1 थेस्लोनिकि 3
3
तिमोथिको चुमाका सुसमाचार
1आन्ताता नेलाइसो लाअ्न्हातेङ हिलि मारेम्का लागिनाङ केलाइ एथेन्स सहरता दोङ हिलि निर्नय पानाहि। 2कालाउ नेलाइहेङ ताइको खाङधुरिता इस्थिर कालाउ हाउसाइ पालि, परमेस्वरता ख्रिस्टको सुसमाचारको सेवक केलाइको दोफाङको ओने तिमोथिहेङ नेलाइकोता दिङगिल्का हिनाहि। 3कालाउकि इदोइ कस्टगेलाइहोइ हासु बुङ हारेस माचाको। हाइपालिपानु नेलाइ ताइमिहेङ दोङ थाहा हि, कि केलाइ कस्ट भोगिलि गोइका हि। हाइपालिपानु या केलाइको भाअ्सिङ परमेस्वरको इच्छा दोङ हि। 4हाइपालिपानु जेलाउ केलाइ नेलाइ दोफा हिलाउ, केलाइ नेलाइहेङ दोअ्का हिघान्हाहि, कि केलाइ साताइन्हाका भोगिलि गोइखे, कालाउ नेलाइ गिसुखेना कि, जेसाङ केलाइ दोअ्का हिघान्हाहि एन्साङ जेङहि। 5ओदोङ भाअ्सिङ का आझाइ सहिलि मादोअ्नाङ कि नेलाइ हाइ पातेङ हिसुना दोअ्तेङ थाहा निङलि का तिमोथिहेङ नेलाइकोता दिङगिल्घा। हाइपालिपानु हिसो बुङ साइतान नेलाइहेङ परिक्स्याता पाहि, कि कालाउ केलाइको परिस्रोम ब्यर्थ जेनाङबे दोअ्तेङ का थिका हिघाखा।
6कालाउ तिमोथि नेलाइसो एलाङ खिनिङ घुरितेङ थुकालि लोका हि, कालाउ नेलाइको खाङधुरि कालाउ प्रेमको बानाल केलाइहेङ हिङपाहि। नेलाइ केलाइहेङ जेलाउ बुङ फोम पासुखेना कालाउ केलाइहेङ भेतिलि बार्का इच्छा पासुखेना दोअ्का काथा केलाइहेङ दोअ्हि। केलाइ बुङ नेलाइहेङ ओसाङ भाइपा भेतिलि चाहाना पानाखे। 7ओदोङ भाअ्सिङ खान्धुराइ ओनेगेलाइ, नेलाइ खाङधुरिता बल्लियाका जेङका काथा तिमोथिसो हिङतेङ केलाइ निरास कालाउ कस्टता परिलाउ बुङ हेन्जा हाउसाइतेङ हिनाहि। 8हाइपालिपानु प्रभुता नेलाइ बल्लियाका जेङतेङ हिसुना पानु, इदोइ केलाइको जिबन आर्था पुर्न जेङखे। 9कालाउ नेलाइकोङ कारनसो केलाइ केलाइको परमेस्वरको आगाता लेङचाका हिनाहि, कालाउ याको भाअ्सिङ केलाइ परमेस्वरहेङ जेथे धन्यबाद पिलाउ बुङ आतुइसा जेङखे। 10नेलाइ दोफा भेतिलि द्वाको दोअ्तेङ कालाउ प्रभु येसु ख्रिस्टको खाङधुरिता बल्लियाका बानाइलिको भाअ्सिङ साघाइलि केलाइ जेलाउ बुङ नितिम न्हिसिन परमेस्वर दोफा प्रार्थाना पातेङ हिनाहि।
11केलाइ प्रार्थाना पाङ कि केलाइको आबा परमेस्वर कालाउ प्रभु येसु ख्रिस्ट नेलाइकोता लोका दामा हेअ्प्यावाको। 12केलाइ प्रार्थाना पाङ कि जेसाङ केलाइ नेलाइहेङ प्रेम पानाखे, एन्साङ दोङ प्रभु नेलाइहेङ बुङ एमिसो-भेनेङ दोफा कालाउ गोताङ द्याङगेलाइ दोफा प्रेमता आझाइ बाढेपाको। 13केलाइ प्रार्थाना पानाखे कि प्रभु येसु नेलाइको ह्रदयहेङ इस्थिर बानाइयाको, कालाउकि जेलाउ येसु आरोङ गोताङ परमेस्वरको जनगेलाइ दोफा लोलाउ नेलाइ केलाइको आबा परमेस्वरको आगाता पबित्तरो कालाउ दाग मालागिका जेङलि दोसु।
Currently Selected:
1 थेस्लोनिकि 3: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
