Bilangan Uram 32

Musa biryi Israel nang ati Yordan me yaletam mutuk nukmou uram deyok

32:1-42

1Ruben yala nang ab, Gad yala nang ab ara bisam sapi ab, kambing ab, domba ab ilinto winiramnyi. Ura, sunci dinmai uca, Yaezer mutuk ab, Gilead mutuk ab ara bisam winina teleb mutuk tenebmai. 2Ura, Musa ab imam Eleazar ab, Israel nang weik sien nang ab asi ato ebmai. 3“Atarot mutuk ab, Dibon mutuk ab, Yaezer mutuk ab, Nimra, mutuk ab, Hesybon, mutuk ab, Eleale mutuk ab, Sebam mutuk ab, Nebo mutuk ab, Beon mutuk ab ara mutuk teleb. 4A mutuk ara Er Iya Erebdobnyi biryi muna kibdongoboka Israel nang ati nukwe. Ba, a mutuk ara sul mutuk ati, nun bisam yabwe winina ara teleb kubmasir. Ara, nun bisam ilinto ati ebmab,” ebmai. 5Ura, tubto ato ebmai, “Nai nun kansi molobmakib. A mutuk tukwe ara nunti nuksurum ba, nun mutuk kibkwande. Kanci kuboka nunsi, ‘Me Yordan kouboka bindarur,’ esina mem!” ebmai. 6Ura, Musa biryi Gad yala nang ab, Ruben yala nang ab asi uram ato dekeibmou, “Sun kwit yabwe yuk Israel nang ara mar ordarbinkwamang bok, sunda unatoa ati a kubkwamarum do? 7Unatoa ati yuk yala, Israel nang me Yordan kouboka Er Iya Erebdobnyi biryi uram talak ebdeibsou mutuk wengbana ilil kibsinibmarum do? 8Sun nai yabwe ababyi neiktoto ukuamnyi. Ara, Kadesh-Barnea mutuk dam aryi sun nai yabwe asi, ‘Mutuk minob meimbindarur,’ eanse. 9Ba, sun nai yabwe aryi Eskol mutuk lu minob meimyanamnyi. Sirya tamuboka binmaici Israel nang ilil kibsiniamnyi. Ba, Israel nang asi Er Iya Erebdobnyi biryi uram talak ebdeibsou mutuk wengbana ilil kubmou. 10Ura, Er Iya Erebdobnyi yu wekmouci, ato ebmou, 11‘Israel nang ara Nisi dib kum tenebmaning ati sunsi subkun. Ara, Mesir mutuk aryi anaboka yai nang kwalina 20 bisiboka eitam yini mutuk dam dibsekwaming. Ba, sunda Ni Iya Erebdobnyi biryi sun abwe yabwe Abraham ab, Ishak ab, Yakub ab asi uram talak ebdeibse mutuk kum wengbinkwaming. 12Eda, Kenas yalanyi Yefune mi Kaleb ab, Nun mi Yosua ab akwe a mutuk wengbinkwanding. Ara, sunci Ni Iya Erebdobnyi bisi ilil kuboka Ni ebmanyi to kunururung,’ ebdeiamwe. 13A deyok aryi Er Iya Erebdobnyi yu wekwe ura, Israel nang asi kwalina uki 40 baryi yini mutuk boboka yibaramwe. Ba, Israel nang aryi Imtamnyi bisi malyi kimdamnyi nang nirya dibkiribyi. 14Bok, ukura sunci sun nai yabwe unuboka a tikmarum! Ani, sunda Er Iya Erebdobnyi dam malyi kimdongon nang kibmarum. Ba, sunci Er Imtamnyi yu wekeibmarum ba, Israel nang nirya dibkiribkwamang. 15Sunci Er Iya Erebdobnyi bisi dong bai deibmunyi ura, sun Israel nang nirya asi, tubto Er Imtamnyi biryi Er ebdeianci mutuk baitam kuboka uki tabakdongobkwansir. Ba, yini mutuk dam a iya timum-tamum ebde kunkwandum. Ani, sunci Israel nang nirya asi obkiribkwamarum,” ebmou. 16Bok, Ruben yala ab, Gad yala ab aryi Musa bisi tubto ato ebmai, “Teleb nai, nunci nun bisam yabwe kambing ab domba ab lika dobkwamab. Ani, nun nerabwe mabwe atei ababyi dobkwamab. 17Bok, nun sal nang ara nun kwit yabwe Israel nang yuk yala nang ab antaniboka ordarbinkwamab. Ba, nunci menekoka mar bobibiryi sun mutuk kibkwaming atei nang ibinkwamab. Ba, nun nerabwe mabwe ara lika dobyi atei a mutuk dam kunkwamang. Ara, yuk atei nang aryi iyangnyi ababyi lika wilibwe aryi mar kum binkwande ati a kunkwaming. 18Ba, nunci minob tamuboka yangana kum kubkwamab. Eda, sun Israel yuk yala nang kubkwaming mutuk sun dinyi kibci akwe nun atei tamuryankwamab. 19Ba, nunda Yordan me kouboka otam mutuk ara nun tukwe ton kum kubkwande. Nunda Yordan me kouboka kitingyangantam ara nun mutuk kibwe ati,” ebmai.

