Zakharia Uram 11

1We, Libanon mutuk a, kan mutuk dam tingdarur co ilila co si aras ara nirya uk yaleboka yibkwande. Ati, a mutuk dam wengyangan bisik ara bublan nirya kukeibdum. 2Co aras ara sirya dalukoka marur ba, teleb-teleb co nirya ara malyi kibwe. Ati, we co sanobar ara kanda ur engerorandum. Ba, co ilinto burum dangdur mutuk asi nirya kweboka mabdeibmar. Tonda, Basan mutuk tingdarur ilila-ilila co ara ur engerorandarur. 3Sun telebto kuron dinyi ara malyito kubminikmar deyok aryi bisam domba kalingna nang engena lilim ara sun ton kekebdendarur. Ani, bai kam singa sun kuron ai me Yordan yuryibiu lingkwa nirya malyi kibmar ba, kamunmang asi sun ton kekebdendarur.

Bisam domba kalingna nang ara ninyi deici bitinyi kunung uram deyok

11:4-17

4Ni Nai, ni Molonunyi Er Iya Erebdobnyi biryi nisi ato ebdeibmar, “Kanda oboka uk dabkwamangnyi bisam domba asi kalingnaming atonyi kubdum. 5A bisam dekwamangnyi nang aryi, ‘A bisam oboka uk dabkwaman ara malyi kubman,’ tenerdena kum kunung. Ba, a bisam dengna dobdobmangnyi nang ara sun kanya teleb aryi ato eraming, ‘Nai Iya Erebdobnyi. Ura, nibabyi sirya bona bonanyi danman ati, niryi Kansi ni Nai eboka kibdobkin,’ eraming. Ba, a bisam domba kalingna nang ara sun winiroramingnyi bisam asi bico kum kurur,” ebmar. 6Ura, tonda Er Iya Erebdobnyi biryi ato ebmar, “Ati, sun tukwetam kunung nang ara Niryi tuba boukwe kum kibkwan. Eda, diba ati, Niryi ninyi yuk-yuk sun kalingna nang taruk dam karebkwan. Ani, sun weik sien nang taruk dam karebkwan. Ba, sun a nang aryi tukwetam mutuk nirya asi malyi kibsinibkwaming. Ba, ninyi tentok ababyi sun taruk dam aryi Niryi ton kum lebdeibkwan,” ebdeibmar. 7Ura, niryi dekdobingnyi ura, oboka uk dabkwaming nang dinyi bisam domba yubwa kalingman. Ura, niryi a bisam domba mer kalingkwaman kama bitinyi dobtalebne ura, a kama bitinyi ara si yuk-yuk si dobman. Ton kama si dobman ara, “Kanya Namin Kurdeirirdana,” eboka si dobman. Ba, ton kama ati si dobman ara, “Antaniboka Tonkwa Kurona,” eboka si dobman. Ura, niryi a bisam mer asi kalingman. 8A kalingman talak aryi wala tentok aryok a bisam domba kalingna nang ninyi winiryi ara yakdonokmase. Ura, niryi sun kalingnung bisam domba mer dirdena ara ni li kubmanir. Asi, sunbabyi ni urasin dirdena ara u dokom ebsinibmar. 9Ura, niryi ato ebman, “Niryi sunsi kalingsina ara ni li. Ati, dibmanto kunmangnyi nang ara ur a dibnung. Ba, kum dankwamangnyi nang ara ur kum danung. Ba, kam tuba kunmamunyi nang ara sun mamun ur ordaronmandarur,” ebman. 10A sirya ebman ura, ni kama, “Kanya namin kurdeirina,” eboka si dobman kama dobdobne ura, a kama bulaklobokman. Ara, “Er Imtamnyi ab tukwetam nang ab uram eboka kunubdeianse uram asi kum kunubkwandur,” tenen ati a kama bulaklobman. 11Ba, a tum aryok uram ebdeianse uram ara diba kum kunubmou. Ba, sun a bisam domba dengna nang nisi dirliliranei nang ara, niryi sun dam asi enun uram ara, “Diba, ara Er Iya Erebdobnyi uram asi erur,” teneboka bikmanei. 12Ura, niryi sunsi ato ebman, “Sunci a dinyi ara teleb tenebmunyi ura, niti dengna karebmaninto dinyi ara karebnindarur. Asi, kum ura nisi karenina takdarur,” ebman. Ba, sunci nisi karebmanto dinyi ara karebmaning. Nisi karebkwamanungwe dinyi ara ikin dinyi kiklin dinyi aryi kiklibing ura, keil si perak uang asi 30 baryi karebmaning. 13Karebmaning bok, Er Iya Erebdobnyi biryi nisi ato ebmanir. “A dobmarim dinyi ara Ni ai keil uang deirirban nang taruk dam karebdum,” eboka arukmanir. Sunci kikliboka niti karebmaning to ara a kunum. Ura, niryi a keil si perak uang doboka Er Imtamnyi ai dam deirirban nang taruk karebman.#Mat. 27:9-10 14A sirya karebne ura, “Sun Yehuda nang ab Israel nang ab tonkwa antaniboka kunung dinyi ara takdankwaming,” tenen, ni kama bitinyi dinyi, “Antaniboka Tonkwa Kurona,” eboka si dobman kama bulakobman.

15-16A sirya bulakobman ura, Er Iya Erebdobnyi biryi nisi ato eboka arukmanir. “Diba ati, Niryi a mutuk dam asi Ni bisam domba kalingnanyi tentok tikeibkwan. Bok, a bisam kalingnanyi bira kum danmanci bisam ara boukwe kum kibkwandanyi bisi tikeibkwan. Ani, waningni bisam ara ingkiringna kum kubkwandanyi bisi tikeibkwan. Ba, oranci ba, dilaka camdaranci bisam ara kwetena kum kunkwandanyi tikeibkwan. Ani, nong kib telebto kuramingnyi bisam ara diboka kalingna kum kubkwandanyi bisi tikeibkwan. Eda, anyi bira nong telebto neroramingnyi bisam asi oboka yirorandiryi aluk kila ara longokoka deirirlonkwandanyi bisi tikeibkwan. Ati, kanda bisam domba kalingna nang malyi aryi kuraming to kuboka kiklibkwandim ati, utotoa kikniboka bobdobminyi ura, anabdobdum. 17Ni bisam kalingnanyi bira a tikeibkwananyi bira aminda wenen dinyi dobdobkwande. Anyi bira Ni bisam domba mer deiblobkwande deyok aryi wenen dinyi dobdobkwande. Ara, ninyi on ya aryi er taruk sekabokwaming ani, siriktam asing ara kwebkabokwaming. Er taryok ara iya mitang dandobkwande ba, er asing siriktam asing ara iya kubmurubkwande,” ebdeibmar.

Currently Selected:

Zakharia Uram 11: MTG

Highlight

Copy

Compare