2 कोरिन्थि 1
1
1का, पावल केलाइको खान्धुराइ ओने तिमोथि दोफाङ इदोइ पात्तारा लेखेदोङखा, का परमेस्वरको इच्छा पाहासो येसु ख्रिस्टको छाल्न्हाका चात्या हिघा, का इदोइ पात्तारा कोरिन्थि सहरता हिका परमेस्वरको मन्डलिहेङ, कालाउ गोताङ आखैया प्रदेसता हिका झाराङ पबित्तरो जनगेलाइहेङ लेखेदोङखा।
2परमेस्वर केलाइको आबा कालाउ प्रभु येसु ख्रिस्टसो नेलाइहेङ आनुग्रह कालाउ सान्ति।
परमेस्वरसो सान्त्वाना
3केलाइको प्रभु येसु ख्रिस्टको आबा परमेस्वरहेङ बाखानाइ ज्याको, जाइ करुनामय आबा, कालाउ केलाइहेङ जेलाउ बुङ सान्तावाना पिका परमेस्वर हि। 4परमेस्वर केलाइको गोताङ खाल्को दुखता सान्तावाना पिखे, कालाउकि केलाइ आरुहेङ सान्तावाना पिलि द्वाको। परमेस्वर केलाइहेङ इङको सान्तावाना पिका कोनिङ, जेसाङ केलाइ बुङ आरुगेलाइहेङ सान्तावाना पिलि द्वाङ। 5हाइपालिपानु जेसाङ ख्रिस्ट कस्ट भोगिहि एसा पासोङ केलाइ बुङ कस्ट भोगिलि गोइखे, कालाउ परमेस्वर ख्रिस्ट पाहासो केलाइहेङ सान्तावाना प्याङ। 6केलाइ दुख निङन्हाहि पानु या नेलाइको सान्तावाना कालाउ मुक्तिको भाअ्सिङ हि, केलाइ सान्तावाना निङलाउ बुङ इङको नेलाइको सान्तावानाको भाअ्सिङ हि, केलाइ भोगिका इङकोङ दुखगेलाइ नेलाइ धर्य दोफाङ सहिलि गोइलाउ नेलाइ बुङ सान्तावानाको आनुभब पास्वाना। 7नेलाइको भाअ्सिङ केलाइको आस बल्लियाका हि, हाइपालिपानु केलाइ गिनाखे कि, जेसाङ नेलाइ केलाइको दुखता झ्वाइनाका हिसुना। एन्साङ दोङ केलाइको सान्तावानाता बुङ नेलाइ जोम्स्वाना।
8खान्धुराइ ओनेगेलाइ, केलाइ एसिया प्रदेसता भोगिका दुखको बिसोइता नेलाइहेङ थाहा जेनाको दोअ्तेङ का इच्छा पाखा। हाइपालिपानु केलाइ ओसारापा हेन्जा ल्हिकाहोइ दुबिका हिघान्हाहि, कि इङको ल्हिका केलाइको सहिलि मादोका सरबुङ खाङतेङ बुङ बाहार हिघाहि, इता थेकापा कि केलाइ बान्चियाङ दोका गोताङ आस बुङ लाअ्का हिघान्हाहि। 9केलाइ पाक्का दोङ सेअ्न्हाङ ला दोअ्का केलाइहेङ लागिका हिघाहि। केलाइ ताइमिङ ह्रुता माको, कालाउ सिकालाइहेङ सिन्चाल पाका परमेस्वर ह्रुता भर परिलि द्वाइने दोअ्तेङ इन्सिका जेङका रोइसो। 10वा दोङ केलाइहेङ सिकासो थिलि गोइका जोखिमसो लाअ्पाहि, कालाउ वा दोङ केलाइहेङ बान्चिपाङ, हाइपालिपानु वाको ह्रुता दोङ केलाइ केलाइको भोरोसा ताअ्का हिनाहि, कि वा केलाइहेङ आरोङ बुङ बान्चिपाङ। 11कालाउ नेलाइ बुङ मिलितेङ प्रार्थाना पाहासो केलाइहेङ साघाइ दोङ सुखेना एसापा प्रार्थाना पालाउ केलाइको भाअ्सिङ चढाइका हेन्जाङ द्याङगेलाइको प्रार्थानागेलाइको उत्तरता केलाइहेङ प्राप्ता जेङका आनुग्रहको भाअ्सिङ परमेस्वरहेङ केलाइको भाअ्सिङ धन्यबाद चढाइन्हाखे।