20Ura, Musa biryi Ruben yala nang ab, Gad yala nang ab asi ato ebmou, “Sunci diba ati, ‘Nunci Imtamnyi urasin dam aryi ninyi mar ibinkwamab,’ ebmarum. 21Ba, Er Iya Erebdobnyi ebdeibwe to sunci mar bobmunci Yordan me kouboka ninyi ibinkwamarum. Ba, Er Iya Erebdobnyi biryi sun iyangasingnyi nang nirya yakdonokwande. 22Akiryi a mutuk ara Er Iya Erebdobnyi mikib lak kibkwande. Ato kubci ura, sunda tamuboka yandobkwandarur. Sunci Er Iya Erebdobnyi dam ab, sun kwit yabwe dam ab aryi ato kubmamunyi ura, Er Imtamnyi biryi Yordan me yaletam mutuk ara sunti ebkwansir. 23Bok, sunci ato kuna kum kubmamunyi ura, Er Iya Erebdobnyi bisi malyi kibmamunci ba, Er Iya Erebdobnyi biryi sun malyi kibmamunyi dinyi ati weik wenebkwansir. 24Ati, ukura sunci sun nerabwe mabwe kunkwamai weik atei dobmunci, sun bisam yabwe lika dorbindarur. Bok, sun uram talak ebmarum dinyi luba kimna mem!” ebmou.

25Ura, Ruben yala nang ab, Gad yala nang ab aryi Musa bisi ato ebmai, “Nai, nunci kan wa irmilin nang aryi kan ebmarim to kuboka kunubkwamab. 26Ba, nun nerabwe mabwe ab, nun bisam yabwe ab ara Gilead mutuk atei dam a deibloboka binkwamab. 27Bok, nunda sirya anabmabci, Er Iya Erebdobnyi biryi dibliliboka meneksici ura, mar ordarbinkwamab. Nunci me Yordan kouboka Er Iya Erebdobnyi ebdeibmar to kuboka mar ordarbinkwamab,” ebmai.

28Ura, Gad yala nang ab, Ruben yala nang ab ebmou to kuboka, Musa biryi imam Eleazar dam ab, ninyi si Nun mi Yosua dam ab, Israel nang yala weik sien nang dam ab nukmou. 29Ara, ato kuboka nukmou, “Gad yala nang ab, Ruben yala nang ab ara Er Iya Erebdobnyi ebdeibmar to, sun ab tonkwa me Yordan kouboka ninyi mar ibinkwamarum. Ba, sun milibmasingnyi deyok aryi a mutuk nirya ara Israel yuk yala nang sun mutuk kibkwande. Ura, ato kunubmunyi ura, Gad yala nang ab, Ruben yala nang ab asi Gilead mutuk nukwandarur, ba, sun mutuk kibkwande. 30Bok, Gad yala nang ab, Ruben yala nang ab sun ab tonkwa me Yordan kouboka ninyi kum ibinmamunyi ura, Kanaan mutuk ara sunbabyi tukwe ton ebkwandarur,” ebmou. 31Ura, Gad yala nang ab, Ruben yala nang ab aryi Musa bisi uram ato kuboka dekeibmai, “Nai Musa, nunci kan wa irmilin nang Er Iya Erebdobnyi ebdeibmar to kunubkwamab. 32Ara, Er Iya Erebdobnyi biryi diblilibmasici deici aryi me Yordan kouboka Kanaan mutuk ninyi ibinkwamab. Bok, Yordan me yaletam mutuk ara iya nun mutuk kibkwande,” ebmai. 33Ura, Musa biryi Gad yala nang ab, Ruben yala nang ab ati mutuk nukmou. Ani, bokoka Yusuf mi Manasye yala ati dinatam ton bokeibmou. A bokeibmou mutuk ara Amori mutuk sienyi Sihon taleamwe weik atei ab, Basan atei sienyi Og taleamwe weik atei ab, mitik-mitik atei a mutuk dam kuramnyi atei ab nukmou. 34Ba, Gad yala nang aryi weik atei Dibon ab, Atarot ab, Aroer ab, 35Atarot-Sofan ab, Yaezer ab, Yogbeha atei ab tubto dobmai. 36Ani, Bet-Nimra atei ab, Bet-Haran atei ab asi keil lika doboka mikib weik atei dobmai. Ani, sun bisam yabwe winin atei dobnin yibinmai. 37Ba, Ruben yala ara weik atei Hesybon atei ab, Eleale atei ab, Kiryataim atei ab, 38Nebo atei ab, Baal-Meon atei ab tubto dobmai. Ura, Baal-Meon atei yuk si Sibma asi dobmai. Ba, minob doamnyi yuk-yuk atei ababyi tubto dobmaici, ukuryok si dobmai.

39Ba, Manasye mi Makhir yala nang ara Gilead mutuk bindoka arabdobmai. Ura, Amori yala nang a mutuk kuramnyi asi yakdonokmai. 40Ato kuboka arabmai deyok aryi Musa biryi Gilead mutuk ara Manasye mi Makhir yala nang ati nukmou. Ba, Makhir yala nang ara Gilead mutuk sun dinyi kibiryi a kunung. 41Ba, Manasye deibdoba si Yair biryi mitik-mitik atei nirya arabdobmouci, anda atei si ara Hawot-Yair eboka dobmou. 42Ba, Manasye deibdoba si Nobah biryi weik atei Kenat atei ab, mitik-mitik atei ab nirya araboka akatei si ara Nobah eboka si dobmou. Ara, er si kobdob ati si dobmou.

Currently Selected:

Bilangan Uram 32: MTG

Highlight

Copy

Compare