3 युहान्ना 1
1
1का युहान्ना मन्डलिको आगुवा या पात्तारा नासेहेङ लेखेदोङखा, काङको आनाउ सानाइति गायस, का नासेहेङ जातिङको प्रेम पाखा। 2आनाउ सानाइति, का प्रार्थाना पाखा, कि नाङको पाका गोताङ कामता नाङको भालाइ ज्याको, कालाउ नाङको स्वास्थय ठिक ह्याको। एन्साङ पातेङ जेसाङ नाअ् परमेस्वर दोफा आत्मिक जिबनता बारातेङ हिना। 3हाइपालिपानु आधिमि खान्धुराइ ओनेगेलाइ नाअ् हेसापा खाङधुरि योग्य जेङतेङ सत्येता जियाइतेङ हिसुना दोअ्तेङ साक्सि पिलाउ का मेनाङ आनन्दित जेङघा। नाअ् जातिङकोङ सत्येको आनुसरन पाखेना। 4जेलाउ बुङ का हिङघा कि नेलाइ जाइ काङको चान-चामिन्दिगेलाइ भाइका हिसुना, परमेस्वर केलाइहेङ जातिङकोङ तिङपाका दामाता ताइको जिबन जियाइतेङ हिनाहि, इङको काथाहोइ कासेहेङ आरु हेन्जा आनन्दित पाखे।
प्रभुको सेवा पाकालाइहेङ साघाइसु
5ओइ आनाउ, केलाइको खान्धुराइ ओनेहेङ साघाइलि नाअ् हेन्जा काम पाका हिना, कालाउ एन्साङ पातेङ नाअ् मानाल्कागेलाइहेङ बुङ खाङधुरि दोफाङ साघाइ। 6उङको मध्ये आधिमि द्याङगेलाइ इताको मन्डलिको खान्धुराइगेलाइहेङ दोअ्का हि, कि हेसापा नाअ् ताइको खान्धुराइ ओनेगेलाइहेङ हेन्जा प्रेम पाखेना। एला का नासेहेङ दोअ्खा कि, जेलाउ इम्बालाइ नासेहेङ लाअ्तेङ बो थामेता हानावा, नाअ् लागातार उङको द्याङगेलाइहेङ साघाइलि गोयाना। हाइपालिपानु इङको परमेस्वर मन्दा ताखे। 7हाइपालिपानु परमेस्वरहेङ खाङधुरि मापाकालाइसो#1:7 परमेस्वरहेङ खाङधुरि मापाकालाइसो इता इदोइ द्याङगेलाइ, यहुदिगेलाइ कालाउ आरु दिरगेलाइहेङ पुजिका द्याङगेलाइहेङ दोअ्का। हाइ दोङ साघाइ माचुमासिङ उङको द्याङगेलाइ येसु ख्रिस्टको बचन प्राचार पालिको भाअ्सिङ भेनेङ-भेनेङ थामेगेलाइता पाक पातेङ हि। 8ओदोङ भाअ्सिङ इसिका द्याङगेलाइहेङ सेवा सत्कार पालि गोइखे, कालाउकि केलाइ सत्ये सुसमाचार प्राचार पालि इम्बालाइको कामता सहभागि जेङलि द्वाको। 9का लाम्फाङ नाङको मन्डलिको खान्धुराइगेलाइहेङ एनोङ पात्तारा लेखेका हिघाखा, कालाउ दियोतिरिफस काङको सुझाब ग्रहन पालि माकिका हि, हाइपालिपानु वा ताइमिङ जेलाउ बुङ मन्डलिको आगुवा जेङलि भोखे। 10ओदोङ भाअ्सिङ जेलाउ का ल्वाङका कालाउ नेलाइको आगाता वाको पाका गोताङ कामगेलाइ थाइ-थाइ पापियाङका माकुनुते गोताङ मारेम्का सब्दगेलाइ प्रयोग पातेङ केलाइता लादाइका आरोपगेलाइ इदोइ झोको खिनिङ माको, वा दोफाङ पाक पाका खान्धुराइ ओनेगेलाइहेङ बुङ इन्कार पाखे। कालाउ स्वागत पालि भोकालाइहेङ बुङ खोराइखे। इता थेकापा कि वा इम्बालाइहेङ मन्डलिसो बाहार ओल्लेपाखे।
11ओइ आनाउ खाङधुरि ओने, मारेम्का काम पाका द्याङगेलाइ भाइका माको, कालाउ रेम्का काम पाकालाइको आनुसरन पासु। जाइ रेम्फा पाखे वा परमेस्वरको सान्तान दोङ दोअ्तेङ तिङपाखे। जेसापा हासु बुङ मारेम्का काम पाखे पानु वा परमेस्वरहेङ नाल्का मान्थुखे।
12मन्डलिता झाराङ दोअ्खे, कि डेमेतिरियस एमि रेम्का द्याङ दोङ हि, हाइपालिपानु वा सत्ये परमेस्वरको बचन आन्सार ताइको जिबन जियाइखे। कालाउ केलाइ बुङ दोअ्न्हाखे कि वा एमि रेम्का द्याङ हि, कालाउ नाअ् गिखेना कि केलाइको साक्सि सत्ये हि।
आम्तिम सेउपाखा
13का नासेहेङ दोअ्लि गोइका हेन्जाङ काथा हि, कालाउ का या काथाहेङ इदोइ पात्ताराता लेखेलि माभोखा। 14कालाउ का नेलाइकोताङ धेमाङ लोतेङ सोझाङ दोफा-दोफाङ काथा पालि आस पाखा।
15का प्रार्थाना पाखा, कि परमेस्वर नासेहेङ सान्ति पियाको। इताको झाराङ खान्धुराइ सानाइतिगेलाइसो नासेहेङ सेउपाखा। कालाउ गोताङ सानाइतिगेलाइहेङ मिङ ह्रुतेङ काङको सेउपाखा दोअ्पिसु।
Currently Selected:
3 युहान्ना 1: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.