1 थेस्लोनिकि 4
4
परमेस्वरहेङ मन परिका जिबन
1आखिरिता खान्धुराइ ओनेगेलाइ, प्रभु येसुता केलाइ नेलाइहेङ आनुरोध पानाखे कि परमेस्वरहेङ मन परिका जिबन जियाइसु, जेसाङ केलाइ नेलाइहेङ धिरपाका हिनाहि, कालाउ एन्सा बुङ पादोङ सुखेना कालाउ केलाइ आझाइ हाउसा पिनाखे कि इदोइ खान्तेङ आसल पासु। 2हाइपालिपानु नेलाइ गिसुखेना, कि केलाइ प्रभु येसुको खाबारासो निङका हिदोइ-हिदोइ आदेसगेलाइ नेलाइहेङ पिन्हाहि। 3परमेस्वर चाहिखे कि नेलाइ पबित्तरो जिबन बितिपासु कालाउ जिउको मारेम्का इच्छा आन्सार पाप मापासु। 4कालाउ नेलाइ ताइको जिउहेङ काबुता ताअ्लि धिरलि गोइखे, कालाउ पबित्तरो कालाउ आदारनिय जिबन जियाइलि गोइखे। 5कालाउ परमेस्वरहेङ मानाल्का द्याङगेलाइ भाइपा नेलाइ ताइको जिउको मारेम्का इच्छा आन्सार काम मापासु। 6एन्सा पातेङ हासु बुङ ताइको खान्धुराइ ओनेको बिरुद्दता पाप मापाको। हाइपालिपानु प्रभु येसु इसिका गोताङ काथा पाकालाइहेङ दन्ड प्याङ। जेसा, कि केलाइ लाम्फासोङ नेलाइहेङ चेताउनि पिका हिनाहि। 7हाइपालिपानु परमेस्वर केलाइहेङ आपबित्तरो जिबन माको, भरु पबित्तरो जिबन जियाइलि काइका हि। 8ओदोङ भाअ्सिङ जाइ इदोइ सिक्स्याहेङ माकिखे वा द्याङहेङ माको कालाउ परमेस्वरहेङ मामानिखे, जेदोङ परमेस्वर नेलाइहेङ ताइको पबित्तरो आत्मा प्यावा।
9कालाउ खान्धुराइ ओनेगेलाइता प्रेमको बिसोइता नेलाइहेङ केलाइ हिदोइ बुङ काथा लेखेलि आवस्यक मान्थु, हाइपालिपानु एमिसो-भेनेङहेङ प्रेम पासु दोअ्का काथा नेलाइ ताइमिङ परमेस्वरसो धिरका हिसुना। 10नेलाइ लाम्फा दोङ म्यासिडोनिया प्रदेसको खान्धुराइ ओनेगेलाइहेङ ताइको प्रेम तिङपाका हिसुना, कालाउ आझाइ हेन्जा प्रेम पातेङ हानेसु दोअ्तेङ केलाइ नेलाइहेङ बिन्ति पानाखे। 11केलाइ नेलाइहेङ दोअ्का भाइपा नेलाइ सान्ति पुर्न जिबन जियाइलि गोइखे। कालाउ आरुको कामता आगाल माअ्धा भरु ताइकोङ आवस्यकता को भाअ्सिङ ताइमिङ परिस्रोम पासु। 12कालाउकि खाङधुरि मापाका द्याङगेलाइ बुङ नेलाइको ब्यभार तिनावा कालाउ आदार पावा। कालाउ नेलाइहेङ खाचो परिलाउ हासु बुङ दोफा भर परिलि मागोइयावा।
आरोङ सिन्हुतेङ ल्होका आस
13ओइ खान्धुराइ ओनेगेलाइ, केलाइ चाहिनाखे कि नेलाइ गिसु, कि इङको खान्धुराइ जाइ सिलि दोका हि इम्बालाइ दोफा हाइ जेनाङ वाला। नेलाइ आस मान्थुका द्याङगेलाइ भाइका सोक मापासु। हाइपालिपानु इम्बालाइ दोफा सितेङ आरोङ सिन्चालाङ दोअ्का हिदोइ बुङ आस मान्थु। 14हाइपालिपानु केलाइ खाङधुरि पानाखे, कि येसु सिहि कालाउ आरोङ सिन्चाल्हि। एसापा दोङ येसुता खाङधुरि पातेङ सिकालाइहेङ परमेस्वर येसु दोफा ए दोफाङ चुम्पावा। 15हाइपालिपानु केलाइ प्रभु येसु ख्रिस्टको बचनसो नेलाइहेङ दोअ्नाखे, कि केलाइ जाइ बान्चिका हिनाहि, येसु ख्रिस्ट आरोङ मालोपा धाउ बान्चिकालाइ वासेहेङ मादुसुताङ, हाइपालिपानु सिका खान्धुराइगेलाइ वासेहेङ लाम्फा भेतियावा। 16हाइपालिपानु प्रभु येसु ख्रिस्ट ताइमिङ स्वर्गसो खुअ्तेङ ल्वाङ कालाउ बार्का गालाहोइ आग्या प्याङ, कालाउ प्राधान स्वर्गदुतको चेराका गालाता दोअ्तावा कालाउ परमेस्वरको सानाइ म्होका बेलाता ख्रिस्टता सिका खान्धुराइगेलाइ झाराङ खान्तेङ लाम्फा सिन्चालावा। 17कालाउ न्हुसो थेकापा केलाइ बान्चितेङ हिकालाइहेङ जोम्पावा, कालाउ केलाइ प्रभु येसुहेङ आकासता भेतियाङ कालाउ एसापा केलाइ इङको सोमोइसोङ जेलाउ बुङ प्रभु दोफा ह्याङ। 18ओदोङ भाअ्सिङ एमिसो-भेनेङहेङ इसिका बचनगेलाइहोइ हाउसाइ पासु।
Currently Selected:
1 थेस्लोनिकि 4: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