पावलको योजाना फेरिका
12हाइपालिपानु केलाइ गर्ब पानाखे कि केलाइको बिबेक झालाफालापा हि, सुमिङता कालाउ बिसेस पातेङ नेलाइ दोफाको केलाइको सम्बन्ध नेलाइ दोफा कालाउ सुमिङको द्याङगेलाइ दोफा पबित्तरो कालाउ सत्ये हि, जेदोङ चाहि परमेस्वरसो लोखे, इदोइ चाहि मानिमुइ बुद्दिहोइ माको, भरु परमेस्वरको आनुग्रह पाहासो हि। 13केलाइ नेलाइहेङ पढेतेङ बुझिका काथागेलाइ खिनिङ लेख्याङ, 14कालाउ नेलाइ एला केलाइहेङ आतुइसा खिनिङ बुझिका हिसुना, कालाउ का आस पाखा कि केलाइको प्रभु येसु ख्रिस्ट घुरितेङ लोलाउ नेलाइ बुङ केलाइहेङ पुर्न रुपसो बुझिस्वाना, कालाउ केलाइ नेलाइको बारेता घमन्ड पाका कोनिङ नेलाइ बुङ केलाइको बारेता घमन्ड पालि दोअ्स्वाना।
15केलाइ नेलाइकोता लाम्फा दोङ भेतिलि लोलि इच्छा पाका काथा नेलाइ बुझिका हिसुना दोअ्का काथाता का निसित जेङनाङ, का नेलाइहेङ भेतिलि भोघाखा, कालाउकि नेलाइहेङ न्हेखे भेतिलि लोकाता नेलाइहेङ आसिस जेङलि द्वाको। 16काङको योजाना इदोइ हिघाहि कि का म्यासिडोनिया प्रदेसता हानिलाउ नेलाइहेङ भेतितेङ हानाङका कालाउ धुरिलाउ बुङ नेलाइहेङ भेतियाङका, इन्तासो यहुदि जिल्लाता हानिलाउ खाचोता नेलाइ कासेहेङ साघाइसु। 17एसा पालि भोलाउ का आस्थिरता तिङपाघा रो? हाइ का ताइको योजाना बानाइलाउ सुमिङको द्याङगेलाइ भाइपा “एइ” कालाउ न्हुसो “माको” दोअ्ताङका रो?
18परमेस्वर खाङधुरि योग्य हिका कोनिङ केलाइ “नेलाइहेङ दोअ्का काथा जेलाउ बुङ सत्ये हि।” 19हाइपालिपानु सिलास, तिमोथि कालाउ का नेलाइको माझाता प्राचार पाका परमेस्वरको चान येसु ख्रिस्ट धातुवा मान्थुघाहि, भरु वाकोता जेलाउ बुङ सत्ये खिनिङ हि। 20हाइपालिपानु परमेस्वरको गोताङ प्रतिग्यागेलाइ ख्रिस्टता पुरा जेङखे। ओदोङ भाअ्सिङ परमेस्वरको महिमाको भाअ्सिङ केलाइ ख्रिस्ट पाहासो “आमेन” दोअ्नाखे। 21परमेस्वर केलाइहेङ नेलाइ दोफा ख्रिस्टता बल्लियाका बानाइका हि, कालाउ केलाइहेङ ताइको भाअ्सिङ खेङका हि। 22कालाउ वा केलाइ ह्रुता ताइको लाहासाप लागाइका हि, कालाउ केलाइको ह्रदयता लाङ बाइनाको रुपता पबित्तरो आत्मा पिका हि।
23परमेस्वर काङको इदोइ सत्ये काथाको साक्सि हि, कि का आरोङ धुरितेङ कोरिन्थि सहरता मालोघा, हाइपालिपानु का नेलाइहेङ हाकाराइलि माभोघाखा। 24नेलाइको खाङधुरि ह्रुता केलाइ खाबारा जामाइलि माचाहिनाखे, भरु नेलाइको आनान्दको भाअ्सिङ नेलाइ दोफा मिलितेङ काम पाङ। हाइपालिपानु नेलाइ ताइको खाङधुरिता सिकापा हिसुखेना।
Currently Selected:
2 कोरिन्थि 1: DHINT
Highlight
Share
Compare
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
