुम, ल्हो कालाउ वाको मिङता बप्तिस्ता ह्रु, कालाउ वाको मिङ ह्रुतेङ नाङको पापगेलाइ स्यामा जेनावा।
17जेलाउ का यरुसेलेम सहर घुरितेङ लोघा, कालाउ का मुन्दिरता प्रार्थाना पाकाताङ पालाउ एनोङ दर्सन निङघा। 18प्रभु कासेहेङ एसा दोअ्काताङ पाका का हिङघा, “धेमाङ यरुसेलेम सहर लाअ् हाइपालिपानु इताको द्याङगेलाइ काङको बिसोइता नाअ् पिका साक्सि सुइकार मापाङ।”
19का दोअ्घा, “हे प्रभु, का गोताङ यहुदिगेलाइको चाउघारा साअ्गेलाइता हानितेङ नाअ् ह्रुता खाङधुरि पाकालाइहेङ रिम्तेङ दानाइकाताङ कालाउ झ्यालखानाता ह्वाका काथा झाराङहेङ थाहा दोङ हि, ओदोङ भाअ्सिङ का बुझिलि माद्वाङका कि यरुसेलेम सहरको यहुदिगेलाइ कासेहेङ हाइ पालि सुइकार मापाखे। 20द्याङगेलाइ या बुङ गिखे कि, नाङको साक्सि स्तिफनहेङ सेअ्लाउ का बुङ इन्ताङ हिघाखा। वासेहेङ सेअ्कालाइ दोफा सहमत जेङतेङ इम्बालाइको लोखोन धाबागेलाइ सामाराइतेङ हिघाखा।” 21कालाउ प्रभु कासेहेङ दोअ्हि, “हाने, हाइपालिपानु नासेहेङ दुरे-दुरे थेकापा गैर-यहुदिगेलाइकोता दिङगिल्लाङका।”
22इङको दोअ्तेङ हिका थेकापा द्याङगेलाइ पावलको काथा हिङतेङ हिघाहि। कालाउ न्हुसो गोताङ द्याङ ह्रिकाइकाताङ दोअ्लि तेङहि, “यासेहेङ सेअ्सु! हाइपालिपानु उङको बान्चिलि योग्य मान्थु।”
23इम्बालाइ ह्रिकाइकाताङ ताइको बाहारको लोखोन धाबागेलाइ थेअ्काताङ कालाउ धुला आकास भारि उराइपाकाताङ थाइगिल्हि। 24कालाउ रोमि सेनापति हुकुम पाहि, “पावलहेङ ब्यारेक लिता चुमासु कालाउ द्वालिहोइ म्हेतेङ हिअ्सु कि हाइ पालि वाको बिरोधता द्याङगेलाइ एसापा ह्रिकाइकाताङ हि।” 25जेलाउ सिपाइगेलाइ पावलहेङ द्वालिहोइ म्हेताइने दोअ्तेङ वाको खुर जिङहि, कालाउ पावल भेरपाङ जाअ्तेङ हिका रोमि कप्तानहेङ हिअ्हि, “हाइ एमि रोमि नागरिकहेङ दुसिका माथोहोराइसिङ दोङ द्वालिहोइ म्हेलि उचित रो?”
26जेलाउ रोमि कप्तान इन्सिका हिङहि वा सेनापतिकोता हानितेङ एसा दोअ्हि, “नाअ् हाइ पालि हानिदोङखेना? इदोइ द्याङते रोमि नागरिक हि।”
27कालाउ रोमि सेनापति लोतेङ पावलहेङ हिअ्हि, “कासेहेङ दोअ्, हाइ नाअ् रोमि नागरिक हिना?” पावल जोबाफ पिहि, “एइ, का रोमि नागरिक हिघा।”
28कालाउ सेनापति दोअ्हि, “का ते हेन्जा ताका खर्च पातेङ रोमि नागारिङ जेङघा।” पावल दोअ्हि, “कालाउ का ते जोलोम सोङ रोमि नागरिक हिघा।”
29कालाउ पावलहेङ हिअ्लि लोका गोताङ द्याङगेलाइ वाकोसो एन्सालाउ दोङ दुरे हानिहि। कालाउ पावल एनोङ रोमि नागरिक हिघाहि दोअ्तेङ थाहा निङतेङ सेनापति बुङ थिहि, हाइपालिपानु वा पावलहेङ जिङलि लागाइका हिघाहि।
पावल माहासभाको आगाता
30न्हु दिना रोमि सेनापति पावलहेङ हाइ पालि यहुदिगेलाइ दुसिका हिघाहि दोअ्तेङ इङको बुझिलि इच्साहोइ वासेहेङ खाइपिहि, कालाउ गोताङ मुलि पुजारिगेलाइ कालाउ माहासभाहेङ जोम्लि आग्या पिहि, कालाउ पावलहेङ चुमातेङ झाराङको आगाता जाअ्पाहि।
Currently Selected:
साल्न्हाका चात्या 22: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
