2 कोरिन्थि 3
3
1हाइ आरोङ केलाइ ताइकोङ बाखिन पालि लागिका हिनाहि रो? हाइ आधिमि-आधिमिहेङ गोइका कोनिङ केलाइ नेलाइहेङ माकुनु नेलाइसो बो गेलाइहेङ सिफारिस पात्तारा तिङपालि गोइखे रो? 2नेलाइ केलाइको परमेस्वरको भाअ्सिङ काङको पाका कामको सिफारिस पात्तारा भाइका दोङ हिसुना, जेदोङ केलाइको ह्रदयता लेखेका हि, जेदोङ केलाइ नेलाइको माझाता पाका आसल काम दोङ गोताङ द्याङगेलाइ नाल्लि कालाउ पढेलि दोखे। 3नेलाइ दोङ तिङपासुखेना, कि नेलाइको बद्लिका जिबन ख्रिस्टको लेखेका पात्तारा भाइका हि, या पात्तारा वा केलाइको सेवाको माध्यामसो लेखेका हिघाहि। जेदोङ मसिहोइ लेखेका माको, भरु बान्चिका परमेस्वरको आत्माहोइ लेखेका हि, उन्ठुइको पाटिता माको, कालाउ द्याङको ह्रदयको पाटिता लेखेका हि।
4ख्रिस्ट पाहासो परमेस्वरता केलाइको खाङधुरि हिका कारन केलाइ इदोइ गोताङ काथाको बारेता खाङधुरि पानाखे। 5हिदोइ बुङ काम पालि दोका खुबि केलाइता हि पानु केलाइ मादोअ्न्हाखे, कालाउ परमेस्वर केलाइहेङ या खुबि पिखे। 6नावा कारारको सेवकगेलाइ जेङलि वा केलाइहेङ खुबि पिहि, इदोइ चाहि पबित्तरो आत्माको कारार हि, व्यवस्थाहोइ तेअ्पाका कारार माको, हाइपालिपानु मोसा लेखेका व्यवस्था माकिलिको परिनाम सिलि दोङ, भरु पबित्तरो आत्माते आनान्त जिबन पिखे।
नावा कारारको महिमा
7जेलाउ मोसाको व्यवस्था उन्ठुइको पाटिगेलाइता लेखेका हिघाहि, इङको बेला परमेस्वरको महिमा तिङहि, इस्राएल सारभिको द्याङगेलाइ हेन्जा सोमोइ थेकापा मोसाको ह्राइ खाङलि मादोहि, हाइपालिपानु इङको चिल्कातेङ हिघाहि जेलाउ कि इङको चिल्काका ह्रिङका सोमोइ थेकापा माहिहि, ओदोङ भाअ्सिङ जेसापा मोसाको व्यवस्थाको आधारित सेवाहोइ सिका चुमाखे, जेदोङता इन्सिका महिमा हिघाहि पानु, 8कालाउ पबित्तरो आत्माको सेवाको काम आझाइ हेन्जा महिमामय जेनावा। 9हाइपालिपानु दुसिका चुमाका व्यवस्था महिमामय हिघाहि पानु, द्याङगेलाइहेङ परमेस्वरको आगाता धर्मि बानाइका नावा कारार इस्तुङ महिमामय जेङखे। 10हाइपालिपानु नावा कारारको तुलानाता मोसाको व्यवस्थाता एला इन्सिका महिमा मान्थु। 11हाइपालिपानु जेसापा व्यवस्थाता आले सोमोइको भाअ्सिङ महिमा लोका हिघाहि पानु जेलाउलाउको भाअ्सिङ हितेङ हिका नावा कारारता चाहि झन हेथे बार्का महिमा जेनावा।
12ओदोङ भाअ्सिङ केलाइको इसिका आस हिनाङ केलाइ एकदम साहासि जेङका हिनाहि। 13केलाइ मोसा भाइकाङ माको, जाइ ताइको ह्राइसो राम्लि निसित जेङका महिमा इस्राएल सारभिको द्याङगेलाइ मातिनाको दोअ्तेङ ताइको ह्राइता नोसोइ थुम्का हिघाहि। 14कालाउ ओबालाइको मन राङका जेङका हिघाहि, हाइपालिपानु नानिको दिना थेकापासोङ पुर्ना कारार पढेलाउ इङको नोसोइ हितेङ हिखे, जेदोङ नोसोइ ख्रिस्टता खाङधुरि पाकालाइको भाअ्सिङ खिनिङ लाअ्पाखे। 15एइ, नानि थेकापा बुङ मोसाको व्यवस्थाको किताप पढेलाउ नेलाइको ह्रदयता नोसोइ गुका हिखे, ओदोङ भाअ्सिङ इम्बालाइ इङको गोताङ रुपसो बुझिलि मादोखे। 16कालाउ जेलाउ हिदोइ बुङ द्याङगेलाइ प्रभु येसुता खाङधुरि पाखे, कालाउ खिनिङ इङको नोसोइ लाअ्पाखे। 17एला प्रभुते आत्मा हिका हि, कालाउ जेता प्रभुको आत्मा ह्यावा इन्ता व्यवस्थासो स्वतन्तरो जेङखे। 18केलाइ झाराङ आइना कोनिङ नोसोइ मान्थुका ह्राइगेलाइता प्रभुको महिमा तिङपान्हाखे, कालाउ केलाइ वाको भाइपाङ परिबरतन जेङन्हाखे कालाउ केलाइको महिमा झन-झन हेन्जा बाढेका महिमाता वा भाइपाङ बानाइदोङखे, इदोइ प्रभुको काम दोङ, जेदोङ पबित्तरो आत्मा हि।
Currently Selected:
2 कोरिन्थि 3: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
