Zakharia Uram 10

Er Iya Erebdobnyi tentok aryok kisal dangna mo karesurur uram deyok

10:1-2

1Co keta dobci talak ara Er Iya Erebdobnyi bisi, “Nun mo ton karebsurum,” eboka molobdobkwandarur. Ba, Er Iya Erebdobnyi biryi duwa sukuboka mo ilinto cemnande dinyi karebkwansurur. Ani, Erci mo doun ilinto cemnande mo sunti karebsici uca, sun ninyi yuk-yuk wa iboka yina-yina kouamunyi deici cebdeibkwansurur. 2Ara, ato ati ebmasin. Kwemdeina kiknibdeiboka molon nang aryi eransing dinyi ara dib kum uram asi eransing. Ani, kunumna kunurminingnansing dinyi ara tola ati eboka kunurdeiransing. Ani, lengdera marlikniransing dinyi ara kununa kum dinyi asi marlikniransing. Ani, sunci uram eboka onoransing dinyi ara dib kum dinyi aryi uram eboka onoransing. A deyok aryi akatei nang ara kalingna kum bisam domba ato kuboka yibarkirinung. Ani, bisam domba kalingna nang kum deyok aryi mambul ilinto donung.#Mat. 9:36; Mrk. 6:34

Er Imtamnyi biryi sun Israel nang asi yuk mutuk nang taruk dam aryi lebdeibkwamwe ebmou uram deyok

10:3–11:3

3Er Imtamnyi biryi ato ebmou, “Sun Ni bisam domba mer, Niryi wibmase atei nang asi diboka kum kalingnung ba, Ni yu kunurur ati, Niryi sunsi wenebkwan. Ura, Ni Imtamnyi, imtam yin doun nang sienyi bisi bisam kalingnanyi kibniryi, Ni bisam mer ara Yehuda nang asi Nibiramnyi dirnilinkwan. Ani, Niryi sunsi Ni bisam deici bukoka mar ibaraming bisam kuda mikib ato kibdeibkwan. 4Sun Yehuda mutuk nang kankan dam aryi mutuk talen nang ton wibkwan. Ani, ninyi bon nang ton wibkwan. Tonda, ninyi mar bona arungna nang ton wibkwan. Ba, sun nirya tonkwa antanibdoboka Yehuda mutuk nang asi talebkwaming. 5Ura, Er Iya Erebdobnyi biryi sunsi mar dobmilibkwande ba, sunci ninyi mar bobkwaming. Ba, sunci mikib yaboka ninyi mar ordanmangnyi nang aryi sun mar ordana nang asi muna kibdongoboka bisik mintal yan yanisitamnaming to kubkwaming. Ba, sun mar ordana nang ara bisam kuda deici bukoka mar boyanganmangnyi asi malyi kiboka muna obdongobkwaming. 6Niryi sun Yehuda nang asi mikib kibdeibkwan. Ba, Yusuf deibdoba nang ara lebdeibkwan. Ura, Niryi sunsi sun atei dam tamuboka boyankwan. Ato kubkwan ara Niryi sun boukwe deyok aryi kubkwan. Ba, sun teleb kubkwaming ara, Niryi sunsi, ‘Ni li,’ ton kum teneana ato atei nang kubkwaming. Ara, Nira Iya Erebdobnyi, sun Molonanyi kunun deyok aryi sun molona kekebkwan ba, sunda telebto kubkwaming. 7Ba, Efraim yala nang ara ninyi mar ordana mikib ilinto kurande ato nang kubkwaming. Ba, sun kanya kilkil kubkwande ara co anggur du yung me yiraming ba, kurande to kubkwaming. A nang ababyi Niryi sunsi karebkwansin ba, ninyi muna kibdongobkwandum dinyi ara luba kum kibkwaming. Sun mabwe odei-odei binkwaming ara a deyok ara luba kum kibkwaming, iya nukarebdanin binkwaming. Ni Imtamnyi biryi sunti kubdeibkwan dinyi ati, sun kanya kilkil mitik kum kubkwande. 8Niryi sunsi okna fililing eboka naboka tentok ai bulubdeibkwan. Niryi sunsi lebdeianyi deyok aryi sun ninyi ara yubwa-yubwa minob kuramnyi yubwa ato kubkwaming. 9Niryi sunsi yuk mutuk atei nang kankan donokanyi bok, sun bindoka kuramingnyi ai aryi Nisi luba kimnina kum kubkwaning. Sun nirya ab sun nermabwe ababyi lebdeibkwan ba, sun nirya tonkwa sun mutuk dam tamuboka yandobkwaming. 10Niryi sunsi Mesir mutuk tukwe dam aryi tamuboka boyankwan. Tonda, Asyur mutuk dam aryi boboka bulurdeiryankwan. Ura, Niryi sunsi boboka Gilead mutuk dam ab Libanon mutuk dam ab kamdeiriryankwan. Ba, a mutuk tukwe dam nirya ara mutuk lo ton kum kubkwande, eda, sun urasin dem kubkwande. 11Ba, sun dam asi minob talak aryi kunuamwe to kubkwande. Ara, Mesir mutuk me koubkwamnyi ati, Ni Imtamnyi biryi me lontik-lontik ena asi kulabmase. Ba, me Nil um kuramwe ara dala dem kiamwe ato kubdeibkwasin. Ba, Asyur nang wingdaramingnyi ara malyi kibkwan. Ba, Mesir nang dub ererdaramingnyi ara mikib kum daneibkwande. 12Ura, Ni uram keken atei nang ara Niryi mikib atei nang kibdeibkwan. Ba, sunci Ni Iya Erebdobnyi si aryi sun kanya dub ereboka kubkwaming,” eboka Er Iya Erebdobnyi biryi ato ebmou.

Currently Selected:

Zakharia Uram 10: MTG

Highlight

Copy

Compare